Helicopters Collide Near Everest: ఎవరెస్ట్ బేస్ క్యాంప్ సమీపంలో రెండు హెలికాప్టర్ల ఢీ.. భారతీయ పర్యాటకుడు మృతి.. వీడియో ఇదిగో..

Helicopters Collide Near Everest: ప్రపంచంలోనే అత్యంత ఎత్తైన పర్వతం ఎవరెస్ట్ సమీపంలోని నేపాల్ పర్వత ప్రాంతంలో మంగళవారం (నవంబర్ 3) ఉదయం ఘోర ప్రమాదం చోటుచేసుకుంది. సోలుఖుంబు జిల్లాలోని ఫెరిచే (Pheriche) ప్రాంతంలో ఒకే హెలిప్యాడ్‌పై దిగేందుకు ప్రయత్నించిన రెండు హెలికాప్టర్లు పరస్పరం ఢీకొన్నాయి. ఈ విషాదకర ఘటనలో విమానంలో ప్రయాణిస్తున్న ఒక భారతీయ పర్యాటకుడు అక్కడికక్కడే ప్రాణాలు కోల్పోగా, మరో ఇద్దరు తీవ్రంగా గాయపడ్డారు. పర్వతారోహణ మార్గంలో హెలికాప్టర్లు ల్యాండింగ్ అవుతున్న సమయంలో ఈ దుర్ఘటన జరగగా, దీనికి సంబంధించిన భయాందోళనకర దృశ్యాలు సామాజిక మాధ్యమాల్లో వైరల్‌గా మారాయి.

సోలుఖుంబు జిల్లా పోలీసు అధికారి మౌసమ్ తమంగ్ అందించిన ప్రాథమిక వివరాల ప్రకారం.. ఫిష్‌టైల్ ఎయిర్ (Fishtail Air) , ఎయిర్ డైనాస్టీ (Air Dynasty) సంస్థలకు చెందిన రెండు హెలికాప్టర్లు మంగళవారం ఉదయం 8:11 గంటల సమయంలో ఫెరిచే హెలిప్యాడ్‌పై ఒకే సమయంలో దిగేందుకు ప్రయత్నించాయి. ఈ క్రమంలో రెండింటి రోటర్ బ్లేడ్లు (Rotor Blades) పరస్పరం గాల్లోనే బలంగా తాకడంతో ప్రమాదం సంభవించింది. ప్రమాదం తీవ్రత ఎక్కువగా ఉన్నప్పటికీ ల్యాండింగ్ సమయంలో మంటలు చెలరేగకపోవడంతో మరింత పెద్ద ప్రమాదం తప్పిందని అధికారులు వెల్లడించారు.

ఈ ఘటనలో తీవ్రంగా గాయపడిన మరో భారతీయ పర్యాటకుడు , పైలట్‌ను తక్షణమే లుక్లాలోని సమీప ఆసుపత్రికి అత్యవసర హెలికాప్టర్ ద్వారా తరలించి వైద్యం అందిస్తున్నారు. ఎవరెస్ట్ పర్వతారోహణ , ట్రెకింగ్ మార్గంలో అత్యంత కీలకమైన రవాణా కేంద్రంగా ఉన్న ఫెరిచే ప్రాంతంలో నిరంతరం పర్యాటకులు, పర్వతారోహకుల కదలికలు ఉంటాయి. ఒకే సమయంలో ఒకే హెలిప్యాడ్‌కు ఇరు సంస్థల పైలట్లు ఎలా అనుమతి పొందారు, విమానయాన నియంత్రణ అధికారుల నిర్లక్ష్యం ఉందా అన్న కోణంలో నేపాల్ సివిల్ ఏవియేషన్ అథారిటీ నివేదిక కోరింది. ఢీకొన్న ప్రమాదానికి దారితీసిన పరిస్థితులపై స్థానిక సోలుఖుంబు పోలీసులు, సివిల్ ఏవియేషన్ అధికారులు సంయుక్తంగా దర్యాప్తు నిర్వహిస్తున్నారు.