తెలంగాణలో మరోసారి వానలు.. ఈ జిల్లాలకు అలర్ట్.. నవంబర్ 7 నుంచి పెరగనున్న చలి..

తెలంగాణలో వర్షాల ప్రభావం ఇప్పుడప్పుడే పూర్తిగా తగ్గేలా కనిపించడం లేదు. మురసు తుపాను కారణంగా ఏర్పడిన వాతావరణ పరిస్థితుల ప్రభావంతో గురువారం కూడా రాష్ట్రంలోని కొన్ని ప్రాంతాల్లో వర్షాలు కురిసే అవకాశాలున్నాయి. ముఖ్యంగా దక్షిణ, తూర్పు తెలంగాణ జిల్లాల ప్రజలు అప్రమత్తంగా ఉండాలని వాతావరణ శాఖ సూచించింది. మరోవైపు హైదరాబాద్‌లోనూ మధ్యాహ్నం తర్వాత వాన జల్లులు పడే అవకాశం ఉందని అంచనా వేస్తున్నారు. అయితే నవంబర్ 7 లేదా 8వ తేదీ నుంచి వర్షాల ప్రభావం తగ్గి వాతావరణం పొడిగా మారనుంది. ఆ తర్వాత రాష్ట్రంలో చలి క్రమంగా పెరిగే సూచనలు కనిపిస్తున్నాయి.

ఈ జిల్లాల్లో వర్షాలు కురిసే అవకాశం

మురసు తుపాను ప్రభావంతో వాతావరణంలో ఏర్పడిన తేమ కారణంగా నవంబర్ 5న తెలంగాణలో అక్కడక్కడ వర్షాలు నమోదయ్యే అవకాశం ఉందని హైదరాబాద్ వాతావరణ కేంద్రం వెల్లడించింది. నల్గొండ, సూర్యాపేట, ఖమ్మం, భద్రాద్రి కొత్తగూడెం, మహబూబాబాద్, రంగారెడ్డి, నాగర్‌కర్నూల్ జిల్లాల్లో మధ్యాహ్నం నుంచి రాత్రి మధ్య ఉరుములు, మెరుపులతో కూడిన వానలు పడవచ్చని అంచనా వేస్తున్నారు.

ఈ ప్రాంతాల్లో భారీ వర్షాలకు బదులుగా తేలికపాటి నుంచి మోస్తరు జల్లులు కురిసే అవకాశాలే ఎక్కువగా ఉన్నాయని తెలుస్తోంది. మిగిలిన జిల్లాల్లోనూ అక్కడక్కడా వర్షం పడే అవకాశం ఉందని వాతావరణ అంచనాలు సూచిస్తున్నాయి. ముఖ్యంగా సాయంత్రం వేళ బయటకు వెళ్లేవారు వాతావరణ పరిస్థితులను గమనించాలని సూచిస్తున్నారు.

హైదరాబాద్‌లో మధ్యాహ్నం తర్వాత వాన జల్లులు

రాజధాని హైదరాబాద్‌లో ఉదయం నుంచి మధ్యాహ్నం వరకు వాతావరణం సాధారణంగానే ఉండే అవకాశం ఉంది. అయితే మధ్యాహ్నం దాటిన తర్వాత కొన్ని ప్రాంతాల్లో వర్షం కురిసే సూచనలు ఉన్నాయి. ఉరుములు, మెరుపులతో కూడిన జల్లులు పడవచ్చని అంచనా వేస్తున్నారు. నగరంలోని అన్ని ప్రాంతాల్లో ఒకేసారి వర్షం కురిసే పరిస్థితి లేదని, కొన్ని ప్రాంతాలకే వాన పరిమితం కావచ్చని వాతావరణ విశ్లేషకులు చెబుతున్నారు.

నవంబర్ 7 నుంచి మారనున్న వాతావరణం

ప్రస్తుతం కొనసాగుతున్న వర్షాల ప్రభావం మరో రెండు రోజుల్లో తగ్గుముఖం పట్టే అవకాశం ఉంది. నవంబర్ 7 లేదా 8వ తేదీ నుంచి తెలంగాణలో పొడి వాతావరణం తిరిగి ఏర్పడుతుందని అంచనా. వర్షాలు తగ్గిన తర్వాత రాత్రి ఉష్ణోగ్రతలు క్రమంగా పడిపోవడంతో చలి తీవ్రత పెరిగే అవకాశముంది. దీంతో రానున్న రోజుల్లో రాష్ట్రవ్యాప్తంగా చలిగాలుల ప్రభావం ఎక్కువగా కనిపించవచ్చని వాతావరణ పరిస్థితులు సూచిస్తున్నాయి.

మురసు తుపాను దెబ్బకు రైతులకు భారీ నష్టం

మరోవైపు మురసు తుపాను ప్రభావం ఖమ్మం, భద్రాద్రి కొత్తగూడెం జిల్లాల్లో వ్యవసాయ రంగంపై తీవ్రంగా పడింది. మంగళ, బుధవారాల్లో కురిసిన విస్తారమైన వర్షాలు, ఈదురుగాలుల కారణంగా పలు ప్రాంతాల్లో పంటలు దెబ్బతిన్నాయి. కోతకు సిద్ధంగా ఉన్న వరి పొలాల్లో పంట నేలకొరిగి నీటిలో మునిగిపోయింది. పత్తి చేలల్లోకి వర్షపు నీరు చేరడంతో పత్తి తడిసిపోయింది. ఇప్పటికే కూలీల కొరతతో పత్తి సేకరణ ఆలస్యమవుతుండగా, తాజా వర్షాలు రైతుల కష్టాలను మరింత పెంచాయి. కొన్ని ప్రాంతాల్లో మిరప తోటలు కూడా నీటిలో చిక్కుకున్నాయి.

పొలాల్లో నీరు నిలిచిపోవడంతో పంట దిగుబడి తగ్గే ప్రమాదం ఉందని రైతులు ఆందోళన చెందుతున్నారు. వ్యవసాయ భూములు నీటితో నిండిపోవడంతో పంటలను కాపాడుకోవడం కష్టంగా మారింది.

అశ్వారావుపేటలో ఐదున్నర గంటల్లోనే 25.3 సెంటీమీటర్ల వర్షం

భద్రాద్రి కొత్తగూడెం జిల్లాలోని అశ్వారావుపేట, కొత్తగూడెం నియోజకవర్గాల పరిధిలో వర్ష తీవ్రత ఎక్కువగా కనిపించింది. ముఖ్యంగా అశ్వారావుపేటలో బుధవారం ఉదయం 8.30 గంటల నుంచి మధ్యాహ్నం 2 గంటల వరకు కేవలం ఐదున్నర గంటల్లోనే 25.3 సెంటీమీటర్ల వర్షపాతం నమోదైంది.

దమ్మపేట మండలంలోని మల్కారంలో 18.7 సెంటీమీటర్లు, అంకంపాలెంలో 14.8 సెంటీమీటర్లు, ములకలపల్లిలో 14.6 సెంటీమీటర్ల వర్షం కురిసింది. అంతకుముందు మంగళవారం ఉదయం నుంచి బుధవారం ఉదయం వరకు కూడా జిల్లాలో భారీ వర్షాలు నమోదయ్యాయి. ములకలపల్లిలో 19.7 సెంటీమీటర్లు, దమ్మపేట మండలం నాయుడుపేటలో 19.1 సెంటీమీటర్లు, మల్కారం, మందలపల్లిలో 16.5 సెంటీమీటర్లు, నాగుపల్లిలో 16 సెంటీమీటర్ల వర్షపాతం నమోదైంది.

భారీ వర్షాల నేపథ్యంలో ముందస్తు జాగ్రత్తగా అశ్వారావుపేట, దమ్మపేట, ములకలపల్లి మండలాల్లో విద్యాసంస్థలకు అధికారులు బుధవారం సెలవు ప్రకటించారు. మొత్తంగా చూస్తే గురువారం కూడా తెలంగాణలో కొన్ని ప్రాంతాలకు వర్ష సూచన ఉండగా.. వారాంతం నుంచి వాతావరణం మారి చలి పెరిగే అవకాశం ఉంది.