ఫోన్ ట్యాపింగ్ కేసులో రాజాసింగ్ సంచలనం.. సజ్జనార్పై ఆరోపణలు, 100 ఎకరాల ఆస్తులపై విచారణకు డిమాండ్…
ఫోన్ ట్యాపింగ్ కేసులో రాజాసింగ్ సంచలనం.. సజ్జనార్పై ఆరోపణలు, 100 ఎకరాల ఆస్తులపై విచారణకు డిమాండ్...
తెలంగాణలో సంచలనం సృష్టించిన ఫోన్ ట్యాపింగ్ వ్యవహారం మరోసారి రాజకీయంగా చర్చనీయాంశంగా మారింది. ఈ కేసు దర్యాప్తు తీరుపై గోషామహల్ ఎమ్మెల్యే రాజాసింగ్ తీవ్ర అసంతృప్తి వ్యక్తం చేశారు. ఈ మేరకు ముఖ్యమంత్రి రేవంత్రెడ్డికి ఆదివారం లేఖ రాశారు. ఫోన్ ట్యాపింగ్ కేసులో పూర్తి స్థాయి విచారణ జరిపించాలని, ఆరోపణలు ఎదుర్కొంటున్న అధికారుల విషయంలో ప్రభుత్వం కఠినంగా వ్యవహరించాలని కోరారు.
కాంగ్రెస్ ప్రభుత్వం అధికారంలోకి వచ్చిన తర్వాత వెలుగులోకి వచ్చిన ఫోన్ ట్యాపింగ్ వ్యవహారంలో పలువురు రాజకీయ నాయకులు, ప్రముఖులు, ఇతర కీలక వ్యక్తుల ఫోన్లను అక్రమంగా పర్యవేక్షించినట్లు ఆరోపణలు వచ్చిన విషయాన్ని రాజాసింగ్ తన లేఖలో ప్రస్తావించారు. ఈ కేసులో ఎఫ్ఐఆర్ నమోదై, పలువురు అధికారుల పేర్లు కూడా తెరపైకి వచ్చినప్పటికీ దర్యాప్తు ఎటువైపు సాగుతోందనే విషయంలో స్పష్టత లేదని అభిప్రాయపడ్డారు.
దర్యాప్తు పారదర్శకంగా జరగాలి
ఫోన్ ట్యాపింగ్ కేసులో సజ్జనార్, రామకృష్ణారావు సహా పలువురు ఉన్నతాధికారుల ప్రమేయంపై ఆరోపణలు వచ్చిన నేపథ్యంలో అన్ని కోణాల్లో విచారణ జరగాలని రాజాసింగ్ డిమాండ్ చేశారు. ముఖ్యంగా అప్పటి పోలీస్ కమిషనర్ సజ్జనార్ పాత్రపై వస్తున్న ఆరోపణలను కూడా పరిశీలించాలని కోరారు. దర్యాప్తు అసలు లక్ష్యం నుంచి పక్కదారి పట్టిందనే అనుమానాలు వ్యక్తమవుతున్నాయని, ప్రజల్లో నెలకొన్న సందేహాలను నివృత్తి చేయాల్సిన బాధ్యత ప్రభుత్వంపై ఉందని పేర్కొన్నారు. ఎలాంటి రాజకీయ ఒత్తిళ్లకు తావులేకుండా స్వతంత్ర దర్యాప్తు చేపట్టాలని సూచించారు.
సజ్జనార్పై చర్యలు ఎందుకు తీసుకోలేదు?
మాజీ సీబీఐ డైరెక్టర్ ఎం. నాగేశ్వరరావు గతంలో సజ్జనార్పై చేసినట్లు ప్రచారంలో ఉన్న తీవ్ర వ్యాఖ్యలను కూడా రాజాసింగ్ తన లేఖలో ప్రస్తావించారు. పోలీసు యూనిఫాం వెనుక దాక్కున్న నేరస్థుడి ప్రవర్తన కలిగిన వ్యక్తిగా ఆయనను అభివర్ణించినట్లు తనకు సమాచారం ఉందని పేర్కొన్నారు. ఇంతటి తీవ్రమైన ఆరోపణలు వచ్చినప్పటికీ సంబంధిత అధికారిపై చట్టపరమైన చర్యలు తీసుకోకుండా కేవలం బదిలీతో సరిపెట్టడం వెనుక కారణమేంటని ప్రశ్నించారు.
మాజీ సీబీఐ డైరెక్టర్ స్థాయి వ్యక్తి ఒక సీనియర్ పోలీసు అధికారిపై ఇలాంటి ఆరోపణలు చేసినప్పుడు ప్రభుత్వం వాటిని తేలిగ్గా తీసుకోకూడదని రాజాసింగ్ అభిప్రాయపడ్డారు. ఆరోపణల్లో వాస్తవాలేమిటో తెలుసుకునేందుకు స్వతంత్రంగా విచారణ జరిపించాలని, గతంలో ఆ అధికారి నిర్వహించిన హోదాలతో సంబంధం లేకుండా చట్టం ప్రకారం చర్యలు తీసుకోవాలని కోరారు.
సజ్జనార్ ఆస్తులపై కూడా విచారణ జరపాలి
మరోవైపు సజ్జనార్ ఆస్తుల వ్యవహారాన్ని కూడా రాజాసింగ్ తన లేఖలో ప్రస్తావించారు. కర్ణాటకలోని ఆయన స్వగ్రామం పరిసర ప్రాంతాల్లో సుమారు 100 ఎకరాల భూమిని కొనుగోలు చేసినట్లు వార్తలు వస్తున్నాయని పేర్కొన్నారు. ఈ నేపథ్యంలో ఆ ఆస్తుల కొనుగోలుకు ఉపయోగించిన డబ్బు ఎక్కడి నుంచి వచ్చిందనే అంశంపై సమగ్ర విచారణ జరగాలని డిమాండ్ చేశారు.
ఆస్తుల యాజమాన్య వివరాలు, నిధుల మూలాలు, ఆర్థిక లావాదేవీలు, ప్రకటించిన ఆదాయంతో ఆస్తుల విలువకు మధ్య ఉన్న వ్యత్యాసాలను పరిశీలించాలని సూచించారు. తెలిసిన ఆదాయ వనరులతో పోలిస్తే ఆస్తుల విలువ సమంజసంగా ఉందా? ఏవైనా నిబంధనల ఉల్లంఘనలు జరిగాయా? అనే అంశాలను ప్రభుత్వం నిగ్గు తేల్చాలని కోరారు.
మొత్తంగా ఫోన్ ట్యాపింగ్ కేసుతో పాటు సంబంధిత అధికారులపై వచ్చిన ఆరోపణలు, ఆస్తుల వ్యవహారాలపైనా సమగ్ర విచారణ జరిపించాలని సీఎం రేవంత్రెడ్డికి రాసిన లేఖలో రాజాసింగ్ డిమాండ్ చేశారు.