IIT Bombay Student Death Case: విద్యార్థి మృతిపై వివాదం.. క్షమాపణలు చెప్పిన IIT బాంబే.. అసలేం జరిగిందంటే..

jagan 21 Sep 2026 1 నిమిషాల పఠనం క్రైమ్

IIT Bombay ChatGPT Controversy

IIT Bombay Student Death Case: దేశంలోనే అత్యంత ప్రతిష్ఠాత్మకమైన ఇండియన్ ఇన్‌స్టిట్యూట్ ఆఫ్ టెక్నాలజీ (IIT) బాంబేలో బీటెక్ విద్యార్థి సాహిల్ రవీంద్ర వాకోడే ఆత్మహత్య కేసు రోజుకో కొత్త మలుపు తిరుగుతోంది. తీవ్ర వివాదాస్పదంగా మారిన ఈ ఉదంతంలో సంస్థ యాజమాన్యం చివరకు తీవ్ర ఒత్తిడికి తలొగ్గి వెనక్కి తగ్గింది. విద్యార్థి మృతి చెందిన కొత్తలో దర్యాప్తు నిర్వహించకుండానే తొందరపడి చేసిన ప్రకటనల పట్ల యాజమాన్యం అధికారికంగా బహిరంగ క్షమాపణలు కోరింది.

గత శుక్రవారం బి.టెక్ ద్వితీయ సంవత్సరం విద్యార్థి సాహిల్ రవీంద్ర వాకోడే పవాయి క్యాంపస్‌లోని తన హాస్టల్ గదిలో విగతజీవిగా కనిపించిన సంగతి తెలిసిందే. మిడ్-సెమిస్టర్ పరీక్షలో మొబైల్ ఫోన్, చాట్‌జీపీటీ (ChatGPT) ఉపయోగిస్తూ పట్టుబడిన కొద్ది గంటల్లోనే అతను ఈ తీవ్ర నిర్ణయం తీసుకోవడం దేశవ్యాప్తంగా కలకలం రేపింది. అయితే విద్యాసంస్థలో ఎదుర్కొన్న తీవ్రమైన సంస్థాగత వేధింపులు, కుల వివక్ష కారణంగానే తమ కుమారుడు ప్రాణాలు తీసుకున్నాడని సాహిల్ కుటుంబ సభ్యులు సంచలన ఆరోపణలు చేశారు. ఈ మేరకు బాధ్యులపై ఎస్సీ, ఎస్టీ అట్రాసిటీ చట్టం, ఆత్మహత్యకు ప్రేరేపించిన నిబంధనల కింద కేసులు నమోదు కావడం, విద్యార్థి సంఘాలు క్యాంపస్‌లో భారీ ఎత్తున నిరసన ప్రదర్శనలు చేపట్టడంతో పవాయి ప్రాంగణంలో తీవ్ర ఉద్రిక్త పరిస్థితులు నెలకొన్నాయి.

క్యాంపస్‌లో పెల్లుబికిన నిరసనలు, కుటుంబ సభ్యుల ఆరోపణల నేపథ్యంలో ఐఐటీ బాంబే ‘ఎక్స్’ (ట్విట్టర్) వేదికగా ఒక సుదీర్ఘ ప్రకటన విడుదల చేసింది. సాహిల్ మృతికి ముందు చోటుచేసుకున్న సంఘటనలను పూర్తిస్థాయి దర్యాప్తు ద్వారా నిర్ధారించకుండానే ముందస్తుగా వెల్లడించడం ఎంతమాత్రం సరికాదని అంగీకరించింది. ఈ విషాదకర పరిస్థితులకు దారితీసిన కారణాలపై దర్యాప్తు అధికారులు విచారణ జరుపుతున్నారని.. గతంలో తాము చేసిన వ్యాఖ్యలకు విచారం వ్యక్తం చేస్తూ బహిరంగంగా క్షమాపణలు చెబుతున్నామని పేర్కొంది.

అదే సమయంలో, ఈ వివాదం కారణంగా ఐఐటీ బాంబే డైరెక్టర్ ప్రొఫెసర్ శిరీష్ కేదారే తన పదవికి రాజీనామా చేశారంటూ సోషల్ మీడియాలో వస్తున్న వార్తలను యాజమాన్యం ఖండించింది. ఆ ప్రచారంలో ఎలాంటి వాస్తవం లేదని స్పష్టం చేసింది. అయితే, సాహిల్ పరీక్ష రాస్తున్న సమయంలో ఇన్విజిలేటర్‌గా వ్యవహరించిన ప్రొఫెసర్ సూర్యనారాయణ దూళ్లను డీన్ ఆఫ్ స్టూడెంట్స్ వెల్ఫేర్ (DoSWA) బాధ్యతల నుంచి అధికారులు తక్షణమే తప్పించారు.

ఈ కేసు తీవ్రతను దృష్ట్యా ముంబై క్రైమ్ బ్రాంచ్ రంగంలోకి దిగి సమగ్ర దర్యాప్తును వేగవంతం చేసింది. ఘటనా స్థలంలో ఎలాంటి ఆత్మహత్య లేఖ లభించకపోవడంతో, సాహిల్ డిజిటల్ పరికరాలు మరియు మొబైల్ ఫోన్‌లోని సమాచారాన్ని పోలీసులు క్షుణ్ణంగా పరిశీలిస్తున్నారు. విద్యాసంస్థలోని అకడమిక్ కమిటీలలో విద్యార్థులకు భాగస్వామ్యం కల్పించడంతో పాటు, క్యాంపస్‌లో వివక్ష నిరోధక చర్యలు చేపట్టాలని కోరుతూ విద్యార్థి సంఘాల ప్రతినిధులతో యాజమాన్యం ప్రస్తుతం చర్చలు జరుపుతోంది.