ECI Affidavit in Supreme Court: ఓటర్ల జాబితా సవరణపై సుప్రీంకోర్టులో ఈసీఐ అఫిడవిట్.. నిర్ణయాలన్నీ ఏకగ్రీవమే.. సీఈసీపై ఆరోపణల కొట్టివేత..

ECI Affidavit in Supreme Court: ఓటరు జాబితా ప్రత్యేక సమగ్ర సవరణ (SIR) ప్రక్రియకు సంబంధించి తాము తీసుకున్న నిర్ణయాలన్నీ ముగ్గురు ఎన్నికల కమిషనర్ల సంపూర్ణ ఆమోదంతో ఏకగ్రీవంగా తీసుకున్నవేనని భారత ఎన్నికల సంఘం (ECI) దేశ అత్యున్నత న్యాయస్థానానికి సమర్పించిన ప్రమాణపత్రంలో స్పష్టం చేసింది. ఈ వ్యవహారంలో గతేడాది జూన్, అక్టోబర్ నెలలతో పాటు ఈ ఏడాది మే నెలలో జారీ చేసిన మూడు కీలక ఉత్తర్వులూ సమ్మతితోనే వెలువడ్డాయని సుప్రీంకోర్టుకు సమర్పించిన అఫిడవిట్‌లో నివేదించింది. చట్టపరమైన నిబంధనలకు సంపూర్ణంగా కట్టుబడి ఈ సవరణను అమలు చేశామని.. ఎట్టి పరిస్థితుల్లోనూ విధిబద్ధమైన ఫారం-6ను సవరించలేదని ఎన్నికల సంఘం ధర్మాసనానికి వివరించింది.

ఈ వివాదం నేపథ్యాన్ని పరిశీలిస్తే.. ప్రత్యేక సమగ్ర సవరణ (SIR) వ్యవహారంలో ప్రధాన ఎన్నికల కమిషనర్ (CEC) జ్ఞానేశ్ కుమార్ ఏకపక్షంగా నిర్ణయాలు తీసుకుంటూ, దేశవ్యాప్తంగా లక్షలాది మంది ఓటర్ల పేర్లను జాబితా నుంచి ఇష్టానుసారంగా తొలగిస్తున్నారని ఆరోపిస్తూ లోక్‌సభ ప్రతిపక్ష నేత, కాంగ్రెస్ అగ్రనాయకుడు రాహుల్ గాంధీ సహా మొత్తం 12 మంది విపక్ష నేతలు సుప్రీంకోర్టులో సవాలు చేస్తూ పిటిషన్లు దాఖలు చేశారు. వెంటనే ఈ సవరణ ప్రక్రియను నిలిపివేసేలా ఉత్తర్వులు జారీ చేయాలని కోరారు. ఈ పిటిషన్లపై స్పందన తెలపాలని భారత ప్రధాన న్యాయమూర్తి (CJI) జస్టిస్ సూర్యకాంత్ నేతృత్వంలోని ధర్మాసనం ఈసీఐని ఆదేశించడంతో, మంగళవారం జరగనున్న విచారణకు ముందే ఎన్నికల సంఘం సోమవారం తన సమగ్ర ప్రమాణపత్రాన్ని దాఖలు చేసింది.

పత్రికల్లో వచ్చిన కథనాల ఆధారంగానే విపక్షాలు ఈ పిటిషన్లను దాఖలు చేశాయని పేర్కొంటూ వాటిని కొట్టివేయాలని ఈసీఐ కోరింది. అంతర్గతంగా ఫైళ్లు ఒక కమిషనర్ నుంచి మరొకరికి వెళ్లే క్రమంలో రాసే నోట్లు, వేసే ప్రశ్నలు, ప్రతిపాదించే సూచనలు వ్యక్తిగత అభిప్రాయాలు మాత్రమేనని, వాటిని ఎన్నికల సంఘం అధికారిక నిర్ణయాలుగా పరిగణించకూడదని వివరించింది. ఏవైనా ఉత్తర్వులు జారీ అయ్యే సమయంలో కమిషన్‌లోని అందరి సంతకాలతో నమోదైన అంశాలే తుది నిర్ణయాలుగా అమలులోకి వస్తాయని తేల్చి చెప్పింది. అలాగే ఫారం-6ను సవరించే అధికారం కేవలం కేంద్ర ప్రభుత్వానికే ఉంటుందని, ఆన్‌లైన్ దరఖాస్తు ప్రక్రియను సులభతరం చేసేందుకు ఆన్‌లైన్‌లో మాత్రమే డిక్లరేషన్ కాగితాన్ని వేరుగా జత చేశామని స్పష్టం చేసింది.

జాబితాలో మ్యాపింగ్ కాని ఓటర్లు విచారణల కోసం వ్యక్తిగతంగా అధికారుల వద్దకు రానక్కర్లేదని, బూత్ లెవల్ ఆఫీసర్లే (BLO) స్వయంగా వారి ఇళ్లకు వెళ్లి అవసరమైన పత్రాలను సేకరిస్తారని ఈసీఐ తెలిపింది. ఓటరు నమోదు అధికారి (ERO) ఆదేశాలు లేకుండా సిస్టమ్‌లో ఎలాంటి పేర్ల చేర్పులు గానీ, తొలగింపులు గానీ సాధ్యపడవని, ఈ ప్రక్రియ పారదర్శకంగా సాగేందుకు ఐఐటీ (IIT), ఐఐఎస్సీ (IISc) నిపుణులతో ప్రత్యేక పర్యవేక్షణ కమిటీని కూడా ఏర్పాటు చేసినట్లు పేర్కొంది. సీఈసీని నిలువరించాలని కోరే హక్కు పిటిషనర్లకు లేదని, ఆయనను తొలగించాలంటే రాజ్యాంగబద్ధంగా సుప్రీంకోర్టు న్యాయమూర్తి తొలగింపు ప్రక్రియనే అనుసరించాల్సి ఉంటుందని స్పష్టం చేసింది. సీజేఐ జస్టిస్ సూర్యకాంత్ ధర్మాసనం మంగళవారం ఈ కేసుపై తదుపరి విచారణ కొనసాగించనుంది.