IBM Stock Shock: 58 ఏళ్లలోనే అతిపెద్ద షాక్‌.. ఐబీఎం చరిత్రలోనే భారీ పతనం.. ఒకే రోజులో రూ. 6 లక్షల కోట్ల సంపద ఆవిరి..

IBM Stock Shock: అమెరికాకు చెందిన టెక్నాలజీ దిగ్గజం ఐబీఎం తన సుదీర్ఘ చరిత్రలోనే ఊహించని విధంగా అత్యంత భారీ పతనాన్ని చవిచూసింది. కంపెనీ షేర్లు కేవలం ఒక్క రోజులోనే ఏకంగా 25 శాతం మేర కుప్పకూలడంతో ఇన్వెస్టర్లలో తీవ్ర కలకలం రేగింది. దీనివల్ల కంపెనీ మార్కెట్ విలువ నుండి సుమారు ఆరు లక్షల కోట్ల రూపాయలు ఒక్కసారిగా ఆవిరైపోయాయి. గత 58 ఏళ్ల కాలంలో.. అంటే 1968 తర్వాత ఐబీఎం షేరు విలువ ఈ స్థాయిలో పడిపోవడం ఇదే మొదటిసారి.

జూన్‌తో ముగిసిన రెండో త్రైమాసిక ప్రాథమిక ఫలితాలు మార్కెట్ అంచనాలను అందుకోలేకపోవడం.. మారుతున్న సాంకేతిక మార్కెట్ ధోరణులకు అనుగుణంగా కంపెనీ వేగంగా స్పందించలేకపోవడమే ఈ చారిత్రాత్మక పతనానికి ప్రధాన కారణంగా మారింది. జూన్ త్రైమాసికంలో ఐబీఎం ఆదాయం కేవలం ఒకే ఒక్క శాతం పెరిగి సుమారు 1.48 లక్షల కోట్ల రూపాయలకు చేరగా, కంపెనీకి అత్యంత కీలకమైన ఇన్‌ఫ్రాస్ట్రక్చర్ వ్యాపార ఆదాయం ఏడు శాతం తగ్గిపోయింది. సాఫ్ట్‌వేర్ విభాగం ఐదు శాతం వృద్ధి సాధించినప్పటికీ క్లయింట్ల అంచనాలను అందుకోలేకపోయింది. ఈ వైఫల్యాన్ని కంపెనీ సీఈఓ అరవింద్ కృష్ణ పెట్టుబడిదారులకు రాసిన లేఖలో బహిరంగంగానే అంగీకరిస్తూ.. తాము తగినంత వేగంగా టెక్నాలజీకి అనుగుణంగా మారలేకపోయామని వెల్లడించారు.

ప్రస్తుతం ప్రపంచవ్యాప్తంగా ఆర్టిఫిషియల్ ఇంటెలిజెన్స్ (AI) మౌలిక సదుపాయాల వైపు కార్పొరేట్ పెట్టుబడులు భారీగా మళ్లుతున్నాయి. భవిష్యత్తులో ఏఐ హార్డ్‌వేర్, సర్వర్లు, మెమరీ చిప్‌లు మరియు స్టోరేజ్ పరికరాల ధరలు మరింత పెరుగుతాయనే అంచనాతో జూన్ నెలాఖరులో అనేక కంపెనీలు తమ ఐటీ బడ్జెట్లను వాటి కొనుగోళ్లకే కేటాయించాయి. దీని ప్రభావం వల్ల ఐబీఎంకు అత్యధిక లాభాలు తెచ్చిపెట్టే సాంప్రదాయ మెయిన్‌ఫ్రేమ్ కంప్యూటర్లు మరియు సంబంధిత సాఫ్ట్‌వేర్‌పై క్లయింట్లు తమ వ్యయాన్ని తగ్గించుకున్నారు.

దీనికి తోడు, సరికొత్త ఏఐ సాంకేతికతలతో సైబర్ దాడుల ముప్పు పెరుగుతోందనే ఆందోళన కూడా ఐబీఎం వ్యాపారాన్ని దెబ్బతీసింది. ముఖ్యంగా ఆంథ్రోపిక్ సంస్థ విడుదల చేసిన అత్యంత శక్తివంతమైన ‘మిథోస్’ ఏఐ మోడల్ కంప్యూటర్ నెట్‌వర్క్‌లలోని భద్రతా లోపాలను సులభంగా గుర్తిస్తుందనే వార్తలు కంపెనీలను అప్రమత్తం చేశాయి. ఫలితంగా చాలా సంస్థలు ఐబీఎం అందిస్తున్న కొత్త సాఫ్ట్‌వేర్ ప్రాజెక్టుల కొనుగోళ్లను తాత్కాలికంగా నిలిపివేసి, క్రౌడ్‌స్ట్రైక్, ఒక్టా, నెట్‌స్కోప్ వంటి ప్రత్యేక సైబర్ సెక్యూరిటీ కంపెనీల సేవల వైపు మళ్లాయి.

ఇలాంటి అత్యంత ప్రతికూల పరిస్థితుల్లో కూడా ఐబీఎం అనుబంధ విభాగమైన రెడ్‌హ్యాట్ 11 శాతం ఆదాయ వృద్ధిని నమోదు చేయడం ఒక ఆశాకిరణంగా నిలిచింది. అలాగే మెయిన్‌ఫ్రేమ్‌లకు భిన్నంగా ఉన్న జనరల్ సర్వర్ మరియు స్టోరేజ్ వ్యాపారం ఏకంగా 37 శాతం వృద్ధిని సాధించింది. ఈ విపత్కర పరిస్థితుల నుంచి గట్టెక్కేందుకు మరియు ఓపెన్ సోర్స్ సాఫ్ట్‌వేర్‌లో తలెత్తే తీవ్రమైన భద్రతా లోపాలను తక్షణమే గుర్తించి వాటిని పరిష్కరించేందుకు ఐబీఎం సరికొత్త వ్యూహాన్ని ప్రకటించింది.

దీనిలో భాగంగా సుమారు 43 వేల కోట్ల రూపాయల (5 బిలియన్ డాలర్ల) భారీ పెట్టుబడితో.. 20 వేల మంది సాఫ్ట్‌వేర్ ఇంజనీర్ల బలగంతో కూడిన లైట్‌వెల్ అనే అంతర్జాతీయ భద్రతా కార్యక్రమాన్ని కంపెనీ ప్రారంభించింది. ఈ ప్రతిష్టాత్మక ప్రాజెక్టుకు అమెరికాలోని ప్రముఖ ఆర్థిక సంస్థలైన బ్యాంక్ ఆఫ్ అమెరికా, జేపీ మోర్గాన్ చేజ్, గోల్డ్‌మన్ శాక్స్ వంటి దిగ్గజాలు ఇప్పటికే మద్దతుగా నిలిచాయి. సంక్షోభంలో ఉన్నప్పటికీ ఈ సరికొత్త భద్రతా సంస్కరణల ద్వారా ఐబీఎం రాబోయే రోజుల్లో మార్కెట్లో మళ్లీ పూర్వవైభవాన్ని దక్కించుకోవడానికి ప్రయత్నిస్తోంది.