Google Pixel 11: గూగుల్ పిక్సెల్ 11 సిరీస్ వివరాలు లీక్… ఆగస్టు 13 లాంచ్ ఈవెంట్, కెమెరా సహా ధరల వివరాలు ఇవే..

స్మార్ట్‌ఫోన్ మార్కెట్‌లో Google రాబోయే ఫ్లాగ్‌షిప్ సిరీస్‌పై ఆసక్తి పెరుగుతోంది. Pixel 11 సిరీస్ విడుదల కోసం వినియోగదారుల ఎదురుచూపులు త్వరలోనే ముగియనున్నాయి. నివేదికల ప్రకారం, ‘Made by Google’ ఈవెంట్ 2026 ఆగస్టు 12న జరగనుంది. భారతదేశంలో ఈ కార్యక్రమం ఆగస్టు 13న తెల్లవారుజామున 3:30 గంటలకు ప్రారంభమవుతుంది. ఈ సిరీస్‌లో Pixel 11, Pixel 11 Pro, Pixel 11 Pro XL, Pixel 11 Pro Fold మోడళ్లను ఆవిష్కరించే అవకాశం ఉంది. అధికారికంగా విడుదల కాకముందే ఈ ఫోన్ల డిజైన్, స్పెసిఫికేషన్లు, ధరలకు సంబంధించిన వివరాలు లీక్ అయ్యాయి.

లీక్ అయిన సమాచారం ప్రకారం, Pixel 11 ఫోన్ Google కొత్త Tensor G6 చిప్‌సెట్‌తో రావచ్చు. ఇది 12GB, 16GB RAM ఆప్షన్లతో పాటు 256GB, 512GB స్టోరేజ్ వేరియంట్లలో లభించే అవకాశం ఉంది. డిస్‌ప్లే విషయానికొస్తే, 120Hz రిఫ్రెష్ రేట్ కలిగిన 6.3 అంగుళాల Actua OLED ప్యానెల్‌ను అందించవచ్చు. భద్రత కోసం ఇందులో Titan M3 సెక్యూరిటీ కో-ప్రాసెసర్‌ను ఉపయోగించనున్నారని, ఇది ఈ ఫ్లాగ్‌షిప్ పరికరానికి మరింత రక్షణ ఇస్తుందని భావిస్తున్నారు.

కెమెరా, బ్యాటరీ ఫీచర్లు ఇవే

ఫోటోగ్రఫీ కోసం Pixel 11లో 48MP మెయిన్ కెమెరా, 13MP అల్ట్రా-వైడ్ సెన్సార్‌లను అందించవచ్చని అంచనా. అలాగే సెల్ఫీలు, వీడియో కాల్స్ కోసం 10.5MP ఫ్రంట్ కెమెరా ఉండవచ్చు. బ్యాటరీ విషయానికొస్తే, ఇందులో 4,985mAh బ్యాటరీని అందించవచ్చని, ఇది 30W వైర్డ్ ఛార్జింగ్, Qi2 వైర్‌లెస్ ఛార్జింగ్‌కు సపోర్ట్ చేస్తుందని నివేదికలు చెబుతున్నాయి. అదనంగా, ఈ స్మార్ట్‌ఫోన్ Android 17 ఆపరేటింగ్ సిస్టమ్‌పై పనిచేస్తుందని, ఇన్-డిస్‌ప్లే ఫింగర్‌ప్రింట్ సెన్సార్ కూడా ఉంటుందని భావిస్తున్నారు.

ధర ఎంతంటే..?

ధరకు సంబంధించిన వివరాలు కూడా వినియోగదారుల్లో ఆసక్తిని పెంచుతున్నాయి. Pixel 11 ప్రారంభ ధర 899 డాలర్లు (సుమారు రూ. 85,500) ఉండవచ్చని నివేదికలు సూచిస్తున్నాయి. Pixel 11 Pro ధర సుమారు 1,099 డాలర్లు (సుమారు రూ. 1.05 లక్షలు), Pixel 11 Pro XL ధర 1,299 డాలర్లు (సుమారు రూ. 1.24 లక్షలు) ఉండవచ్చని అంచనా. ఈ సిరీస్‌లో అత్యంత ఖరీదైన మోడల్ ‘Pixel 11 Pro Fold’ కానుండగా, దీని ధర సుమారు 1,899 డాలర్లు (దాదాపు రూ. 1.81 లక్షలు) ఉండవచ్చు. అయితే, భారత మార్కెట్‌లో అధికారిక ధరలు మారే అవకాశం ఉంది. లాంచ్ సమయంలోనే పూర్తి వివరాలు ఖరారవుతాయి.

ప్రస్తుతం Pixel 11 సిరీస్‌కు సంబంధించి వస్తున్న వార్తలన్నీ లీక్‌లు, నివేదికల ఆధారంగా ఉన్నవే. కాబట్టి వీటిని తుది స్పెసిఫికేషన్లుగా భావించలేము. ధర, కెమెరా, బ్యాటరీ, డిస్‌ప్లే ఇతర ఫీచర్లకు సంబంధించిన అసలు వివరాలు Google అధికారికంగా ప్రకటించిన తర్వాతే తెలుస్తాయి. ఒకవేళ లీక్ అయిన సమాచారం నిజమైతే, Pixel 11 సిరీస్‌లో కొత్త Tensor G6 చిప్‌సెట్, 120Hz డిస్‌ప్లే, మెరుగైన కెమెరా వ్యవస్థ, బ్యాటరీ పనితీరు వంటి కీలక మార్పులు చూడవచ్చు.