Telangana Politics: ఆడబిడ్డలను కోటీశ్వరులుగా తీర్చిదిద్దడమే లక్ష్యం.. తెలంగాణ ముఖ్యమంత్రి రేవంత్ రెడ్డి కీలక వ్యాఖ్యలు..

Telangana Politics: ప్రజలు తనకు అడిగినదానికంటే ఎక్కువ అందించారని, మహిళా అభ్యున్నతితోనే సమాజం బాగుపడుతుందని తెలంగాణ ముఖ్యమంత్రి రేవంత్ రెడ్డి వ్యాఖ్యానించారు. మహిళా స్వయం సహాయక బృందాలతో నిర్వహించిన ముఖాముఖి కార్యక్రమంలో పాల్గొన్న ఆయన, తన పుట్టినరోజు సందర్భాన్ని పురస్కరించుకుని ఆడపడుచుల సమక్షంలో సభను ఉద్దేశించి ప్రసంగించారు.

మహిళల ఆశీర్వాదంతోనే తాను ఈ ఉన్నత స్థానానికి ఎదిగానని, ఇక జీవితంలో కోరుకునేదేమీ లేదని సీఎం తెలిపారు. రాబోయే 2034 నాటికి మహిళా స్వయం సహాయక సంఘాల్లో సభ్యుల సంఖ్యను కోటికి పెంచి, ఆ కోటి మంది ఆడబిడ్డలను కోటీశ్వరులుగా తీర్చిదిద్దడమే తమ ప్రభుత్వ ప్రధాన లక్ష్యమని స్పష్టం చేశారు. ఆడబిడ్డ చేతిలో పెత్తనం ఉన్నప్పుడే ఇల్లు బాగుపడుతుందన్న నమ్మకంతోనే పాఠశాల విద్యార్థుల యూనిఫామ్ కుట్టుపనిని మహిళలకు అప్పగించామని, దీని ద్వారా ఏడాదికి రూ.15 నుంచి రూ.20 కోట్ల వ్యాపారం జరుగుతోందని తెలిపారు.

ఇదిలా ఉండగా, ప్రభుత్వ కార్యాలయాల్లో ఇందిరమ్మ క్యాంటీన్ల నిర్వహణతో పాటు పెట్రోల్ బంకులు, సోలార్ విద్యుత్ ఉత్పత్తిలోనూ మహిళలను భాగస్వాములను చేశామని రేవంత్ రెడ్డి పేర్కొన్నారు. గత 34 నెలల్లో మహిళా సంఘాలకు రూ.79 వేల కోట్ల బ్యాంకు లింకేజీ రుణాలను అందించినట్లు వెల్లడించారు. అలాగే నూతనంగా మంజూరు చేసిన 4.5 లక్షల పెన్షన్లలో 3.5 లక్షలు ఒంటరి, వితంతు మహిళలకే కేటాయించామని వివరించారు.

ప్రస్తుతం రోజుకు 37 లక్షల మంది మహిళలు ఆర్టీసీ బస్సుల్లో ఉచితంగా ప్రయాణిస్తున్నారని, ఇందిరమ్మ ఇండ్లు, 200 యూనిట్ల ఉచిత కరెంటు, సన్న బియ్యం పంపిణీ వంటి పథకాలు వారి జీవితాల్లో వెలుగులు నింపుతున్నాయని వివరించారు. ఇదే సమయంలో ప్రతిపక్ష నేత కేటీఆర్‌పై విమర్శలు గుప్పిస్తూ, సొంత చెల్లెలినే ఇంటి నుంచి గెంటేసిన వ్యక్తి మహిళా ఉద్ధరణ గురించి మాట్లాడటం విడ్డూరంగా ఉందన్నారు. మహిళలు కేవలం గృహిణులుగానే కాకుండా పారిశ్రామికవేత్తలుగా ఎదగాలని, పిల్లలను ఉన్నత చదువులు చదివించి ఆర్థికంగా నిలదొక్కుకోవాలని సూచించారు.