Telangana Politics: గవర్నర్‌ను కలిసిన కేటీఆర్.. కాంగ్రెస్ ప్రభుత్వంపై ఫిర్యాదుల వెల్లువ.. 1000 రోజులు గడిచినా హామీలు నెరవేర్చలేదని విమర్శ

jagan 09 Sep 2026 1 నిమిషాల పఠనం తెలంగాణ

Telangana Politics:

Telangana Politics: రాష్ట్రంలో శాంతిభద్రతలు పూర్తిగా క్షీణించాయని, కాంగ్రెస్ ప్రభుత్వం రక్షక భటులను ఉపయోగించి ప్రతిపక్ష ఎమ్మెల్యేలపై దౌర్జన్యాలకు పాల్పడుతోందని ఆరోపిస్తూ భారత రాష్ట్ర సమితి (BRS) వర్కింగ్ ప్రెసిడెంట్ కేటీఆర్ నేతృత్వంలోని పార్టీ ప్రజాప్రతినిధుల బృందం బుధవారం రాజ్ భవన్‌లో తెలంగాణ గవర్నర్‌తో భేటీ అయ్యింది. అసెంబ్లీ ప్రాంగణంలో ప్రతిపక్ష ఎమ్మెల్యేలు, ముఖ్యంగా మహిళా ప్రజాప్రతినిధులపై పోలీసులు జరిపిన దాడులకు సంబంధించిన వీడియో ఆధారాలు, నివేదికలను వారు గవర్నర్‌కు సమర్పించి, తక్షణమే జోక్యం చేసుకోవాలని విజ్ఞప్తి చేశారు.

గవర్నర్‌తో భేటీ అనంతరం కేటీఆర్ మీడియాతో మాట్లాడుతూ కాంగ్రెస్ ప్రభుత్వంపై తీవ్రస్థాయిలో విరుచుకుపడ్డారు. కాంగ్రెస్ అధికారంలోకి వచ్చి 1,000 రోజులు పూర్తయినా ఇచ్చిన వాగ్దానాలను నెరవేర్చలేదని, దానికి నిరసనగా నల్ల చొక్కాలు ధరించి సభకు వచ్చిన తమ ఎమ్మెల్యేలను పోలీసులు అడ్డుకుని భౌతిక దాడులకు దిగారని ఆరోపించారు. సీనియర్ మహిళా ఎమ్మెల్యే సబితా ఇంద్రారెడ్డి పట్ల పోలీసులు అత్యంత హేయంగా ప్రవర్తించారని మండిపడ్డారు. ఈ దాడి ఘటనపై సీపీ కార్యాలయంలో ఫిర్యాదు చేసినా ఇప్పటివరకు ఎలాంటి కేసు నమోదు చేయకపోగా, బాధితులైన తమ పార్టీ నేతలపైనే రివర్స్‌లో అక్రమ కేసులు బనాయించారని నిరసన వ్యక్తం చేశారు.

వంద రోజుల్లోనే ఆరు గ్యారంటీలను అమలు చేస్తామని నమ్మబలికిన కాంగ్రెస్, 1,000 రోజులు దాటినా 420కి పైగా వాగ్దానాలను పూర్తిగా గాలికొదిలేసి ప్రజలను మోసం చేసిందని విమర్శించారు. బీఆర్ఎస్ హయాంలో మాజీ సీఎం కేసీఆర్ రైతుబంధు పథకం కింద రూ. 73,000 కోట్లు నేరుగా రైతుల ఖాతాల్లో వేస్తే, నేటి కాంగ్రెస్ ప్రభుత్వం పొలాలకు వేయడానికి కనీసం యూరియాను కూడా సరఫరా చేయలేని దౌర్భాగ్య స్థితిలో ఉందన్నారు. రైతు బీమా పథకాన్ని నిర్వీర్యం చేశారని, నిరుద్యోగ యువతకు ఉద్యోగాలు, భృతి ఇవ్వకుండా మోసం చేస్తున్నారని ఆగ్రహం వ్యక్తం చేశారు.

అసెంబ్లీలో ప్రజల తరఫున నిలదీస్తున్న తమ పార్టీ ఎమ్మెల్యేలపై అసెంబ్లీలో సస్పెన్షన్ వేటు వేసి, బయట పోలీసులతో దాడులు చేయిస్తున్నారంటేనే ప్రభుత్వానికి ఓటమి భయం పట్టుకుందని కేటీఆర్ వ్యాఖ్యానించారు. రాజ్యాంగబద్ధమైన స్పీకర్ స్థానాన్ని, ప్రజాస్వామ్య వ్యవస్థలను కాపాడాల్సిన బాధ్యత గవర్నర్‌పై ఉందనే విషయాన్ని వారికి వివరించామని తెలిపారు.