Data Privacy Case: ఫేస్‌బుక్ మాతృసంస్థ మెటాకు భారీ షాక్.. డేటా ప్రైవసీ కేసులో ఏకంగా 25 బిలియన్ డాలర్ల జరిమానా విధించిన న్యూమెక్సికో కోర్టు..

Data Privacy Case: సోషల్ మీడియా దిగ్గజం మెటా (ఫేస్‌బుక్) కంపెనీకి అమెరికా న్యాయస్థానంలో ఊహించని భారీ షాక్ తగిలింది. వినియోగదారుల డేటా గోప్యత, సమాచార నిర్వహణ విషయంలో యూజర్లను తీవ్రంగా తప్పుదారి పట్టించిందనే ఆరోపణలు నిరూపితం కావడంతో, న్యూ మెక్సికో రాష్ట్ర కోర్టు మెటాకు ఏకంగా 25 బిలియన్ డాలర్ల (దాదాపు రూ.2.1 లక్షల కోట్లు) భారీ జరిమానా విధిస్తూ చారిత్రాత్మక తీర్పు వెలువరించింది.

వినియోగదారుల రక్షణ చట్టాలను మెటా దాదాపు 4.3 కోట్ల సార్లు ఉల్లంఘించిందని జ్యూరీ తేల్చడంతో న్యాయమూర్తి ఫ్రాన్సిస్ మాథ్యూ ఈ నిర్ణయం తీసుకున్నారు. అమెరికా కార్పొరేట్ చరిత్రలోనే ఒక సాంకేతిక కంపెనీపై విధించిన అత్యంత భారీ పెనాల్టీలలో ఒకటిగా ఈ తీర్పు నిలిచింది. ఈ భారీ జరిమానా మొత్తాన్ని న్యూమెక్సికో రాష్ట్ర విద్యా వ్యవస్థ అభివృద్ధికై కేటాయించాలని కోర్టు ఆదేశించింది.

ఈ కేసు మూలాలు 2016 నాటి అమెరికా అధ్యక్ష ఎన్నికల వివాదంతో ముడిపడి ఉన్నాయి. అప్పట్లో బ్రిటన్‌కు చెందిన రాజకీయ కన్సల్టింగ్ సంస్థ ‘కేంబ్రిడ్జి అనలిటికా’ దాదాపు 8.7 కోట్ల మంది ఫేస్‌బుక్ వినియోగదారుల వ్యక్తిగత వివరాలను వారి అనుమతి లేకుండా సేకరించి, డోనాల్డ్ ట్రంప్‌కు అనుకూలంగా రాజకీయ ప్రచారాలకు దుర్వినియోగం చేసిందన్న ఆరోపణలు ప్రపంచవ్యాప్తంగా సంచలనం సృష్టించాయి. కేవలం అమెరికా ఎన్నికలే కాకుండా బ్రిటన్ బ్రెగ్జిట్ రిఫరెండం, భారత్, కెన్యా, నైజీరియా వంటి దేశాల్లో జరిగిన ఎన్నికల్లో కూడా ఈ సంస్థ జోక్యం చేసుకున్నట్లు ఆరోపణలు వచ్చాయి.

ఈ డేటా ఉల్లంఘనలపై న్యూమెక్సికో అటార్నీ జనరల్ రౌల్ టోరెజ్ 2021లో మెటాపై సుదీర్ఘ న్యాయపోరాటం ప్రారంభించారు. థర్డ్ పార్టీ యాప్‌లకు యూజర్ల డేటా యాక్సెస్ ఎలా లభిస్తుందో తెలిసి కూడా కంపెనీ వినియోగదారులకు అబద్ధాలు చెప్పిందని ఆరోపించారు. రాష్ట్ర చట్టాల ప్రకారం ఈ పెనాల్టీ 219 బిలియన్ డాలర్ల వరకు పెరిగే అవకాశం ఉన్నప్పటికీ, న్యాయమూర్తి దానిని 25 బిలియన్ డాలర్లకు పరిమితం చేశారు. గతంలో 2019లో ఇదే వ్యవహారంపై అమెరికా ఫెడరల్ ట్రేడ్ కమిషన్ (FTC) మెటాపై 5 బిలియన్ డాలర్ల జరిమానా విధించిన సంగతి తెలిసిందే.

కోర్టు ఇచ్చిన ఈ తీర్పుపై మెటా తీవ్ర అసంతృప్తి వ్యక్తం చేసింది. ఈ నిర్ణయంపై తాము ఉన్నత న్యాయస్థానంలో అప్పీల్ చేస్తామని, అక్కడ తమకు ఖచ్చితంగా న్యాయం జరుగుతుందని విశ్వాసం వ్యక్తం చేసింది. ఇటువంటి భారీ శిక్షల వల్ల న్యూమెక్సికో రాష్ట్రంలో తమ వంటి వ్యాపార సంస్థలు కార్యకలాపాలు సాగించడం అత్యంత క్లిష్టంగా మారుతుందని వాపోతుంది. కాగా, ప్రస్తుతం మెటా మార్కెట్ విలువ దాదాపు రెండు ట్రిలియన్ డాలర్లకు సమీపంలో ఉన్నందున, ఈ భారీ పెనాల్టీ వల్ల కంపెనీ ఆర్థిక స్థితిపై తక్షణమే పెద్ద ప్రభావం పడకపోయినప్పటికీ, ఇది సుదీర్ఘమైన అప్పీళ్ల ప్రక్రియకు దారితీస్తుందని నిపుణులు విశ్లేషిస్తున్నారు.