ఎంపీలు, ఎమ్మెల్యేలను సంతలో పశువుల్లా కొంటున్నారు.. దేశ రాజకీయాలపై మాజీ సీఎం అశోక్ గెహ్లాట్ సంచలన వ్యాఖ్యలు..

కాంగ్రెస్ సీనియర్ నేత, రాజస్థాన్ మాజీ ముఖ్యమంత్రి అశోక్ గెహ్లాట్ దేశ రాజకీయ వ్యవస్థపై తీవ్ర ఆందోళన వ్యక్తం చేస్తూ సంచలన వ్యాఖ్యలు చేశారు. ప్రస్తుతం దేశంలో ఎన్నికైన ప్రజాప్రతినిధులను పశువుల మాదిరిగా కొనుగోలు చేస్తూ, అమ్ముతున్నారని ఆయన తీవ్రస్థాయిలో ధ్వజమెత్తారు. గుర్రాలు, గేదెలు, మేకల మాదిరిగా ఎంపీలు, ఎమ్మెల్యేల క్రయవిక్రయాలు సాగిస్తూ ప్రజాస్వామ్య పునాదులను, వ్యవస్థలను పూర్తిగా బలహీనపరుస్తున్నారని ఆయన తన ఆవేదనను పంచుకున్నారు.

మంగళవారం జైపూర్‌లో రాజస్థాన్ రాజకీయ పరిణామాలపై మీడియా ప్రతినిధులు అడిగిన ప్రశ్నలకు స్పందిస్తూ ఆయన ఈ ఘాటైన విమర్శలు చేశారు. ఈ సందర్భంగా పశ్చిమ బెంగాల్‌లో చోటుచేసుకున్న రాజకీయ పరిణామాలను ఆయన ఉదాహరణగా ప్రస్తావించారు. అక్కడ అసెంబ్లీ ఎన్నికల అనంతరం అధికార తృణమూల్ కాంగ్రెస్ (టీఎంసీ) పార్టీలో భారీ ఎత్తున తిరుగుబాటు వచ్చిన విషయాన్ని గుర్తుచేస్తూ, టీఎంసీకి చెందిన 80 మంది ఎమ్మెల్యేలలో దాదాపు 60 మంది, అలాగే 28 మంది ఎంపీలలో 20 మంది పార్టీని వీడి వెళ్లిన ఉదంతాన్ని ఆయన వివరించారు.

ఇదే క్రమంలో రాజస్థాన్‌లో కూడా ‘ఆపరేషన్ లోటస్’ (ప్రభుత్వాలను పడగొట్టే వ్యూహం) జరుగుతోందా? అని మీడియా ప్రతినిధులు ప్రశ్నించగా, “ఆ విషయాలు నా చేత చెప్పించకండి” అంటూ ఆయన పరోక్షంగా అవుననేలా వ్యాఖ్యానించారు. దేశంలో మారుతున్న ఈ రాజకీయ సంస్కృతిపై ప్రజలు ఇప్పటికైనా మేల్కొనకపోతే, ముఖ్యంగా యువతరం ముందుకు వచ్చి ప్రశ్నించకపోతే దేశ భవిష్యత్తు అంధకారమవుతుందని, ఆ దుష్పరిణామాలను ఊహించడం కూడా కష్టమని ఆయన హెచ్చరించారు.

ప్రతిపక్ష నేత రాహుల్ గాంధీ దేశవ్యాప్తంగా చేపట్టిన ‘రాజ్యాంగాన్ని రక్షించండి’ ప్రచారంలో భాగంగా కోటాలో నిర్వహించిన ఒక కార్యక్రమంలో అశోక్ గెహ్లాట్ పాల్గొన్నారు. ఈ సందర్భంగా దేశ రాజకీయాలతో పాటు విద్యార్థులు ఎదుర్కొంటున్న ప్రస్తుత సమస్యలు, ముఖ్యంగా ‘నీట్’ (NEET) వంటి జాతీయ స్థాయి పరీక్షల వల్ల వారిపై పడుతున్న తీవ్రమైన మానసిక ఒత్తిడిపై కూడా తాము కూలంకషంగా చర్చించినట్లు ఆయన పేర్కొన్నారు.