స్థిరమైన అటవీ సంరక్షణకు దిక్సూచి జపనీస్ ‘దైసుగి’
– సుధాకర్ ఎవి
జపాన్లోని క్యోటో ప్రాంతంలో పుట్టిన ఈ దైసుగి పద్ధతి, ముఖ్యంగా ‘కిటాయామా సెడార్’ అనే ప్రత్యేకమైన దేవదారు వృక్షాలపై ప్రయోగిస్తారు. జపనీస్ భాషలో ‘దై’ అంటే పీఠం లేదా బల్ల అని, ‘సుగి’ అంటే సెడార్ (దేవదారు) చెట్టు అని అర్థం. అంటే, ఒక పెద్ద తల్లిచెట్టును పీఠంగా మార్చి, దానిపై నుండి అనేక నిటారైన చిన్న చెట్లను (కొమ్మలను) పెంచడమే ఈ విధానం యొక్క ముఖ్య ఉద్దేశం.
14వ శతాబ్దంలో జపాన్లో సాంప్రదాయ ఉద్భవ గృహాల ప్రాచుర్యం పొందింది. ఈ తరహా ఇళ్లకు ఎక్కడా వంకరలు లేని, అత్యంత నిటారైన, మృదువైన కలప స్తంభాలు అవసరమయ్యేవి. అయితే, జపాన్లోని పర్వత ప్రాంతాలలో నిటారైన చెట్లను పెంచడానికి సరిపడా భూమి లేకపోవడం, రవాణా సౌకర్యాలు తక్కువగా ఉండటంతో, అప్పటి అటవీ కార్మికులు ఈ సంక్షోభాన్ని అధిగమించడానికి ఒక సరికొత్త ఉపాయాన్ని ఆలోచించారు. అదే ‘చెట్టును నరకకుండా, కొమ్మలనే చెట్లుగా మార్చడం’.
ఈ పద్ధతి బోన్సాయ్ కళను పోలి ఉంటుంది. కానీ ఇది భారీ స్థాయిలో కలప ఉత్పత్తి కోసం చేసే ప్రక్రియ. మొదట ఒక బలమైన కిటాయామా సెడార్ మొక్కను నాటుతారు. అది కొంత ఎత్తుకు పెరిగిన తర్వాత, దాని పైభాగం మరియు పక్క కొమ్మలను క్రమం తప్పకుండా కత్తిరిస్తారు. నిరంతరం కత్తిరించడం వల్ల ఆ చెట్టు పైకి పెరగడం ఆగిపోయి, దాని కాండం ఒక బలమైన పీఠంలాగా మారుతుంది.
ఈ పీఠం నుండి నిలువుగా పైకి చిగురించే కొమ్మలను మాత్రమే పెరగనిస్తారు. ఇవి ఎలాంటి వంకరలు లేకుండా, నేరుగా ఆకాశంలోకి దూసుకుపోతాయి. ప్రతి 15 నుండి 20 సంవత్సరాలకు ఒకసారి, ఈ పైకి పెరిగిన నిటారైన కొమ్మలను మాత్రమే జాగ్రత్తగా నరికి కలపగా వాడుకుంటారు. మూలంలో ఉన్న తల్లి చెట్టును అలాగే వదిలేస్తారు. ఆ తల్లి చెట్టు సుమారు 200 నుండి 300 సంవత్సరాల పాటు జీవిస్తూ, నిరంతరం కొత్త కలపను అందిస్తూనే ఉంటుంది.
జపాన్ వంటి పర్వత ప్రాంతాలు, ఇరుకైన లోయలు ఎక్కువగా ఉన్న దేశాల్లో సాధారణ పద్ధతిలో విస్తారంగా అడవులను పెంచడం సాధ్యం కాదు. దైసుగి విధానంలో ఒకే ఒక్క తల్లి చెట్టు (మదర్ ట్రీ) కాండంపైనే పదుల సంఖ్యలో నిటారైన కొమ్మలను వృక్షాలుగా పెంచుతారు. దీనివల్ల చాలా తక్కువ స్థలంలోనే అత్యధిక మొత్తంలో కలపను ఉత్పత్తి చేసే వీలు కలుగుతుంది.
ఈ పద్ధతి ద్వారా లభించే కలప, సాధారణ పద్ధతిలో పెరిగే దేవదారు (సెడార్) కలప కంటే దాదాపు రెండు రెట్లు (200%) ఎక్కువ బలాన్ని, దట్టమైన నిర్మాణాన్ని కలిగి ఉంటుంది. ఈ కొమ్మలు ఎక్కడా వంకరలు లేకుండా, గింజలు లేకుండా నేరుగా పైకి ఎదుగుతాయి. అంతేకాకుండా, ఈ కలపకు సుమారు 140% ఎక్కువ సాగే గుణం ఉండటం వల్ల, జపాన్ వంటి భూకంప పీడిత ప్రాంతాలలో తట్టుకుని నిలబడే ఇళ్ల నిర్మాణాలకు, పైకప్పు స్తంభాలకు ఇది అత్యంత ఆదర్శవంతమైనదిగా నిలుస్తుంది.
కలప కావాలంటే దైసుగి విధానంలో మూల వృక్షాన్ని ఎట్టి పరిస్థితుల్లోనూ నరకరు. కేవలం పైకి పెరిగిన కొమ్మలను మాత్రమే క్రమ పద్ధతిలో నరికి తీసుకుంటారు. ఒకసారి కొమ్మలను సేకరించిన తర్వాత, అదే తల్లి చెట్టు నుండి మళ్లీ కొత్త చిగుళ్లు వచ్చి, మరో 15 ఏళ్లలో సరికొత్త కలప సిద్ధమవుతుంది. ఇలా ఒకే చెట్టు సుమారు 200 నుండి 300 సంవత్సరాల పాటు నిరంతరాయంగా కలపను అందిస్తూనే ఉంటుంది.
కాలక్రమేణా ఆధునిక నిర్మాణ సామాగ్రి అందుబాటులోకి రావడం వల్ల జపాన్లో కూడా ఈ దైసుగి పద్ధతి వాడకం కొంతవరకు తగ్గింది. భవిష్యత్తులో స్థిరమైన అటవీ పెంపకానికి ప్రపంచవ్యాప్తంగా ఇటువంటి సాంప్రదాయ పద్ధతులను పునరుద్ధరించాల్సిన అవసరం ఎంతైనా ఉంది.
సంబంధిత వార్తలు
