Tata Group Row: టాటా గ్రూప్ వివాదంలోకి రాహుల్ గాంధీ.. సంస్థను నాశనం చేస్తున్నారంటూ మోదీ, అమిత్ షాలపై తీవ్ర వ్యాఖ్యలు..

Tata Group Row: దేశంలోనే అత్యంత ప్రతిష్టాత్మకమైన పారిశ్రామిక దిగ్గజం ‘టాటా గ్రూప్’ (Tata Group) అంతర్గత వ్యవహారాలపై కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీ సంచలన వ్యాఖ్యలు చేశారు. టాటా గ్రూప్‌ను పథకం ప్రకారం ‘నేరపూరితంగా నాశనం చేస్తున్నారని’ ఆరోపించిన ఆయన.. ఈ ఆందోళనకర పరిణామాలపై దేశంలోని ఏ వ్యాపారవేత్త కూడా నోరు విప్పడానికి ధైర్యం చేయడం లేదని తీవ్రస్థాయిలో విమర్శించారు. పారిశ్రామికవేత్తలు ఇంకెంతకాలం ఈ విధంగా మౌనంగా ఉంటారని ప్రశ్నిస్తూ.. బుధవారం తన అధికారిక ‘ఎక్స్’ (ట్విట్టర్) ఖాతా వేదికగా ఒక భావోద్వేగభరితమైన పోస్టును విడుదల చేశారు.

టాటా గ్రూప్‌లో జరుగుతున్న పరిణామాలపై దేశీయ పారిశ్రామిక వర్గాలు తమ మౌనాన్ని వీడాలని రాహుల్ గాంధీ పిలుపునిచ్చారు. టాటా గ్రూప్‌ను ధ్వంసం చేస్తున్నా ఏ వ్యాపారవేత్త కూడా మాట్లాడటానికి ధైర్యం చేయడం లేదని, వారు మిమ్మల్ని పూర్తిగా తమ స్వాధీనంలోకి తీసుకునే వరకు వేచి చూస్తారా అని నిలదీశారు. భారత వ్యాపార రంగం అనేది నరేంద్ర మోదీ, అమిత్ షాల చేతుల్లో ఆటబొమ్మ కాదని ఆయన వ్యాఖ్యానించారు. మీకు మాట్లాడే ధైర్యం లేకపోయినా తమకు ఉందని, ఇటువంటి చర్యలకు భవిష్యత్తులో ఖచ్చితంగా న్యాయం జరిగేలా చూస్తామని రాహుల్ తీవ్ర హెచ్చరికలు చేశారు. అయితే, రాహుల్ గాంధీ చేసిన ఈ తీవ్ర ఆరోపణలపై అధికార భారతీయ జనతా పార్టీ (BJP) గానీ, టాటా గ్రూప్ యాజమాన్యం గానీ ఇప్పటివరకు ఎలాంటి అధికారిక వ్యాఖ్య చేయలేదు.

నోయెల్ టాటా వర్సెస్ ఎన్. చంద్రశేఖరన్: టాటా సన్స్, టాటా ట్రస్ట్స్ మధ్య విభేదాలు

దేశంలోని అత్యంత ప్రాచీన పారిశ్రామిక సంస్థ అయిన టాటా గ్రూప్‌లో చోటుచేసుకుంటున్న కీలకమైన యాజమాన్య పరిణామాల నేపధ్యంలో రాహుల్ వ్యాఖ్యలు ప్రాధాన్యం సంతరించుకున్నాయి. గ్రూప్ హోల్డింగ్ కంపెనీ అయిన ‘టాటా సన్స్’ (Tata Sons) , దానిలో ప్రధాన వాటా కలిగిన ‘టాటా ట్రస్ట్స్’ (Tata Trusts) మధ్య తీవ్ర అభిప్రాయ భేదాలు నెలకొన్నాయి. గత సెప్టెంబర్ 17న ఎన్. చంద్రశేఖరన్‌ను టాటా సన్స్ ఎగ్జిక్యూటివ్ ఛైర్మన్‌గా మరో ఐదేళ్ల కాల పరిమితికి పునర్నియమించేందుకు తీసుకున్న నిర్ణయాన్ని టాటా ట్రస్ట్స్ ఛైర్మన్ నోయెల్ టాటా తీవ్రంగా వ్యతిరేకించారు. 2022లో చంద్రశేఖరన్ పునర్నియామకం సమయంలో అనుసరించిన విధానానికి భిన్నమైన రాజ్యాంగపరమైన మార్గాన్ని ఈసారి బోర్డు అనుసరించిందని ఆయన అభ్యంతరం వ్యక్తం చేసినట్లు తెలుస్తోంది.

ఆర్టికల్స్ ఆఫ్ అసోసియేషన్ నిబంధనలపై ఐటీ నిపుణులు, బోర్డు చర్చ

టాటా ట్రస్ట్స్ ప్రతిపాదించిన వాదన ప్రకారం.. టాటా సన్స్ ఛైర్మన్ పునర్నియామకానికి సంబంధించి ట్రస్ట్స్ నామినేట్ చేసిన డైరెక్టర్లలో మెజారిటీ అధికారుల మద్దతు తప్పనిసరిగా ఉండాలి. సదరు మద్దతు లేని పక్షంలో ఛైర్మన్‌కు ఉండే ప్రత్యేక నిర్ణయాత్మక ఓటు హక్కుతో (Casting Vote) ఈ నిబంధనను అధిగమించలేరని ట్రస్ట్స్ స్పష్టం చేస్తున్నాయి. మరోవైపు, టాటా సన్స్ యాజమాన్యం తమ సంస్థ ఆర్టికల్స్ ఆఫ్ అసోసియేషన్‌లోని 104బీ, 118 , 121 నిబంధనలను ప్రాతిపదికగా తీసుకుంటోంది. బోర్డులో ఓట్ల సంఖ్య సమానమైనప్పుడు ఛైర్మన్‌కు తుది నిర్ణయాత్మక ఓటు హక్కు ఉంటుందనే నిబంధనపైనే ప్రస్తుతం రెండు సంస్థల న్యాయ విభాగాలు, వాటాదారుల మధ్య తీవ్రమైన చర్చ నడుస్తోంది.