New EPFO Rule: పీఎఫ్ ఖాతాదారులకు గుడ్న్యూస్.. నెల, మూడు నెలలు, ఆరు నెలలకు ఒకసారి చెల్లింపులు..
EPF Scheme 2026 Explained: ఈపీఎఫ్ కొత్త నిబంధనలు.. మీ ఖాతాలోని డబ్బును ఈ 7 సందర్భాల్లో పూర్తిగా విత్డ్రా చేసుకోవచ్చు..
New EPFO Rule: ఉద్యోగుల భవిష్య నిధి సంస్థ (ఈపీఎఫ్వో – EPFO) తాజాగా తీసుకున్న నిర్ణయాల ప్రకారం, పదవీ విరమణ తర్వాత పీఎఫ్ సొమ్మును విడతల వారీగా పొందేందుకు సిస్టమాటిక్ విత్డ్రాయల్ ప్రణాళిక (SWP) అమలులోకి వచ్చింది. కేంద్ర కార్మిక, ఉపాధి శాఖ మంత్రి మన్సుఖ్ మాండవీయ అధ్యక్షతన జరిగిన కేంద్ర ట్రస్టీల బోర్డు (సీబీటీ) 240వ సమావేశంలో ఈ నిర్ణయం తీసుకున్నారు.
ఇది పూర్తిగా స్వచ్ఛందమైన సదుపాయం కాగా.. సభ్యులు తమ పీఎఫ్ నిల్వను ఒకేసారి కాకుండా నెలవారీ, త్రైమాసిక లేదా ఆరు నెలల వాయిదాల్లో తీసుకునే వెసులుబాటు కల్పించారు. ఖాతాలో మిగిలిన మొత్తంపై వడ్డీ/రాబడులు కొనసాగుతాయి, అలాగే కేవలం నిల్వపై వచ్చే వడ్డీని మాత్రమే తీసుకునే ఆప్షన్ కూడా అందుబాటులో ఉంది. వాయిదాల చెల్లింపు సమయంలో సభ్యుడు మరణిస్తే, నామినీలు లేదా ఆధారపడిన వారు మిగిలిన సొమ్మును ఒకేసారి తీసుకోవచ్చు లేదా నిర్ణీత కాలం పాటు చెల్లింపులు కొనసాగించవచ్చు. దీంతో పాటు ఉద్యోగుల డిపాజిట్ లింక్డ్ ఇన్సూరెన్స్ పథకం-2026లో సవరణలకు కూడా బోర్డు ఆమోదం తెలిపింది.
మరోవైపు, పీఎఫ్ ఉపసంహరణ నిబంధనలను సడలిస్తూ, నిర్దిష్ట షరతులకు లోబడి 55 ఏళ్లు నిండకముందే అర్హులైన సభ్యులు తమ పీఎఫ్ పొదుపులో 90 శాతం వరకు తీసుకునే అవకాశాన్ని ఈపీఎఫ్వో కల్పించింది. 2026 పీఎఫ్ పథకంలోని సవరించిన నిబంధనల ప్రకారం ఉద్యోగం కోల్పోయిన తర్వాత పీఎఫ్ విత్డ్రాయల్కు వేచిచూడాల్సిన కాలాన్ని 12 నెలల నుంచి రెండు నెలలకు తగ్గించారు. అయితే ప్రతి ఒక్కరూ ఏ కారణానికైనా 90 శాతం తీసుకోవడానికి వీల్లేదని, సభ్యుడి అర్హత, ఉద్దేశం, పథకంలోని పరిమితుల ఆధారంగానే మొత్తం నిర్ణయమవుతుందని, రిటైర్మెంట్ నాటికి కొంత పొదుపు మిగిలేలా ఈ జాగ్రత్తలు తీసుకున్నారని నివేదికలు స్పష్టం చేస్తున్నాయి.
వైద్య చికిత్స, విద్య, సభ్యుడి లేదా కుటుంబ సభ్యుల వివాహం, ఇల్లు లేదా స్థలం కొనుగోలు, గృహ నిర్మాణం, గృహ రుణం చెల్లింపు, ఇంటి మరమ్మతులు వంటి అర్హతగల అవసరాలకు పీఎఫ్ సొమ్మును ఉపసంహరించుకోవచ్చని కథనాలు పేర్కొన్నాయి. వీటితో పాటు పథకంలో నిర్దేశించిన ఇతర ప్రత్యేక పరిస్థితుల్లోనూ సభ్యులు విత్డ్రాయల్కు అర్హులవుతారని, అయితే విభాగాన్ని బట్టి తీసుకునే మొత్తం పరిమితుల్లో మార్పులు ఉండవచ్చని తెలిపాయి.