KTR Bus Yatra: ఈ నెల 11 నుంచి కేటీఆర్‌ బస్సు యాత్ర.. 29న దీక్షా దివస్‌ సభ.. 50 వేల మందితో బలప్రదర్శన..

KTR Bus Yatra: తెలంగాణ రాజకీయాల్లో మరోసారి ప్రజాక్షేత్రంలోకి వెళ్లేందుకు బీఆర్‌ఎస్‌ సిద్ధమవుతోంది. రైతులు ఎదుర్కొంటున్న సమస్యలను ప్రధాన అజెండాగా చేసుకుని పార్టీ వర్కింగ్ ప్రెసిడెంట్ కేటీఆర్‌ ఆధ్వర్యంలో ప్రత్యేక బస్సు యాత్రకు ప్రణాళిక సిద్ధం చేసింది. ఈ నెల 11 నుంచి 14వ తేదీ మధ్య రెండు రోజుల పాటు ఈ కార్యక్రమాన్ని నిర్వహించాలని నిర్ణయించినట్లు మాజీ మంత్రి, కరీంనగర్ ఎమ్మెల్యే గంగుల కమలాకర్ వెల్లడించారు.

కరీంనగర్‌లో ఆదివారం జరిగిన పార్టీ ముఖ్య నేతల సమావేశంలో ఈ మేరకు కార్యాచరణపై చర్చించారు. మాజీ మంత్రులు, మాజీ ఎంపీలు, మాజీ ఎమ్మెల్యేలు, ఎమ్మెల్సీలు, ఇతర కీలక నాయకులు ఈ భేటీకి హాజరయ్యారు. పార్టీ భవిష్యత్ కార్యక్రమాలు, రైతుల సమస్యలపై చేపట్టాల్సిన ఉద్యమ కార్యాచరణ, దీక్షా దివస్ వేడుకల నిర్వహణపై నేతలు అభిప్రాయాలు పంచుకున్నారు.

మేడిగడ్డ నుంచి బస్సు యాత్ర ప్రారంభం

రైతులకు సాగునీరు అందించడంలో ఎదురవుతున్న ఇబ్బందులను క్షేత్రస్థాయిలో పరిశీలించడమే ఈ పర్యటన ప్రధాన ఉద్దేశమని గంగుల కమలాకర్ తెలిపారు. మేడిగడ్డ నుంచి యాత్రను ప్రారంభించి గోదావరి నదిపై నిర్మించిన కీలక సాగునీటి ప్రాజెక్టులను సందర్శించేలా మార్గాన్ని రూపొందిస్తున్నట్లు చెప్పారు.

ప్రాజెక్టుల ప్రస్తుత పరిస్థితి, నీటి లభ్యత, వాటి ద్వారా రైతులకు అందాల్సిన ప్రయోజనాలు, క్షేత్రస్థాయిలో నెలకొన్న సమస్యలను ప్రజలకు వివరించనున్నారు. సాగునీటితో పాటు తాగునీరు, విద్యుత్ సరఫరా, గ్రామీణ ప్రాంతాల అవసరాలను కూడా ఈ పర్యటనలో ప్రస్తావించనున్నారు. ప్రభుత్వ విధానాలపై రైతుల అభిప్రాయాలను తెలుసుకుంటూ వారి సమస్యలను రాజకీయ చర్చలోకి తీసుకురావాలని బీఆర్‌ఎస్‌ భావిస్తోంది.

నవంబర్ 29న దీక్షా దివస్ వేడుకలు

తెలంగాణ రాష్ట్ర సాధన పోరాటంలో కీలక ఘట్టంగా నిలిచిన దీక్షా దివస్‌ను ఈసారి భారీ స్థాయిలో నిర్వహించేందుకు పార్టీ ఏర్పాట్లు చేస్తోంది. 2009 నవంబర్ 29న అప్పటి ఉద్యమ నాయకుడు కేసీఆర్‌ను అలుగునూర్ సమీపంలో పోలీసులు అరెస్టు చేసిన ఘటనను గుర్తుచేసుకుంటూ ఈ కార్యక్రమాన్ని నిర్వహించనున్నారు.

ఈ నేపథ్యంలో నవంబర్ 29న కరీంనగర్ జిల్లాలోని మానకొండూరు నియోజకవర్గ పరిధిలో అలుగునూర్ లేదా నుస్తులాపూర్ ప్రాంతంలో భారీ బహిరంగ సభ ఏర్పాటు చేయాలని నిర్ణయించారు. ఈ సభకు దాదాపు 50 వేల మందిని తరలించాలని పార్టీ నాయకత్వం లక్ష్యంగా పెట్టుకుంది. తెలంగాణ ఉద్యమంలో దీక్షా దివస్‌కు ఉన్న చారిత్రక ప్రాధాన్యతను మరోసారి ప్రజలకు తెలియజేయాలని నేతలు భావిస్తున్నారు.

కరీంనగర్ నేతలతో గంగుల సమావేశం

ఈ కార్యక్రమాల నిర్వహణపై కరీంనగర్‌లోని శ్వేతా హోటల్‌లో గంగుల కమలాకర్ అధ్యక్షతన ప్రత్యేక సమావేశం జరిగింది. మాజీ ఎంపీ బోయినపల్లి వినోద్‌కుమార్, మాజీ మంత్రులు టీ. జీవన్‌రెడ్డి, కొప్పుల ఈశ్వర్, ఎమ్మెల్సీ ఎల్. రమణ, మాజీ ఎమ్మెల్సీ నారదాసు లక్ష్మణరావుతో పాటు పలువురు మాజీ ప్రజాప్రతినిధులు, పార్టీ ముఖ్య నాయకులు పాల్గొన్నారు.

బస్సు యాత్రను విజయవంతం చేయడంతో పాటు దీక్షా దివస్ సభకు భారీగా జనసమీకరణ చేపట్టే అంశంపై నేతలకు బాధ్యతలు అప్పగించే దిశగా చర్చలు జరిగినట్లు సమాచారం. రాబోయే కార్యక్రమాల ద్వారా రైతుల సమస్యలను ప్రధాన రాజకీయ అంశంగా మార్చడంతో పాటు పార్టీ శ్రేణుల్లో కొత్త ఉత్సాహం నింపాలని బీఆర్‌ఎస్‌ నాయకత్వం ప్రయత్నిస్తోంది.