రూ.95 లక్షల కోట్ల సంపదతో అన్ని రికార్డులు బద్దలు కొట్టిన ఎలాన్ మస్క్..ఆస్తి పెరుగుదల వెనుక కారణాలేంటి?

ప్రపంచ ఆర్థిక చరిత్రలోనే ఒక అపూర్వమైన మైలురాయిని అందుకోవడానికి టెస్లా, స్పేస్‌ఎక్స్ అధినేత ఎలాన్ మస్క్ అత్యంత చేరువలో ఉన్నారు. ప్రస్తుత ఆర్థిక విశ్లేషణలు , మార్కెట్ అంచనాలు నిజమైతే, ఆయన ప్రపంచంలోనే మొట్టమొదటి ‘ట్రిలియనీర్’ (1 ట్రిలియన్ డాలర్ల సంపద కలిగిన వ్యక్తి) గా సరికొత్త రికార్డు సృష్టించబోతున్నారు.ప్రస్తుతం ప్రపంచ అగ్రకుబేరుడిగా కొనసాగుతున్న మస్క్ సంపదలో మెజారిటీ భాగం టెస్లా కంపెనీ షేర్ల రూపంలో ఉంది, దీని విలువ సుమారు 273 బిలియన్ డాలర్లుగా ఉంది.

అయితే, ఆయనకు చెందిన ప్రముఖ స్పేస్ రీసెర్చ్ సంస్థ ‘స్పేస్‌ఎక్స్’ (SpaceX) వచ్చే వారం భారీ విలువతో స్టాక్ మార్కెట్‌లో అడుగుపెట్టేందుకు (IPO) సిద్ధమవుతోంది. ఈ ఐపీఓ విజయవంతంగా పూర్తయితే మస్క్ ఖాతాలో అదనంగా మరో 841 బిలియన్ డాలర్లు జతకూరనున్నాయి. ఐపీఓ సమయంలో స్పేస్‌ఎక్స్ మొత్తం మార్కెట్ క్యాపిటలైజేషన్ 1.77 ట్రిలియన్ డాలర్లుగా ఉంటుందని అంచనా వేస్తుండగా, అందులో సగానికి పైగా వాటాలు మస్క్ వద్దే ఉండటమే ఇందుకు కారణం.

దీనితో కేవలం ఈ రెండు కంపెనీల నుంచే ఆయన నికర సంపద దాదాపు 1.11 ట్రిలియన్ డాలర్ల మార్కును సులభంగా దాటనుంది. అయితే ఈ సంపదంతా బ్యాంకులో ఉన్న నగదు కాదని, కంపెనీలలో ఆయనకున్న షేర్ల రూపంలో ఉండే ‘పేపర్ వెల్త్’ మాత్రమేనని, భవిష్యత్తులో ఇన్వెస్టర్ల నమ్మకం , మార్కెట్ హెచ్చుతగ్గులపై ఇది ఆధారపడి ఉంటుందని గమనించాలి.

ఒక ట్రిలియన్ డాలర్లంటే భారత కరెన్సీలో సుమారు 95 లక్షల కోట్ల రూపాయలకు సమానం. ఈ అసాధారణ సంపద విలువ ప్రపంచంలోని అనేక అభివృద్ధి చెందిన దేశాల వార్షిక ఆర్థిక వ్యవస్థ (జీడీపీ) పరిమాణం కంటే చాలా ఎక్కువ కావడం విశేషం. అంతర్జాతీయ ద్రవ్య నిధి (IMF) గణాంకాల ప్రకారం ప్రపంచవ్యాప్తంగా కేవలం 20 దేశాల ఆర్థిక వ్యవస్థలు మాత్రమే 1.1 ట్రిలియన్ డాలర్ల కంటే పెద్దవిగా ఉన్నాయి.

మిగిలిన మెజారిటీ దేశాల జీడీపీ మస్క్ సంపద కంటే తక్కువగానే ఉంది. ఉదాహరణకు తైవాన్ ($977 బిలియన్లు), ఐర్లాండ్ ($779 బిలియన్లు), స్వీడన్ ($760 బిలియన్లు), సింగపూర్ ($660 బిలియన్లు) వంటి బలమైన ఆర్థిక వ్యవస్థలు కలిగిన దేశాల కంటే మస్క్ సంపదే అధికం కానుంది. అంతేకాకుండా, ప్రపంచ ఆర్థిక రాజధానిగా పిలవబడే అమెరికాలోని మాన్‌హట్టన్ వార్షిక ఆర్థిక ఉత్పత్తి ($1 ట్రిలియన్) తో ఇది సమానంగా నిలవనుంది.

మస్క్ అందుకోబోయే ఈ మైలురాయి విలువను తోటి టెక్ బిలియనీర్లతో పోల్చి చూసినప్పుడు మరింత స్పష్టంగా అర్థం చేసుకోవచ్చు. ప్రముఖ కుబేరులైన అమెజాన్ వ్యవస్థాపకుడు జెఫ్ బెజోస్, ఒరాకిల్ అధినేత లారీ ఎల్లిసన్, గూగుల్ సహ వ్యవస్థాపకులు లారీ పేజ్ , సెర్గీ బ్రిన్ వంటి టాప్ బిలియనీర్ల అందరి సంపదను కలిపితే సుమారు 1.09 ట్రిలియన్ డాలర్లు అవుతుంది. అంటే, వీరందరి సంయుక్త ఆస్తి కేవలం మస్క్ ఒక్కడి సంపద కంటే కొంచెమే ఎక్కువ. అలాగే అమెరికాలోని హ్యూస్టన్ నగరంలోని నివాస, వాణిజ్య ఆస్తుల మొత్తం విలువ ($879 బిలియన్లు) కంటే కూడా మస్క్ సంపద ఎక్కువే కావడం గమనార్హం.

ఫోర్బ్స్ జాబితా ప్రకారం ప్రపంచంలోని అత్యంత విలువైన టాప్ 50 స్పోర్ట్స్ జట్ల మొత్తం విలువ కేవలం 353 బిలియన్ డాలర్లు మాత్రమే కాబట్టి, మస్క్ తన సంపదతో ప్రపంచంలోని దాదాపు అన్ని ప్రధాన క్రీడా జట్లను సులభంగా కొనుగోలు చేయగలరు. రాబోయే రోజుల్లో స్పేస్‌ఎక్స్ ఐపీఓ అంచనాలు అనుకున్నట్లుగా సాగితే, ఎలాన్ మస్క్ మానవ వాణిజ్య చరిత్రలోనే ఎన్నడూ లేని విధంగా ఒక సరికొత్త రికార్డును నెలకొల్పడం ఖాయంగా కనిపిస్తోంది.