ఆర్టీసీని ప్రైవేటీకరించే ఆలోచన ప్రభుత్వానికి లేదు..క్లారీటి ఇచ్చిన మంత్రి రాంప్రసాద్ రెడ్డి

ఆంధ్రప్రదేశ్ రవాణా సంస్థ (ఏపీఎస్ఆర్టీసీ) ప్రైవేటీకరణ కాబోతోందంటూ గత కొద్దిరోజులుగా జరుగుతున్న ప్రచారానికి రాష్ట్ర రవాణా శాఖ మంత్రి రాంప్రసాద్ రెడ్డి పూర్తిస్థాయిలో తెరదించారు. ఈ పుకార్ల నేపథ్యంలో తీవ్ర ఆందోళనకు గురైన ఆర్టీసీ కార్మికులు, ఎంప్లాయీస్ యూనియన్ ఆధ్వర్యంలో నిరసనలు చేపట్టారు. ఈ ఆందోళనలకు వైఎస్సార్ కాంగ్రెస్ పార్టీ (వైసీపీ) కూడా మద్దతు తెలపడంతో రాష్ట్రవ్యాప్తంగా ఈ అంశంపై పెద్ద ఎత్తున చర్చ నడిచింది. ఈ వివాదంపై స్పందించిన మంత్రి, ప్రైవేటీకరణ వార్తలను తీవ్రంగా ఖండించారు.

ఆర్టీసీని ప్రైవేటీకరించే ఆలోచన ప్రభుత్వానికి ఎంతమాత్రం లేదని మంత్రి రాంప్రసాద్ రెడ్డి స్పష్టం చేశారు. ఏపీఎస్ఆర్టీసీ ఆర్థికంగా చాలా నిలకడగా ఉందని, సంస్థకు రూ.30 వేల కోట్ల విలువైన భారీ ఆస్తులు ఉన్నాయని ఆయన గుర్తుచేశారు. కార్మికులకు భరోసా ఇవ్వడమే కాకుండా, ప్రయాణికులకు కూడా మంత్రి ఒక తీపి కబురు అందించారు. ప్రస్తుతం ఆర్టీసీ ప్రయాణ ఛార్జీలను పెంచే ఉద్దేశం ప్రభుత్వానికి లేదని ఆయన తేల్చి చెప్పారు.

సంస్థను మరింత ఆధునికీకరించి, పర్యావరణహితంగా మార్చేందుకు ప్రభుత్వం సరికొత్త ప్రణాళికలతో ముందుకు సాగుతోందని మంత్రి వివరించారు. ఇందులో భాగంగా త్వరలోనే కొత్తగా 2,500 ఎలక్ట్రిక్ బస్సులు, అలాగే 500 సీఎన్జీ (CNG) బస్సులను ప్రవేశపెట్టబోతున్నట్లు కీలక ప్రకటన చేశారు.

కూటమి ప్రభుత్వం అధికారంలోకి వచ్చిన నాటి నుంచి ఆర్టీసీని ప్రభుత్వంలో విలీనం చేయడంతో పాటు, గత రెండేళ్లుగా కార్మికులు ఎదుర్కొంటున్న సమస్యలన్నింటినీ ఒక్కొక్కటిగా పరిష్కరిస్తూ వస్తున్నామని మంత్రి గుర్తుచేశారు. కార్మికులు ఎలాంటి ఆందోళనలకు గురికావద్దని, ఆర్టీసీలో ఖాళీగా ఉన్న అవసరమైన ఉద్యోగాలను కూడా త్వరలోనే భర్తీ చేస్తామని మంత్రి రాంప్రసాద్ రెడ్డి ఈ సందర్భంగా హామీ ఇచ్చారు.