Andhra Pradesh Politics: ఏపీ కూటమిలో నాదెండ్ల మనోహార్ ప్రకంపనలు.. స్థానిక ఎన్నికల్లో సీట్ల పంపిణీ ఫార్ములా తుట్టెను కదిపిన మంత్రి..

Prajapaksham 17 Jul 2026 1 నిమిషాల పఠనం ఆంధ్రప్రదేశ్

Andhra Pradesh Politics: ఆంధ్రప్రదేశ్‌లోని అధికార కూటమి రాజకీయాల్లో జనసేన సీనియర్ నాయకుడు, మంత్రి నాదెండ్ల మనోహర్ చేసిన వ్యాఖ్యలు తీవ్ర చర్చనీయాంశంగా మారాయి. రాబోయే స్థానిక సంస్థల ఎన్నికల్లో 2024 సార్వత్రిక ఎన్నికల నాటి సీట్ల పంపిణీ ఫార్ములా వర్తించదని ఆయన స్పష్టం చేశారు. స్థానిక సమరంలో జనసేన పార్టీ ఈసారి అత్యధిక స్థానాల్లో పోటీ చేయడానికి సిద్ధమవుతోందని వెల్లడించారు.

గత అసెంబ్లీ ఎన్నికల సమయంలో రాష్ట్ర ప్రయోజనాల కోసం జనసేన అధినేత పవన్ కల్యాణ్ ఒక అడుగు వెనక్కి తగ్గి కూటమి విజయానికి సహకరించారని నాదెండ్ల మనోహర్ గుర్తుచేశారు. అయితే, రాబోయే స్థానిక సంస్థల ఎన్నికల్లో మాత్రం ఆయా పార్టీల క్షేత్రస్థాయి బలాబలాల ఆధారంగానే సీట్ల పంపిణీ ఉంటుందని తేల్చిచెప్పారు. క్షేత్రస్థాయిలో పార్టీ కోసం నిరంతరం కష్టపడిన నాయకులకు, కార్యకర్తలకు ఈ ఎన్నికల్లో తగిన ప్రాధాన్యం ఇస్తామని భరోసా ఇచ్చారు.

జనసేన కార్యకర్తలలో నాయకత్వ లక్షణాలను పెంపొందించే దిశగా పార్టీ అడుగులు వేస్తోందని, బలాన్ని బట్టి తగినన్ని స్థానాలను దక్కించుకుంటామని మనోహర్ పేర్కొన్నారు. దీనికి సంబంధించి రాబోయే ఎన్డీయే (NDA) సమన్వయ కమిటీ సమావేశాల్లో అన్ని అంశాలపై లోతుగా చర్చించి ఉమ్మడి నిర్ణయం తీసుకుంటామని వివరించారు. ప్రజలకు మరింత చేరువవుతూ, ఎక్కడా అభివృద్ధి కార్యక్రమాలకు ఆటంకం కలగకుండా రాబోయే రోజుల్లో ఎన్నికలను ఎదుర్కొనేందుకు కూటమి నాయకత్వం పక్కా వ్యూహంతో ముందుకు సాగుతోందని మంత్రి నాదెండ్ల మనోహర్ స్పష్టం చేశారు.

ఆంధ్రప్రదేశ్‌లో అధికార ఎన్డీయే కూటమిలోని ప్రధాన భాగస్వామ్య పక్షాలైన జనసేన, తెలుగుదేశం పార్టీల (TDP) శ్రేణుల మధ్య క్షేత్రస్థాయిలో ఇటీవల కొన్ని చోట్ల సమన్వయ లోపం, ఘర్షణ వాతావరణం చోటుచేసుకుంటున్నాయి. ఉమ్మడి గోదావరి జిల్లాల్లోని పలు నియోజకవర్గాల్లో (ఉదాహరణకు: పిఠాపురం, జగ్గంపేట) ఉమ్మడి కార్యాచరణల కోసం నిర్వహిస్తున్న ఆత్మీయ సమావేశాల్లోనే ఇరుపార్టీల స్థానిక ముఖ్య నేతల మధ్య తీవ్ర మాటల యుద్ధం సాగుతోంది.

అలాగే.. ఏలూరు జిల్లా దెందులూరు నియోజకవర్గ పరిధిలోని పైడిచింతపాడులో ప్రభుత్వ పెన్షన్ల పంపిణీ కార్యక్రమం సందర్భంగా టీడీపీ, జనసేన శ్రేణులు పరస్పరం దాడులు చేసుకునే దాకా వెళ్లాయి. స్థానిక జనసేన మద్దతుదారుడైన సర్పంచ్.. టీడీపీ నేతలను సంప్రదించకుండా ఏకపక్షంగా వ్యవహరించారనే ఆరోపణలతో ఈ రెండు పార్టీల కార్యకర్తలు బహిరంగంగా కొట్టుకోవడం కూటమిలో అంతర్గత విభేదాలను బయటపెట్టింది.

గత ఎన్నికల్లో వైఎస్సార్సీపీని ఓడించడమే లక్ష్యంగా ఇరుపార్టీల అధినేతలు చంద్రబాబు, పవన్ కల్యాణ్ కలిసి నడిచారు. అయితే, ఇప్పుడు అధికారం దక్కిన తర్వాత క్షేత్రస్థాయిలో పనులు, కాంట్రాక్టులు, స్థానిక పదవులు, ప్రోటోకాల్ విషయంలో తమకు ప్రాధాన్యం దక్కడం లేదని జనసేన శ్రేణులు.. అలాగే కొన్ని చోట్ల జనసేన పెత్తనాన్ని తట్టుకోలేకపోతున్నామని టీడీపీ ద్వితీయ శ్రేణి నాయకులు అసంతృప్తి వ్యక్తం చేస్తున్నారు.

ఈ చిన్నపాటి గొడవలు కూటమి బంధాన్ని దెబ్బతీయకుండా ఉండేందుకు ఇరుపార్టీల అగ్రనాయకత్వం నష్టనివారణ చర్యలు చేపడుతోంది. రాబోయే ఎన్డీయే సమన్వయ కమిటీ సమావేశాల్లో కూటమిలోని మూడు పార్టీల (TDP, జనసేన, BJP) నేతలు కలిసి కూర్చుని.. స్థానిక ఎన్నికల సీట్ల పంపిణీ, క్షేత్రస్థాయి గొడవలపై చర్చించి ఒక స్పష్టమైన రోడ్‌మ్యాప్ రూపొందించేందుకు ప్రయత్నిస్తున్నారు. ప్రస్తుతానికైతే అధినేతల మధ్య సఖ్యత బాగానే ఉన్నప్పటికీ, గ్రామ, మండల స్థాయి నేతల మధ్య ఆధిపత్య పోరు కూటమికి కొంత ఇబ్బందికరంగా మారింది.