Cyclone Akvan Alert: బంగాళాఖాతంలో పొంచి ఉన్న తీవ్ర తుపాను ముప్పు.. సోమవారం సాయంత్రానికి తుపానుగా రూపాంతరం.. మత్స్యకారులకు అత్యవసర హెచ్చరిక..
బంగాళాఖాతంలో మరో తుఫాన్ ముప్పు.. 19 నాటికి తీవ్ర తుఫాన్గా మారే ఛాన్స్.. ఏపీకి భారీ వర్ష సూచన...
Cyclone Akvan Alert: బంగాళాఖాతంలో వాతావరణం వేగంగా మారుతోంది. ఆగ్నేయ బంగాళాఖాతంలో ఏర్పడిన అల్పపీడనం క్రమంగా బలపడుతూ వాయవ్య దిశగా కదులుతోంది. ఇది సోమవారం సాయంత్రం నాటికి మధ్య బంగాళాఖాతంలో తుపానుగా మారి, ఆ తర్వాత మరింత తీవ్రరూపం దాల్చి ‘తీవ్ర తుపాను’గా బలపడే అవకాశం ఉందని భారత వాతావరణ శాఖ (ఐఎండీ) అంచనా వేసింది. ఈ నేపథ్యంలో సముద్రంలోకి వేటకు వెళ్లిన మత్స్యకారులు తక్షణమే తీరానికి తిరిగి రావాలని అధికారులు అత్యవసర హెచ్చరికలు జారీ చేశారు.
వాతావరణ శాఖ వెల్లడించిన తాజా వివరాల ప్రకారం.. ఆగ్నేయ బంగాళాఖాతంలో ఉన్న అల్పపీడనం ఆదివారం మరింత బలపడి వాయవ్య దిశగా పయనిస్తోంది. సోమవారం సాయంత్రానికి మధ్య బంగాళాఖాతంలో ఇది పూర్తిస్థాయి తుపానుగా రూపాంతరం చెందుతుందని, ఆపై మరింత శక్తిని పుంజుకుని తీవ్ర తుపానుగా మారే సూచనలు ఉన్నాయని అధికారులు స్పష్టం చేశారు. అయితే, ఈ తుపాను కచ్చితంగా ఏ ప్రాంతంలో, ఏ సమయంలో తీరం దాటుతుందనే వివరాలను వాతావరణ శాఖ ఇంకా అధికారికంగా ప్రకటించలేదు.
ఈ ప్రమాదకర హెచ్చరికల నేపథ్యంలో ఇండియన్ కోస్ట్ గార్డ్ పూర్తిస్థాయిలో అప్రమత్తమైంది. సముద్రంలో ఎలాంటి విపత్కర పరిస్థితులనైనా ఎదుర్కొనేందుకు, అవసరమైతే తక్షణమే సహాయక చర్యలు చేపట్టేందుకు తమ నౌకలు, విమానాలు సర్వసన్నద్ధంగా ఉన్నాయని కోస్ట్ గార్డ్ ప్రకటించింది. నవంబర్ 18వ తేదీ వరకు నైరుతి బంగాళాఖాతంలో బలమైన ఈదురుగాలులు వీస్తాయని, సముద్రం అత్యంత అల్లకల్లోలంగా ఉంటుందని ఐఎండీ హెచ్చరించింది.
మరోవైపు, ఈ వాతావరణ వ్యవస్థ ప్రభావంతో పొరుగు రాష్ట్రమైన తమిళనాడులో వర్షాలు కురిసే అవకాశం ఉందని ప్రాంతీయ వాతావరణ కేంద్రం తెలిపింది. ముఖ్యంగా పశ్చిమ కనుమలను ఆనుకుని ఉన్న జిల్లాలు , దక్షిణ తమిళనాడు ప్రాంతాల్లో ఆది, సోమవారాల్లో మోస్తరు వర్షాలు పడతాయని అంచనా వేసింది. రాజధాని చెన్నై నగరంలో ఆదివారం తేలికపాటి జల్లులు కురిసే సూచనలు ఉన్నాయి. తుపాను గమనాన్ని, తీవ్రతను వాతావరణ శాఖ నిపుణులు నిరంతరం నిశితంగా పర్యవేక్షిస్తున్నారు.