Badlav Zaroori Hai: ఢిల్లీ రామ్‌లీలా మైదానంలో సీపీఐ ‘బద్లావ్ జరూరీ హై’ సమరభేరి సక్సెస్: బీజేపీని గద్దె దించడమే లక్ష్యం – పల్లా వెంకట్ రెడ్డి

దేశవ్యాప్తంగా వేలాదిగా తరలివచ్చిన సీపీఐ శ్రేణులను ఉద్దేశించి తెలంగాణ సీపీఐ నాయకులు, మాజీ ఎమ్మెల్యే పల్లా వెంకట్ రెడ్డి ప్రసంగించారు. కేంద్రంలోని బీజేపీ ప్రభుత్వ ప్రజావ్యతిరేక విధానాలను తీవ్రస్థాయిలో ఎండగడుతూ, దేశ రక్షణ కోసం బీజేపీని గద్దె దించాల్సిందేనని ఆయన పిలుపునిచ్చారు.

Badlav Zaroori Hai: దేశ రాజధాని ఢిల్లీలోని చారిత్రాత్మక రామ్‌లీలా మైదానంలో కమ్యూనిస్ట్ పార్టీ ఆఫ్ ఇండియా (సీపీఐ) ఆధ్వర్యంలో నిర్వహించిన ‘బద్లావ్ జరూరీ హై’ జాతీయ స్థాయి బహిరంగ సభ అత్యంత ఉత్సాహపూరిత వాతావరణంలో ఘనంగా జరిగింది. దేశవ్యాప్తంగా వేలాదిగా తరలివచ్చిన సీపీఐ శ్రేణులను ఉద్దేశించి తెలంగాణ సీపీఐ నాయకులు, మాజీ ఎమ్మెల్యే పల్లా వెంకట్ రెడ్డి ప్రసంగించారు. కేంద్రంలోని బీజేపీ ప్రభుత్వ ప్రజావ్యతిరేక విధానాలను తీవ్రస్థాయిలో ఎండగడుతూ, దేశ రక్షణ కోసం బీజేపీని గద్దె దించాల్సిందేనని ఆయన పిలుపునిచ్చారు.

ఈ సందర్భంగా పల్లా వెంకట్ రెడ్డి మాట్లాడుతూ… “మనమందరం గ్రామాల నుండి ‘బద్లావ్ జరూరీ హై’ అనే నినాదంతో ఇక్కడికి కదిలి వచ్చాం. ఇది ప్రజలను చాలా ఆకర్షించిన నినాదం, నిర్ణయం. మన జాతీయ పార్టీ పిలుపుతో, మన కేడర్ అంతా గ్రామాల నుండి కదిలి బ్రహ్మాండమైన రాజకీయ ప్రచారం నిర్వహించారు. ఈ రోజు దేశ రాజధాని ఢిల్లీలో నరేంద్ర మోదీకి వ్యతిరేకంగా మన డిమాండ్లతో ప్రచారం చేస్తున్నాం. ఇవాళ భారతీయ జనతా పార్టీని గద్దె దించి, మార్పు తీసుకురావడం కచ్చితంగా అవసరం. అది తప్పనిసరిగా సాధ్యమే! రాబోయే రోజుల్లో బీజేపీ పోతుంది, ఆ చైతన్యం, ఆ ఉత్సాహంతో మన జనం ఉన్నారు” అని ధీమా వ్యక్తం చేశారు.

ప్రజాస్వామ్యవాదులు, భారత కమ్యూనిస్ట్ పార్టీ నాయకత్వంలో వామపక్ష పార్టీలు భారతదేశాన్ని కాపాడే ప్రయత్నం చేస్తున్నాయని ఆయన తెలిపారు. ఈ మార్పు సాధ్యమే అనే అభిప్రాయాన్ని ప్రజల్లో మన ప్రచారం ద్వారా కలిగించాలన్నారు. అన్ని వర్గాల ప్రజల సమస్యలు, కార్మిక సమస్యలు, వ్యవసాయ కార్మికుల సమస్యలు, మహిళా సమస్యలు, విద్యార్థి, యువజన సమస్యలు పరిష్కారం కావాలని డిమాండ్ చేశారు. ఇటీవల జరిగిన పేపర్ లీకేజీల వల్ల విద్యార్థుల్లో తీవ్ర అసంతృప్తి రగిలిందని, ఆ ప్రభావం వల్లనే కేంద్ర మంత్రులు తప్పుకోవాల్సి వచ్చిందని గుర్తుచేశారు. బీహార్‌లో కూడా మార్పు ప్రారంభమైందని, బీజేపీ తన జాతీయ అధ్యక్షుడిని మార్చే పరిస్థితి వచ్చిందని పేర్కొన్నారు.

నరేంద్ర మోదీ, అమిత్ షా అందరూ కలిసి అధికారాన్ని నిలబెట్టుకోవడానికి ప్రయత్నిస్తున్నారని విమర్శిస్తూ… “వాళ్లది ఒక రాజకీయ పార్టీ కాదు, ఒక నియంతృత్వ పార్టీ. వాళ్లకు మెజారిటీ వస్తే రాజ్యాంగాన్ని మార్చేయాలని శతవిధాలా ప్రయత్నిస్తున్నారు. పార్లమెంటులో రాజ్యాంగాన్ని మార్చడానికి 2/3వ వంతు మెజారిటీ రావాలని చూస్తున్నారు. అందుకోసం రకరకాల రాజకీయ ఆటలు ఆడుతున్నారు, వేరే వాళ్ల మద్దతు తీసుకుంటున్నారు. ‘ఇండియా’ కూటమి రాజకీయాలను దెబ్బతీయాలని చూస్తున్నారు. ‘ఇండియా’ కూటమికి, వామపక్ష పార్టీలకు అనుకూలంగా ఉన్న ప్రాంతీయ పార్టీలను విడగొట్టాలని చూస్తున్నారు” అని ఆగ్రహం వ్యక్తం చేశారు.

అలాగే పార్లమెంటులో మహిళా బిల్లును తీసుకొచ్చారు కానీ అది ఏమాత్రం అమలు కావట్లేదని, పార్లమెంటులో ఆ మహిళా బిల్లు అమలు కోసం సరైన ప్రొసీజర్ పాటించాల్సిన అవసరం ఉందని స్పష్టం చేశారు. వాళ్లకు పార్లమెంటులో టూ థర్డ్ మెజారిటీ వస్తే, మళ్లీ బీజేపీ గెలిస్తే రాజ్యాంగాన్ని పూర్తిగా మార్చేయాలని చూస్తున్నారని, అలా జరిగితే భారతదేశ భవిష్యత్తు ప్రమాదంలో పడుతుందని హెచ్చరించారు. దానికి వ్యతిరేకంగా దేశ ప్రజలందరూ సముచిత నిర్ణయం తీసుకోవాలని కోరారు.

అందుకే మన కమ్యూనిస్ట్ పార్టీ కార్యకర్తలు, మన జాతీయ ప్రధాన కార్యదర్శి డి. రాజా గారు చెప్పినట్లు ఈ బీజేపీ ప్రభుత్వాన్ని మార్చడం కచ్చితంగా అవసరమని పునరుద్ఘాటించారు. దీనికోసం అవసరమైతే డిసెంబర్‌లో ‘జైలు భరో’ కార్యక్రమానికి పిలుపునిచ్చామని, జైలుకు వెళ్లడానికైనా సిద్ధపడాలని శ్రేణులను కోరారు. మన పార్టీ కేడర్ అంతా అదే ఉత్సాహంతో గ్రామగ్రామాన ఉద్యమించాలని, ప్రజాపోరాటాలను తీవ్రతరం చేయాలని పిలుపునిస్తూ ‘సీపీఐ జిందాబాద్’, ‘ఇంక్విలాబ్ జిందాబాద్’ అంటూ తమ ప్రసంగాన్ని ముగించారు.