జెన్ జీకి సంస్కారం నేర్పాలి…మోదీని తిడుతుంటే నా గుండె కరిగింది.. డిప్యూటీ సీఎం పవన్ వ్యాఖ్యలపై నెట్టింట చెడుగుడు

భోగాపురం అంతర్జాతీయ విమానాశ్రయ ప్రారంభోత్సవ వేదికపై ఆంధ్రప్రదేశ్ ఉపముఖ్యమంత్రి పవన్ కళ్యాణ్ చేసిన ప్రసంగం ప్రస్తుతం రాజకీయ వర్గాల్లో తీవ్ర చర్చనీయాంశంగా మారింది. ప్రధాని నరేంద్ర మోదీ సేవలను కొనియాడుతూ ఆయన పడుతున్న శ్రమను ప్రశంసించారు. ఢిల్లీలోని జంతర్ మంతర్ వేదికగా ప్రధానిపై వస్తున్న విమర్శలు చూసి తానెంతో ఆవేదన చెందానని, కళ్లంట నీళ్లు తిరిగాయని పేర్కొన్నారు. ఒకరోజు కూడా సెలవు తీసుకోకుండా దేశం కోసం కష్టపడే నాయకుడిని అలా మాట్లాడటం తగదని, నేటి ‘జెన్ జీ’ తరం యువతకు సరైన సంస్కారం, నైతిక విలువలు నేర్పాల్సిన అవసరం ఉందన్నారు.

ఈ భావోద్వేగాల ప్రవాహంపై రాజకీయ వర్గాల్లో భిన్నమైన అభిప్రాయాలు, నెటిజన్ల నుంచి చురకలు వెల్లువెత్తుతున్నాయి. గతంలో “అన్యాయాలను ప్రశ్నించడానికే పుట్టాను” అని గంభీరంగా ప్రకటించిన నాయకుడికి, ఇప్పుడు హక్కుల కోసం నిరసన తెలుపుతున్న యువత కనిపించగానే హఠాత్తుగా ‘సంస్కారం’ గుర్తొచ్చిందా అని కొన్ని వర్గాలు విస్మయం వ్యక్తం చేస్తున్నాయి. “తాను వండితే పాయసం, ఎదుటివాడు వండితే పేడ నీళ్లు” అన్నట్లు.. గతంలో ఇదే పొత్తుల పుణ్యమా అని టీడీపీ అధినేత చంద్రబాబు నాయుడు ఢిల్లీ వేదికగా ప్రధాని మోదీని, ఆయన కుటుంబ సభ్యులను ఉద్దేశించి తీవ్ర పదజాలంతో విమర్శలు కురిపించినప్పుడు, అప్పటి ‘ప్రశ్నించే గొంతుక’కి కనీసం ఆవగింజంతైనా ఆవేదనగానీ, ఒక్క చుక్కైనా కన్నీరుగానీ రాలేదేంటి చెప్మా అని నెటిజన్లు వేళాకోళంగా విమర్శిస్తున్నారు.

మరోవైపు, లక్షలాది మంది విద్యార్థుల భవిష్యత్తును గందరగోళంలోకి నెట్టిన నీట్ (NEET) ప్రశ్నాపత్రాల లీకేజీ ఉదంతంపై కాక్రోచ్ జనతా పార్టీ నేతృత్వంలో యువత పెద్ద ఎత్తున జంతర్ మంతర్ వద్ద పోరాటం చేసింది. పోలీసుల దెబ్బలను భరించి, విద్యాశాఖ మంత్రి రాజీనామా చేయాలని డిమాండ్ చేస్తూ ప్రజాస్వామ్యబద్ధంగా ఆందోళన నిర్వహించింది. ఆక్రోశంతో ఉన్న విద్యార్థుల నిరసనలను “సంస్కార రాహిత్యం” అని ముద్ర వేయడం భలే విడ్డూరంగా ఉందనే అభిప్రాయం వ్యక్తమవుతోంది. “అందితే జుట్టు, అందకపోతే కాళ్లు” అన్న చందంగా.. అధికారంలోకి రాకముందు మైకులు పగలగొట్టేలా ప్రశ్నించడాన్ని సమర్థించి, తీరా అధికారం దక్కిన తర్వాత అదే ప్రశ్నించే నైజాన్ని తప్పుబట్టడం మహా విచిత్రమైన ద్వంద్వ వైఖరిని ప్రతిబింబిస్తోందని విశ్లేషణలు సాగుతున్నాయి.

ప్రధాని కష్టాన్ని, సేవలను అభినందించడంలో ఎలాంటి పొరపాటు లేదు. ప్రజాస్వామ్యంలో లోపాలను నిలదీసే యువత ఆవేదనను అపచారంగా చిత్రీకరించడం భావప్రకటనా స్వేచ్ఛను అణచివేయడమే అవుతుందని రాజకీయ విశ్లేషకులు భావిస్తున్నారు. “చెవుటివాని ముందు శంఖం ఊదినట్లు”.. సమస్యలను పరిష్కరించాల్సింది పోయి, హక్కుల కోసం గళమెత్తుతున్న యువతకే సంస్కార తరగతులు చెప్పడం పవన్ నాయకత్వ పరిణతికే పరీక్షగా మారిందనే చర్చ జోరుగా నడుస్తోంది.