ఎవరి తరఫునైనా లంచం డిమాండ్ చేస్తే అది కూడా నేరమే.. తేల్చి చెప్పిన సుప్రీంకోర్టు..

ప్రభుత్వ ఉద్యోగులకు సంబంధించిన లంచం, అవినీతి ఆరోపణల కేసులపై దేశ సర్వోన్నత న్యాయస్థానం సుప్రీంకోర్టు అత్యంత కీలకమైన, సంచలనమైన తీర్పును వెలువరించింది. అవినీతి నిరోధక చట్టం పరిధిని మరింత విస్తృతం చేస్తూ, తెరవెనుక ఉండి అక్రమాలకు పాల్పడే వారికి కూడా ఈ తీర్పు ద్వారా గట్టి హెచ్చరికలు జారీ చేసింది. లంచం కేసులలో కేవలం నేరుగా డబ్బులు తీసుకున్న వారే కాకుండా, వ్యవస్థను ప్రభావితం చేసే ప్రతి ఒక్కరినీ చట్టప్రకారం దోషులుగా పరిగణించాల్సి ఉంటుందని స్పష్టం చేసింది.

సుప్రీంకోర్టు తన తీర్పులో పేర్కొన్న వివరాల ప్రకారం.. ఒక ప్రభుత్వ ఉద్యోగి లంచాన్ని నేరుగా తన చేతులతో తీసుకోకపోయినప్పటికీ, మరొక ఉద్యోగి ద్వారా ఆ ప్రక్రియను నడిపించినా అది నేరమే అవుతుంది. అలాగే, అధికార పరిధిలో ఉన్న తన ఉన్నత హోదాను దుర్వినియోగం చేస్తూ, కింది స్థాయి ఉద్యోగులను లంచం తీసుకునేలా లేదా అక్రమాలకు పాల్పడేలా ప్రభావితం చేసినట్లు దర్యాప్తులో ఆధారాలతో సహా తేలితే.. సదరు ఉన్నతాధికారిని కూడా లంచం కేసులో ప్రధాన దోషిగా పరిగణించాలని కోర్టు తేల్చి చెప్పింది. లంచాలు ఇప్పించే మొత్తం వ్యవహారాన్ని స్వయంగా ముట్టుకోకుండా కేవలం తెరవెనుక నుండి నడిపించినా కూడా, ఆ నేరానికి సంబంధించిన పూర్తి బాధ్యతను సదరు ఉద్యోగి వహించాల్సిందేనని న్యాయస్థానం స్పష్టం చేసింది.

దీనితో పాటు, అధికారిక పరిధులతో సంబంధం లేకుండా కేవలం తన వ్యక్తిగత పలుకుబడిని లేదా ప్రభావాన్ని ఉపయోగించి పనులు చేయించడానికి ప్రయత్నించినా అది నేరపూరితమైన చర్యగానే పరిగణించబడుతుందని కోర్టు పేర్కొంది. అత్యంత ముఖ్యంగా, సదరు ప్రభుత్వ ఉద్యోగి తన స్వప్రయోజనాల కోసం కాకుండా, వేరొక వ్యక్తికి లేదా మూడో పక్షానికి అక్రమంగా ఆర్థిక లేదా ఇతర ప్రయోజనాలను సమకూర్చే ఉద్దేశంతో లంచం డిమాండ్ చేసినా.. లేదా దానిని పొందడానికి ఏ రకమైన ప్రయత్నం చేసినా కూడా అది చట్టప్రకారం తీవ్రమైన నేరమే అవుతుందని సుప్రీంకోర్టు ఒక నిర్దిష్ట కేసు విచారణ సందర్భంగా సంచలన తీర్పునిచ్చింది. ఈ తీర్పు ద్వారా ప్రభుత్వ కార్యాలయాల్లో లంచం తీసుకోకపోయినా, వేరే రూపాల్లో అవినీతిని ప్రోత్సహించే అధికారులకు చట్టం నుండి తప్పించుకునే మార్గాలన్నీ మూసుకుపోయినట్లయింది.