20 IAS Officers Transfer: ఉత్తర ప్రదేశ్‌లో భారీగా ఐఏఎస్ అధికారుల బదిలీలు.. 20 మందికి స్థానచలనం.. కీలక శాఖల్లో మార్పులు

20 IAS Officers Transfer: ఉత్తర ప్రదేశ్ ప్రభుత్వం పరిపాలనా విభాగంలో భారీ పునర్వ్యవస్థీకరణ చేపట్టింది. ఇందులో భాగంగా కార్యదర్శి, ప్రత్యేక కార్యదర్శి హోదాల్లో ఉన్న ఇరవై మంది ఐఏఎస్ అధికారులను బదిలీ చేస్తూ యోగీ ప్రభుత్వం ఉత్తర్వులు జారీ చేసింది. పలు కీలక శాఖల్లోని సీనియర్ అధికారులకు కొత్త బాధ్యతలు అప్పగించడంతో పాటు అజంగఢ్, బల్లియా, ఎటావా జిల్లాల చీఫ్ డెవలప్‌మెంట్ ఆఫీసర్ల (CDO) పోస్టులలో మార్పులు చేశారు. అలాగే ప్రావిన్షియల్ సివిల్ సర్వీసెస్ (PCS) కేడర్ నుండి ఇటీవల ఐఏఎస్‌గా పదోన్నతి పొందిన పలువురు అధికారులను కూడా కొత్త స్థానాలకు బదిలీ చేశారు.

ఈ పునర్వ్యవస్థీకరణలో భాగంగా వైద్య విద్యాశాఖ, రిజిస్ట్రేషన్ విభాగాల్లో కీలక మార్పులు జరిగాయి. ఇప్పటివరకు రిజిస్ట్రేషన్ ఇన్‌స్పెక్టర్ జనరల్‌గా ఉన్న నేహా శర్మను వైద్య విద్య డైరెక్టర్ జనరల్, వైద్య విద్య కార్యదర్శిగా బదిలీ చేయగా.. ఆ పదవిలో ఉన్న డాక్టర్ సరికా మోహన్‌ను రిజిస్ట్రేషన్ ఇన్‌స్పెక్టర్ జనరల్‌గా నియమించారు. అలాగే రెవెన్యూ కార్యదర్శి పదవిలో ఉన్న సుధా వర్మను లేబర్ కమిషనర్‌గా బదిలీ చేశారు. భూగర్భ శాస్త్ర, గనుల శాఖ అదనపు డైరెక్టర్ జనరల్‌గా పనిచేస్తున్న అరుణ్ కుమార్, ఉత్తర ప్రదేశ్ రాష్ట్ర జీవనోపాధి మిషన్ డైరెక్టర్‌గా నియమితులయ్యారు. జె. రీభా గనుల శాఖలో ప్రత్యేక కార్యదర్శిగా కొనసాగుతూనే, భూగర్భ శాస్త్ర, గనుల శాఖలో అదనపు డైరెక్టర్‌గా అదనపు బాధ్యతలు స్వీకరించారు.

రాష్ట్ర జీవనోపాధి మిషన్ డైరెక్టర్ పదవిలో ఉన్న దీపా రంజన్‌ను సాంస్కృతిక శాఖలో ప్రత్యేక కార్యదర్శిగా బదిలీ చేయగా.. సాంస్కృతిక శాఖ ప్రత్యేక కార్యదర్శిగా ఉన్న సంజయ్ కుమార్‌కు అదనంగా సాంస్కృతిక శాఖ డైరెక్టర్ బాధ్యతలు అప్పగించారు. సాంస్కృతిక శాఖ ప్రత్యేక కార్యదర్శిగా కొనసాగుతున్న విశాల్ సింగ్‌ను సాంస్కృతిక శాఖ డైరెక్టర్ అదనపు బాధ్యతల నుండి తప్పించారు. రాష్ట్ర పన్నుల అదనపు కమిషనర్ పదవి నుండి సందీప్ భగియాను బదిలీ చేసి.. మధ్యంచల్ విద్యుత్ వితరణ నిగమ్ మేనేజింగ్ డైరెక్టర్‌గా నియమించారు.

జిల్లాల ముఖ్య అభివృద్ధి అధికారుల (CDO) బదిలీల విషయానికి వస్తే.. అజంగఢ్ సీడీఓ పరిక్షిత్ ఖటానాను గౌతమ్ బుద్ధ నగర్ రాష్ట్ర పన్నుల అదనపు కమిషనర్‌గా నియమించగా, లక్నో డివిజన్ అదనపు కమిషనర్ రాకేష్ కుమార్ పటేల్‌ను అజంగఢ్ కొత్త సీడీఓగా నియమించారు. బల్లియా సీడీఓ ఓజస్వి రాజ్‌ను మధుర-బృందావన్ మున్సిపల్ కమిషనర్‌గా బదిలీ చేసి, అదనపు జిల్లా మేజిస్ట్రేట్ అలోక్ కుమార్‌ను బల్లియా కొత్త సీడీఓగా నియమించారు.

ఎటావా సీడీఓ అజయ్ కుమార్ గౌతమ్‌ను ఘజియాబాద్-I రాష్ట్ర పన్నుల అదనపు కమిషనర్‌గా నియమించగా.. అదనపు జిల్లా మేజిస్ట్రేట్ (పరిపాలన) సంజయ్ కుమార్ సింగ్‌ను ఎటావా కొత్త సీడీఓగా నియమించారు. ఇతర నియామకాలలో భాగంగా.. పోస్టింగ్ కోసం ఎదురుచూస్తున్న మణికందన్ ఎ.ను రెవెన్యూ కౌన్సిల్‌లో అదనపు భూ నిర్వహణ కమిషనర్‌గా నియమించారు. రాష్ట్ర చక్కెర కార్పొరేషన్ జాయింట్ మేనేజింగ్ డైరెక్టర్ డాక్టర్ వందనా వర్మకు సహకార చక్కెర మిల్లుల సమాఖ్య అదనపు బాధ్యతలను అప్పగించారు.