Spam Calls Alert: TRAI కొత్త స్పామ్ రూల్స్.. రోబోకాల్స్ చేస్తే 5 పైసలు చొప్పున ఛార్జ్.. టెలికాం కంపెనీలకు కీలక ఆదేశాలు

jagan 18 Sep 2026 1 నిమిషాల పఠనం బిజినెస్

Spam Calls

Spam Calls Alert: మొబైల్‌ వినియోగదారులకు తరచూ ఇబ్బంది కలిగిస్తున్న స్పామ్ కాల్స్‌, అవాంఛిత వాణిజ్య కమ్యూనికేషన్లపై టెలికాం రెగ్యులేటరీ అథారిటీ ఆఫ్ ఇండియా (TRAI) మరింత కఠిన చర్యలకు సిద్ధమైంది. స్పామ్‌ను గుర్తించేందుకు ఆర్టిఫిషియల్ ఇంటెలిజెన్స్‌, మెషిన్ లెర్నింగ్‌ ఆధారిత వ్యవస్థలను ఉపయోగించడంతో పాటు ఆటోమేటెడ్ కాల్స్‌, రోబోకాల్స్‌ను కూడా నియంత్రణ పరిధిలోకి తీసుకొచ్చింది. ఈ మేరకు సెప్టెంబర్ 18న Telecom Commercial Communications Customer Preference Regulations, 2018లో సవరణలు చేసింది. వినియోగదారుల ఫిర్యాదుల ఆధారంగా వేగంగా చర్యలు తీసుకోవడం, టెలికాం వనరులను దుర్వినియోగం చేసే స్పామర్లపై కఠినంగా వ్యవహరించడం ఈ మార్పుల ప్రధాన ఉద్దేశం.

కొత్త నిబంధనల ప్రకారం టెలికాం సర్వీస్ ప్రొవైడర్లు (TSPలు) స్పామ్ కమ్యూనికేషన్లకు ఉపయోగించే అవకాశం ఎక్కువగా ఉన్న కస్టమర్ లైన్ నంబర్లను (CLI) గుర్తించాలి. అనుమానాస్పద నంబర్లకు సంబంధించిన సమాచారాన్ని ఇతర ఆపరేటర్లతోనూ పంచుకోవాల్సి ఉంటుంది. ఒకే పంపేవారికి సంబంధించిన ఐదు లేదా అంతకంటే ఎక్కువ CLIలు 10 రోజుల్లో ఫ్లాగ్ అయితే, ఆ పంపేవారిపై తదుపరి విచారణ, దశలవారీగా అమలు చర్యలు చేపట్టవచ్చు. ఇందులో KYC పునఃధృవీకరణ, భౌతిక ధృవీకరణ, అవుట్‌గోయింగ్ సేవలపై ఆంక్షలు, పదేపదే ఉల్లంఘనలు జరిగితే టెలికాం వనరుల డిస్‌కనెక్షన్‌ వంటి చర్యలు ఉంటాయి.

రోబోకాల్స్‌కు ఇక ముందస్తు ప్రకటన తప్పనిసరి

TRAI తొలిసారిగా Application-to-Person (A2P) కాల్స్‌ను కూడా స్పష్టంగా నియంత్రణ పరిధిలోకి తీసుకొచ్చింది. అప్లికేషన్లు, సాఫ్ట్‌వేర్ సిస్టమ్‌లు లేదా ఆటోమేటెడ్ ప్లాట్‌ఫారమ్‌ల ద్వారా నేరుగా మనిషి డయల్ చేయకుండా చేసే కాల్స్‌ ఈ విభాగంలోకి వస్తాయి. ఆటోడైలింగ్‌, రోబోకాల్స్‌, ముందుగా రికార్డ్ చేసిన వాయిస్‌, కృత్రిమ వాయిస్‌తో చేసే కాల్స్‌ కూడా ఇందులో భాగమే.

ఇలాంటి A2P కాల్స్‌ను ఉపయోగించే సంస్థలు ముందుగానే తమ టెలికాం సర్వీస్ ప్రొవైడర్‌కు సమాచారం ఇవ్వాలి. ముఖ్యంగా ఉపయోగించబోయే CLIల వివరాలను కూడా ప్రకటించాలి. ఈ ప్రకటన లేకుండా చేసే A2P కాల్స్‌ను UCCగా పరిగణించే అవకాశం ఉంటుంది. అదనంగా, ఇలాంటి కాల్స్‌పై నిమిషానికి గరిష్ఠంగా 5 పైసల వరకు టెర్మినేషన్ ఛార్జీ విధించే నిబంధనను తీసుకొచ్చింది. నియంత్రిత వాణిజ్య కమ్యూనికేషన్ల కోసం కేటాయించిన నంబరింగ్ సిరీస్‌లు, అథారిటీ అనుమతించిన కొన్ని కాల్స్‌కు మినహాయింపులు ఉన్నాయి.

మూడు ఫిర్యాదులతోనే చర్య

స్పామ్‌పై చర్యలు తీసుకునే విధానంలోనూ కీలక మార్పు చేసింది TRAI. ఇప్పటివరకు ఒక పంపేవారిపై 10 రోజుల్లో కనీసం ఐదు ప్రత్యేక ఫిర్యాదులు వస్తే చర్యలు ప్రారంభించే అవకాశం ఉండేది. ఇకపై సంబంధిత CLIని TSPకి చెందిన AI/ML వ్యవస్థ కూడా అనుమానిత UCCగా ఫ్లాగ్ చేస్తే, మూడు లేదా అంతకంటే ఎక్కువ ప్రత్యేక ఫిర్యాదులతోనే చర్యలు ప్రారంభించవచ్చు. దీంతో వినియోగదారుల ఫిర్యాదులను ఆపరేటర్ల మెషిన్ ఆధారిత గుర్తింపుతో అనుసంధానించి, అనుమానిత స్పామర్లను త్వరగా గుర్తించే అవకాశం ఏర్పడుతుంది.

ఫిర్యాదుపై అప్పీల్ చేసుకునే అవకాశం

UCC ఫిర్యాదుల పరిష్కారంపై వినియోగదారులకు అప్పీల్ చేసే అవకాశాన్ని కూడా TRAI కల్పించింది. ఫిర్యాదు పరిష్కారంపై అసంతృప్తి ఉంటే 15 రోజుల్లో అప్పీలేట్ అథారిటీని ఆశ్రయించవచ్చు. TRAI DND యాప్‌, సంబంధిత టెలికాం కంపెనీల యాప్‌లు లేదా పోర్టళ్లతో పాటు 1909కు కాల్ లేదా SMS ద్వారా కూడా ఈ ప్రక్రియను చేపట్టే అవకాశం ఉంది.

కస్టమర్ విచారణకు 7 రోజుల గడువు

వినియోగదారుడు ఒక ఉత్పత్తి లేదా సేవ గురించి స్వయంగా విచారణ చేసిన సందర్భంలో, దానికి సంబంధించిన వాణిజ్య కమ్యూనికేషన్‌ను గరిష్ఠంగా ఏడు రోజుల వరకు కొనసాగించేందుకు కొత్త నిబంధనలు అవకాశం కల్పిస్తున్నాయి. అయితే ఆ విచారణ రాతపూర్వకంగా లేదా డిజిటల్ రూపంలో ఉండాలి. దానికి సంబంధించిన రికార్డును పంపేవారు ధృవీకరించగలిగే విధంగా భద్రపరచాలి. ముఖ్యంగా ఈ నిబంధన ఈ-కామర్స్‌, ఈ-సర్వీస్ ప్లాట్‌ఫారమ్‌లకు ఉపయోగపడేలా రూపొందించినట్లు TRAI పేర్కొంది.

నకిలీ హెడర్లు, టెంప్లేట్లపై కఠిన చర్యలు

హెడర్లు, కంటెంట్ టెంప్లేట్ల దుర్వినియోగాన్ని అరికట్టేందుకు కూడా TRAI నిబంధనలను కఠినతరం చేసింది. దుర్వినియోగం గురించి సంబంధిత యాక్సెస్ ప్రొవైడర్‌కు సమాచారం అందిన ఆరు గంటల్లోపు తప్పుగా ఉపయోగించిన హెడర్ లేదా టెంప్లేట్‌ను నిలిపివేయాల్సి ఉంటుంది. దుర్వినియోగానికి టెలిమార్కెటర్ కారణమని తేలితే, బ్లాక్‌లిస్ట్ చేయడంతో పాటు వివిధ టెలికాం సర్వీస్ ప్రొవైడర్ల వద్ద ఉన్న దాని టెలికాం వనరులపై ఒక సంవత్సరం వరకు చర్యలు తీసుకునే అవకాశం ఉంటుంది.

అదే సమయంలో 140xx, 1600xx, 1601xx వంటి నిర్దేశిత వాణిజ్య నంబరింగ్ సిరీస్‌ల నుంచి వచ్చే కాల్స్‌ను కాల్-మేనేజ్‌మెంట్ యాప్‌లు పూర్తిగా బ్లాక్ చేయడం లేదా ఆటోమేటిక్‌గా స్పామ్‌గా ట్యాగ్ చేయడాన్ని TRAI నిషేధించింది. అయితే వినియోగదారులు తమ వ్యక్తిగత పరికరాల్లో తమకు నచ్చిన కాల్స్‌ను బ్లాక్ లేదా ఫిల్టర్ చేసుకునే అవకాశం కొనసాగుతుంది.

కొత్త మార్పులతో స్పామ్ కాల్స్‌ను ముందుగానే గుర్తించడం, ఫిర్యాదులపై వేగంగా చర్యలు తీసుకోవడం, ఆటోమేటెడ్ కమ్యూనికేషన్లను పర్యవేక్షించడం, టెలికాం వనరుల దుర్వినియోగాన్ని అడ్డుకోవడం లక్ష్యంగా TRAI ముందుకు వెళ్తోంది. వినియోగదారులకు ఇబ్బంది కలిగించే అవాంఛిత వాణిజ్య కాల్స్‌ను తగ్గించడంతో పాటు, నిజమైన వాణిజ్య కమ్యూనికేషన్లు మరియు స్పామ్ మధ్య తేడాను సాంకేతికంగా గుర్తించే వ్యవస్థను మరింత బలోపేతం చేయడమే ఈ సవరణల ప్రధాన ఉద్దేశంగా కనిపిస్తోంది.