Konidela Susmitha: విజయవాడ దుర్గగుడి ట్రస్ట్ బోర్డుకు ప్రత్యేక ఆహ్వానితురాలిగా కొణిదెల సుస్మిత నియామకం…

Krishna Rao 08 Sep 2026 1 నిమిషాల పఠనం ఆంధ్రప్రదేశ్

Konidela Susmitha:

Konidela Susmitha: విజయవాడ ఇంద్రకీలాద్రిపై కొలువైన శ్రీ దుర్గామల్లేశ్వర స్వామి వార్ల దేవస్థానం ట్రస్ట్ బోర్డులో ప్రముఖ మెగా డాటర్ సుస్మిత కొణిదెలకు కీలక బాధ్యత దక్కింది. దేవాదాయ శాఖ కార్యదర్శి కన్నబాబు జారీ చేసిన అధికారిక ఉత్తర్వుల మేరకు ఆమెను ఆలయ ట్రస్ట్ బోర్డుకు ప్రత్యేక ఆహ్వానితురాలిగా ప్రభుత్వం నియమించింది. మెగా స్టార్ చిరంజీవి కుమార్తె, సినీ నిర్మాత, ప్రముఖ కాస్ట్యూమ్ డిజైనర్‌గా గుర్తింపు పొందిన సుస్మిత కొణిదెలకు అప్పగించిన బాధ్యతలు ప్రధానంగా ఆలయానికి వచ్చే భక్తులకు అందుతున్న సేవలు, సౌకర్యాల పర్యవేక్షణకు సంబంధించినవిగా ఉన్నాయి. ఇంద్రకీలాద్రికి పెద్ద సంఖ్యలో భక్తులు తరలివచ్చే నేపథ్యంలో మౌలిక వసతులు, ఉచిత వసతి, ప్రసాదాల పంపిణీ, దర్శన ఏర్పాట్లపై ఆమె దృష్టి సారించనున్నారు.

ఆలయ అభివృద్ధికి సంబంధించి చేపట్టే దీర్ఘకాలిక కార్యక్రమాల్లోనూ ఆమె భాగస్వామ్యం కానున్నారు. ముఖ్యంగా దసరా శరన్నవరాత్రి ఉత్సవాలు, భవానీ దీక్షల విరమణ వంటి ప్రధాన ఆధ్యాత్మిక కార్యక్రమాల సమయంలో భక్తుల రద్దీకి అనుగుణంగా ఏర్పాట్లు చేయడంపై బోర్డు, ఆలయ అధికారులకు సూచనలు అందించనున్నారు.

లక్షలాది మంది భక్తులు వచ్చే కీలకమైన పర్వదినాల్లో సేవల నిర్వహణ మరింత సమర్థవంతంగా ఉండేలా చూడటం కూడా ఆమె బాధ్యతల్లో భాగంగా ఉండనుంది. భక్తులకు అందించే సౌకర్యాల నాణ్యతను మెరుగుపరచడమే ఈ నియామకం వెనుక ప్రధాన ఉద్దేశంగా అధికారిక వర్గాలు పేర్కొన్నాయి.

ఇదిలా ఉంటే, తెలుగు రాష్ట్రాల్లో మెగా కుటుంబానికి చెందిన వ్యక్తులకు ఆలయ పాలక వ్యవహారాల్లో ప్రాధాన్యత లభించడం మరోసారి చర్చనీయాంశంగా మారింది. తెలంగాణలోని యాదగిరిగుట్ట లక్ష్మీనరసింహస్వామి దేవస్థానం పాలకమండలిలో చిరంజీవి సతీమణి కొణిదెల సురేఖ ఇప్పటికే సభ్యురాలిగా కొనసాగుతున్నారు.

ఇప్పుడు ఆంధ్రప్రదేశ్‌లోని అత్యంత ప్రముఖమైన ఇంద్రకీలాద్రి దుర్గమ్మ ఆలయ ట్రస్ట్ బోర్డులో సుస్మిత కొణిదెలకు ప్రత్యేక ఆహ్వానితురాలిగా అవకాశం కల్పించడంతో ఈ అంశానికి మరింత ప్రాధాన్యత ఏర్పడింది. ఆలయ నిర్వహణ, భక్తుల సౌకర్యాలు, ప్రత్యేక ఉత్సవాల సమయంలో ఏర్పాట్లకు ఆమె అందించే సూచనలు ట్రస్ట్ బోర్డు కార్యకలాపాల్లో కీలకంగా మారనున్నాయి.