Cyclone Arnab: అర్నాబ్ తుఫాను బీభత్సం.. ఏపీ, ఒడిశాలో 60కి పైగా రైళ్లు రద్దు.. రేపు యానాం సమీపంలో తీరం దాటనున్న సైక్లోన్..
Four Jump Off Train After Fire Rumour, Killed by Another Train in MP's Morena (Photo-AI Generated Image)
Cyclone Arnab: బంగాళాఖాతంలో ఏర్పడిన ‘అర్నాబ్’ తుఫాను ఆంధ్రప్రదేశ్, ఒడిశా తీర ప్రాంతాల వైపు దూసుకొస్తోంది. భారత వాతావరణ శాఖ (IMD) అంచనాల ప్రకారం.. ఈ తుఫాను అక్టోబర్ 28 ఉదయం బాపట్ల నుంచి విశాఖపట్నం మధ్య యానాం సమీపంలో తీరం దాటే అవకాశం ఉంది. ఆ సమయంలో గంటకు 115 నుంచి 125 కిలోమీటర్ల వేగంతో గాలులు వీయవచ్చని, గరిష్ఠంగా 140 కిలోమీటర్ల వేగంతో ఈదురుగాలులు వీచే ప్రమాదం ఉందని అధికారులు హెచ్చరిస్తున్నారు. దీంతో తీర ప్రాంతాల్లో అప్రమత్తత పెంచారు.
తుఫాను ప్రభావంతో ప్రయాణికుల భద్రతను దృష్టిలో ఉంచుకుని రైల్వే అధికారులు పలు రైళ్లను రద్దు చేశారు. దక్షిణ కోస్తా రైల్వే పరిధిలో మొత్తం 61 రైళ్లపై ప్రభావం పడగా, అక్టోబర్ 27, 28 తేదీల్లోనే ఆంధ్రప్రదేశ్‌లో 53 రైలు సర్వీసులను రద్దు చేసినట్లు నివేదికలు వెల్లడించాయి. విజయవాడ, విశాఖపట్నం, మచిలీపట్నం, నరసాపురం, రాజమండ్రి, కాకినాడ, గుంటూరు తదితర ప్రాంతాలకు వెళ్లే ప్రయాణికులు ఇబ్బందులు ఎదుర్కొనే అవకాశం ఉంది.
ప్రధానంగా రద్దయిన రైళ్లు ఇవే
విశాఖపట్నం–కిరండూల్ నైట్ ఎక్స్‌ప్రెస్ (18515), కిరండూల్–విశాఖపట్నం నైట్ ఎక్స్‌ప్రెస్ (18516) రైళ్లు అక్టోబర్ 29 నుంచి నవంబర్ 4 వరకు రద్దయ్యాయి. విశాఖపట్నం–కోరాపుట్ ప్యాసింజర్ (58538) అక్టోబర్ 27 నుంచి 30 వరకు, కోరాపుట్–విశాఖపట్నం ప్యాసింజర్ (58537) అక్టోబర్ 28 నుంచి 31 వరకు నడవవు.
అలాగే విశాఖపట్నం–కోరాపుట్ ఇంటర్‌సిటీ ఎక్స్‌ప్రెస్ (18512) అక్టోబర్ 30న, కోరాపుట్–విశాఖపట్నం ఇంటర్‌సిటీ ఎక్స్‌ప్రెస్ (18511) అక్టోబర్ 31న రద్దయ్యాయి. విశాఖపట్నం–కిరండూల్ ప్యాసింజర్ (58501), కిరండూల్–విశాఖపట్నం ప్యాసింజర్ (58502) సర్వీసులపైనా రద్దుల ప్రభావం ఉంది.
హిరాఖండ్ ఎక్స్‌ప్రెస్ రూట్‌లో మార్పులు
భువనేశ్వర్–జగదల్‌పూర్ హిరాఖండ్ ఎక్స్‌ప్రెస్ (18447) అక్టోబర్ 27 నుంచి 30 వరకు రాయగడ వద్దే ప్రయాణాన్ని ముగించనుంది. తిరుగు ప్రయాణంలో జగదల్‌పూర్–భువనేశ్వర్ హిరాఖండ్ ఎక్స్‌ప్రెస్ (18448) అక్టోబర్ 28 నుంచి 31 వరకు కోరాపుట్‌కు బదులుగా రాయగడ నుంచి బయలుదేరనుంది.
తీర ప్రాంతాలకు భారీ వర్షాల ముప్పు
తుఫాను కారణంగా ఉత్తరాంధ్ర, కోస్తాంధ్ర ప్రాంతాల్లో భారీ వర్షాలు కురిసే అవకాశం ఉంది. ఒడిశాలోని దక్షిణ తీర ప్రాంతాలపైనా తుఫాను ప్రభావం ఉండనుంది. మత్స్యకారులు సముద్రంలోకి వెళ్లవద్దని అధికారులు సూచించారు. లోతట్టు ప్రాంతాల్లో నివసించే ప్రజలు స్థానిక అధికారుల సూచనలను పాటించాలని, అవసరమైతే సురక్షిత ప్రాంతాలకు తరలివెళ్లాలని హెచ్చరించారు.
రైలు ప్రయాణానికి బయలుదేరే ముందు తమ రైలు నడుస్తుందో లేదో అధికారిక రైల్వే వెబ్‌సైట్ లేదా విచారణ కేంద్రాల ద్వారా నిర్ధారించుకోవాలి. వాతావరణ హెచ్చరికలను గమనిస్తూ అత్యవసరం కాని ప్రయాణాలను వాయిదా వేసుకోవడం మంచిది. తుఫాను తీరం దాటే సమయంలో అప్రమత్తంగా ఉండాలని అధికారులు సూచిస్తున్నారు.
సంబంధిత వార్తలు
