Gurugram Gun Battle: గురుగ్రామ్‌లో భారీ ఎన్‌కౌంటర్.. 60 రౌండ్ల కాల్పులు, నలుగురు గ్యాంగ్‌స్టర్లు మృతి, ముగ్గురు పోలీసులకు గాయాలు..

Prajapaksham 10 Jul 2026 1 నిమిషాల పఠనం జాతీయం

Gurugram Gun Battle: దేశ రాజధాని ఢిల్లీ సమీపంలోని గురుగ్రామ్‌లో గురువారం రాత్రి పోలీసులు, కరడుగట్టిన నేరస్థుల మధ్య భారీ ఎన్‌కౌంటర్ (Gurugram Encounter) జరిగింది. ఇరు వర్గాల మధ్య సుమారు 60 రౌండ్ల పాటు భీకరంగా కాల్పులు చోటుచేసుకున్నాయి. ఈ ఎదురుకాల్పుల్లో నలుగురు నేరస్థులు మరణించగా.. ముగ్గురు పోలీసులు తీవ్రంగా గాయపడ్డారు. గురుగ్రామ్‌లోని సుశాంత్ లోక్ ఫేజ్ పరిధిలో ఉన్న ఓ ప్రముఖ వ్యాపారి ఇంటి వద్ద ఈ ఘటన జరిగింది.

గురువారం రాత్రి 9.30 గంటల ప్రాంతంలో గురుగ్రామ్ క్రైమ్ బ్రాంచ్ పోలీసులకు ఒక కీలక సమాచారం అందింది. ఒక తెల్లటి స్కార్పియో ఎస్‌యూవీ (Scorpio SUV) లో అత్యాధునిక ఆయుధాలతో కొందరు సాయుధ వ్యక్తులు తిరుగుతున్నట్లు ఇంటెలిజెన్స్ వర్గాలు హెచ్చరించాయి. విదేశాల్లో ఉంటున్న ఒక గ్యాంగ్‌స్టర్ ఆదేశాల మేరకు.. స్థానిక వ్యాపారిని బెదిరించి పెద్ద మొత్తంలో వసూళ్లకు పాల్పడేందుకు ఈ ముఠా అక్కడకు వచ్చినట్లు పోలీసులకు తెలిసింది. పక్కా సమాచారంతో రంగంలోకి దిగిన క్రైమ్ బ్రాంచ్ ప్రత్యేక బృందాలు సుశాంత్ లోక్ ఫేజ్ వద్ద సదరు వ్యాపారి ఇంటి పరిసరాలను చుట్టుముట్టాయి.

అనుమానిత స్కార్పియో వాహనాన్ని అడ్డుకున్న పోలీసులు.. అందులోని నిందితులను ఆయుధాలు కిందపడేసి తక్షణమే లొంగిపోవాలని ఆదేశించారు. అయితే, పోలీసుల హెచ్చరికలను ఖాతరు చేయని నిందితులు తమ వద్ద ఉన్న ఆటోమేటిక్ ఆయుధాలతో పోలీసులపై విచక్షణా రహితంగా తూటాల వర్షం కురిపించారు. ఆకస్మికంగా జరిగిన ఈ దాడికి ఎదురుదెబ్బ కొడుతూ పోలీసులు కూడా ఆత్మరక్షణ కోసం ఎదురుకాల్పులు ప్రారంభించారు. ఈ క్రమంలో ఇరుపక్షాల మధ్య దాదాపు 60 రౌండ్ల పాటు కాల్పులు జరిగాయి.

ఈ కాల్పుల్లో పాల్గొన్న నేరస్థులు మోస్ట్ వాంటెడ్ క్రిమినల్ ‘దీపక్ నందల్’ గ్యాంగ్‌కు చెందిన ప్రధాన షూటర్లుగా పోలీసులు గుర్తించారు. ఎదురుకాల్పుల్లో స్కార్పియోలో ఉన్న ఐదుగురు నిందితులకు తీవ్ర గాయాలయ్యాయి. రక్తం మడుగులో ఉన్న వారిని పోలీసులు తక్షణమే చికిత్స నిమిత్తం సమీపంలోని ఒక ప్రైవేట్ సూపర్ స్పెషాలిటీ ఆసుపత్రికి తరలించారు. అయితే, అప్పటికే నలుగురు నిందితులు మృతి చెందినట్లు వైద్యులు ధృవీకరించారు. ఐదో నిందితుడు ప్రస్తుతం ప్రాణాపాయ స్థితిలో ఆసుపత్రిలో చికిత్స పొందుతున్నాడు.

మరోవైపు, నిందితులు జరిపిన కాల్పుల్లో ముగ్గురు గురుగ్రామ్ పోలీసులకు కూడా గాయాలు అయ్యాయి. వారిని కూడా అదే ఆసుపత్రిలో చేర్చి అత్యవసర చికిత్స అందిస్తున్నారు. ప్రస్తుతం ఘటనా స్థలాన్ని సీనియర్ పోలీస్ అధికారులు సందర్శించి.. ఆ ప్రాంతాన్ని తమ ఆధీనంలోకి తీసుకున్నారు. ఆయుధాల రికవరీతో పాటు కేసు నమోదు చేసి దర్యాప్తును ముమ్మరం చేశారు.