BC Caste Census: బీసీ కులగణనలో తప్పులుంటే సరిచేస్తాం.. సీఎం రేవంత్ రెడ్డి కీలక ప్రకటన..

BC Caste Census: తెలంగాణ రాష్ట్రంలో ఇటీవల చేపట్టిన బీసీ కులగణన ప్రక్రియలో తమ సామాజికవర్గ వివరాలు సరిగ్గా నమోదు కాలేదని లేదా పొరపాట్లు జరిగాయని ఎవరైనా భావిస్తే, వారి వివరాలను సవరించి జాబితాలోకి చేర్చేందుకు తమ ప్రభుత్వం సిద్ధంగా ఉందని ముఖ్యమంత్రి ఎనుముల రేవంత్ రెడ్డి స్పష్టం చేశారు. బలహీన వర్గాలకు , బీసీ సామాజిక వర్గాలకు పూర్తిస్థాయిలో సామాజిక న్యాయం చేయడమే తమ కాంగ్రెస్ ప్రభుత్వ ప్రధాన లక్ష్యమని ఉద్ఘాటించారు.

హైదరాబాద్‌లోని రవీంద్రభారతి ప్రాంగణంలో ఘనంగా నిర్వహించిన పండుగ సాయన్న ముదిరాజ్ జయంతి వేడుకల్లో ముఖ్యమంత్రి రేవంత్ రెడ్డి ముఖ్య అతిథిగా పాల్గొని మాట్లాడారు. గడిచిన వందేళ్ల కాలంలో ఏ ప్రభుత్వం చేయని విప్లవాత్మక సాహసాన్ని తమ ప్రభుత్వం చేసి చూపించిందని, అధికారం చేపట్టిన ఏడాది వ్యవధిలోనే పూర్తిస్థాయి కులగణనను నిర్వహించి శాస్త్రీయంగా బీసీల జనాభా లెక్కలను సమాజం ముందుకు తెచ్చామని గుర్తుచేశారు. ఏ కులానికి చెందిన వారైనా తమ జనాభా తక్కువగా లెక్కించబడిందని భావిస్తే సరైన ఆధారాలు , వివరాలను ప్రభుత్వానికి అందించవచ్చని సూచించారు. రాబోయే మంత్రివర్గ (కేబినెట్) సమావేశంలో ఈ అంశంపై సమగ్రంగా చర్చించి, బీసీ జనాభా లెక్కలను మరింత పక్కాగా , పారదర్శకంగా మారుస్తామని వెల్లడించారు.

తన రాజకీయాధికారాన్ని, సీటును బలహీన వర్గాల సంక్షేమానికే వినియోగిస్తానని చెప్పిన సీఎం రేవంత్ రెడ్డి, తన కుర్చీ చుట్టూ బీసీ, ఎస్సీ, ఎస్టీ బలహీన వర్గాల నాయకులను కూర్చోబెట్టుకోవాలన్నదే తన అంతర్గత ఆలోచన అని తెలిపారు. ముదిరాజ్ సామాజికవర్గాన్ని ప్రస్తుతం ఉన్న బీసీ-డీ (BC-D) జాబితా నుంచి బీసీ-ఏ (BC-A) వర్గంలోకి మార్చాలనే సుదీర్ఘకాల డిమాండ్‌పై ఆయన సానుకూలంగా స్పందించారు.

ఈ విషయంపై ముదిరాజ్ సంఘాల నాయకులు న్యాయ నిపుణులతో చర్చించి, రాజ్యాంగబద్ధంగా ఉన్న అవకాశాలను పరిశీలించాలని కోరారు. అలాగే ఈ అంశంలో గంగపుత్ర సామాజికవర్గంలో ఉన్న సందేహాలు, అపోహలను కూడా పరిగణనలోకి తీసుకుని ముందుకు సాగాలని సూచించారు. తమ ప్రభుత్వం అధికారంలోకి వచ్చిన వెంటనే ముదిరాజ్ సామాజికవర్గానికి చెందిన పలువురు నాయకులకు కీలక నామినేటెడ్ పదవులు ఇచ్చామని, మిగిలిన అర్హులైన నాయకులకు కూడా త్వరలోనే తగిన అవకాశాలు కల్పిస్తామని హామీ ఇచ్చారు.

తన రోజువారీ పరిపాలనా శైలిని వివరిస్తూ, ప్రతిపక్ష బీఆర్ఎస్ అధినేత, మాజీ సీఎం కేసీఆర్‌ను ఉద్దేశించి పరోక్షంగా విమర్శలు గుప్పించారు. తనకు ఇంకా చిన్న వయసుతో పాటు కావాల్సినంత ఓపిక, శక్తి ఉన్నాయని, తానేమీ రోజంతా ఫామ్‌హౌస్‌లో పడుకునే రకం కాదని వ్యాఖ్యానించారు. నిరంతరం ప్రజల మధ్య ఉంటూ ప్రజా సంక్షేమం కోసం శ్రమిస్తానని చెప్పారు.

ఇదే వేదికపై నుంచి బహుజన వీరుడు పండుగ సాయన్న జయంతి, వర్ధంతి వేడుకలను ఇకపై ఏటా ప్రభుత్వ అధికారిక ఉత్సవాలుగా నిర్వహిస్తామని ముఖ్యమంత్రి సంచలన ప్రకటన చేశారు. పండుగ సాయన్న కుటుంబానికి ప్రభుత్వం అన్ని విధాలా అండగా నిలుస్తుందని భరోసా ఇచ్చారు. తెలంగాణ సాయుధ పోరాట వీరుడు దొడ్డి కొమురయ్యతో పాటు పండుగ సాయన్న విగ్రహాలను హైదరాబాద్‌లోని చారిత్రాత్మక ట్యాంక్‌బండ్ పరిసర ప్రాంతంలో త్వరలోనే ఘనంగా ఆవిష్కరిస్తామని వెల్లడించారు. బలహీనవర్గాల హక్కుల పరిరక్షణ, వారికి సమాన రాజకీయ, సామాజిక అవకాశాలు కల్పించడంలో తెలంగాణ ప్రభుత్వం ఎల్లప్పుడూ ముందుంటుందని సీఎం రేవంత్ రెడ్డి స్పష్టం చేశారు.