Skip to content
ఆంధ్రప్రదేశ్ › వార్తలు

AP Pension Update: స్థానిక సంస్థల ఎన్నికల ఎఫెక్ట్.. ఏపీలో రెండు రోజుల ముందే ‘ఎన్టీఆర్ భరోసా’ పింఛన్ల పంపిణీ..

jagan 27 Oct 2026 1 నిమిషాల పఠనం ఆంధ్రప్రదేశ్
AP Pension Update: స్థానిక సంస్థల ఎన్నికల ఎఫెక్ట్.. ఏపీలో రెండు రోజుల ముందే ‘ఎన్టీఆర్ భరోసా’ పింఛన్ల పంపిణీ..

AP Pension Update

AP Pension Update: ఆంధ్రప్రదేశ్ ప్రభుత్వం ‘ఎన్టీఆర్ భరోసా’ సామాజిక భద్రత పింఛన్ల లబ్ధిదారులకు కీలకమైన సమాచారాన్ని అందించింది. సాధారణంగా ప్రతి నెలా 1వ తేదీన అందించే పింఛన్లను, ఈసారి స్థానిక సంస్థల ఎన్నికల నేపథ్యంలో రెండు రోజుల ముందే పంపిణీ చేయాలని నిర్ణయించింది. దీని ప్రకారం, వచ్చే నవంబర్ 1వ తేదీకి బదులుగా అక్టోబర్ 30వ తేదీ నుంచే అర్హులైన లబ్ధిదారులకు నగదు పంపిణీ ప్రక్రియ ప్రారంభం కానుంది. రాష్ట్రవ్యాప్తంగా నవంబర్ మొదటి వారంలో స్థానిక సంస్థల ఎన్నికలు జరగనున్నందున లబ్ధిదారులకు ఎలాంటి అసౌకర్యం కలగకుండా చూసేందుకు ప్రభుత్వం ఈ మార్పులు చేసింది.

రాష్ట్రంలో ప్రకటించిన ఎన్నికల షెడ్యూల్ ప్రకారం, నవంబర్ 1న పురపాలక (మున్సిపల్) పోలింగ్, ఆ తర్వాత నవంబర్ 3న జెడ్పీటీసీ, ఎంపీటీసీ ఎన్నికల పోలింగ్ జరగనుంది. సచివాలయ సిబ్బంది , ప్రభుత్వ యంత్రాంగమంతా పోలింగ్ విధుల్లో నిమగ్నమై ఉండే అవకాశం ఉన్నందున, లబ్ధిదారులు ఇబ్బంది పడకూడదనే ఉద్దేశంతో పింఛన్ల పంపిణీ సమయాన్ని ముందుకు జరిపారు. ఈ మేరకు అక్టోబర్ 29వ తేదీ నాటికే పింఛన్లకు అవసరమైన నగదును బ్యాంకుల నుంచి ఉపసంహరించుకుని సిద్ధంగా ఉంచుకోవాలని గ్రామ, వార్డు సచివాలయాల సిబ్బందికి, సంబంధిత బ్యాంకుల మేనేజర్లకు ఉన్నతాధికారులు కీలక ఆదేశాలు జారీ చేశారు.

ఈ నూతన పంపిణీ షెడ్యూల్ ప్రకారం అక్టోబర్ 30న ప్రారంభమయ్యే ఈ ప్రక్రియ నవంబర్ 5వ తేదీ వరకు కొనసాగనుంది. వృద్ధులు, వితంతువులు, దివ్యాంగులు తదితర లబ్ధిదారులందరికీ నగదు సకాలంలో చేరేలా సచివాలయ సిబ్బంది ప్రత్యేక చర్యలు తీసుకోనున్నారు. మున్సిపల్, పరిషత్ పోలింగ్ కారణంగా ఈ నవంబర్ నెలలో మాత్రమే ఈ తాత్కాలిక మార్పు చేశామని, డిసెంబర్ నుంచి మళ్లీ యథావిధిగా ప్రతినెల 1వ తేదీనే లబ్ధిదారుల ఇళ్ల వద్దే పింఛన్లను పంపిణీ చేస్తామని ప్రభుత్వ వర్గాలు స్పష్టం చేశాయి.

ట్యాగ్‌లు: andhra pradesh Chandrababu Naidu