YouTube New Rules: వీడియో ఓపెన్ చేస్తే చాలు.. యూట్యూబ్‌లో వెంటనే వ్యూ కౌంట్..ఆగస్టు 24 నుంచి YouTubeలో కొత్త రూల్..

Prajapaksham 18 Aug 2026 1 నిమిషాల పఠనం బిజినెస్

Youtube

YouTube New Rules: ప్రముఖ వీడియో స్ట్రీమింగ్ ప్లాట్‌ఫామ్ యూట్యూబ్ క్రియేటర్లకు కీలక ప్రకటన చేసింది. ఇకపై వీడియో వ్యూస్ లెక్కింపు విధానంలో మార్పులు తీసుకురానుంది. కొత్త విధానం ప్రకారం.. ఏ ఫార్మాట్‌కు చెందిన వీడియో అయినా ప్లే కావడం ప్రారంభమైన వెంటనే.. అంటే తొలి ఫ్రేమ్ కనిపించిన క్షణం నుంచే దాన్ని ఒక పబ్లిక్ వ్యూ గా పరిగణించనుంది. లాంగ్ వీడియోలు, లైవ్ స్ట్రీమ్‌లు, షార్ట్స్‌కు వేర్వేరు వ్యూ కౌంటింగ్ విధానాలు ఉండటంతో ఏర్పడుతున్న గందరగోళాన్ని తొలగించేందుకు ఈ మార్పు చేస్తున్నట్లు యూట్యూబ్ తెలిపింది.

ఇప్పటివరకు యూట్యూబ్‌లో వివిధ రకాల కంటెంట్‌కు వ్యూస్ లెక్కించే విధానంలో తేడాలు ఉండేవి. ముఖ్యంగా షార్ట్స్, సాధారణ వీడియోలు, లైవ్ కంటెంట్ విషయంలో వ్యూ ఎప్పుడు నమోదవుతుందనే అంశంపై క్రియేటర్లలో సందేహాలు ఉండేవి. కొత్త విధానంతో అన్ని ఫార్మాట్లకు వీలైనంత వరకు ఒకే విధమైన పబ్లిక్ వ్యూ కౌంటింగ్ విధానాన్ని తీసుకురావాలని యూట్యూబ్ నిర్ణయించింది.

కొత్త విధానంలో వీడియో ప్లేబ్యాక్ ప్రారంభమై తొలి ఫ్రేమ్ కనిపించిన వెంటనే అది పబ్లిక్ వ్యూగా నమోదవుతుంది. దీంతో ఒక వీడియోకు గతంలో కంటే వేగంగా పబ్లిక్ వ్యూస్ పెరిగే అవకాశం ఉంది. ముఖ్యంగా ఎక్కువ సంఖ్యలో వీడియోలు ప్రచురించే క్రియేటర్లు, షార్ట్స్ తయారు చేసే వారికి ఈ మార్పు గణనీయమైన తేడాను చూపించే అవకాశం ఉంది. అయితే ఇక్కడ ఒక ముఖ్యమైన విషయాన్ని క్రియేటర్లు గుర్తుంచుకోవాలి. పబ్లిక్ వ్యూస్ పెరగడం అంటే ప్రేక్షకులు వీడియోను పూర్తిగా చూశారని అర్థం కాదు. వీడియో ప్లే అయిన వెంటనే ఒక వ్యూ నమోదైనా.. ప్రేక్షకుడు ఆ తర్వాత ఎంతసేపు వీడియోను చూశాడు, ఎక్కడి వరకు చూశాడు వంటి వివరాలు వేరుగా ఉంటాయి.

ఎంగేజ్డ్ వ్యూస్ డేటా కూడా అందుబాటులోనే..

ప్రేక్షకులు వీడియోను నిజంగా ఎంతవరకు వీక్షించారనే విషయాన్ని తెలుసుకోవడానికి యూట్యూబ్ అనలిటిక్స్‌లో Engaged Views అనే డేటాను అందుబాటులో ఉంచనుంది. దీంతో క్రియేటర్లు కేవలం పబ్లిక్ వ్యూస్ సంఖ్యను మాత్రమే కాకుండా, తమ కంటెంట్‌ను ప్రేక్షకులు ఎంతవరకు ఆసక్తిగా వీక్షిస్తున్నారనే విషయాన్ని కూడా విశ్లేషించుకోవచ్చు.

ఉదాహరణకు ఒక వీడియోకు లక్ష పబ్లిక్ వ్యూస్ వచ్చినప్పటికీ.. ప్రేక్షకుల్లో చాలామంది వీడియో ప్రారంభమైన వెంటనే బయటకు వెళ్లిపోయారా? లేక ఎక్కువసేపు చూశారా? అనే విషయాన్ని అర్థం చేసుకోవడానికి ఎంగేజ్డ్ వ్యూస్, ఇతర అనలిటిక్స్ మెట్రిక్స్ కీలకంగా ఉంటాయి.

క్రియేటర్ల ఆదాయంపై ప్రభావం ఉంటుందా?

ఈ మార్పుపై క్రియేటర్లలో ప్రధానంగా తలెత్తే ప్రశ్న ఇదే. పబ్లిక్ వ్యూస్ లెక్కింపు మారడంతో తమ ఆదాయం లేదా యూట్యూబ్ పార్ట్‌నర్ ప్రోగ్రామ్ (YPP) అర్హతపై ప్రభావం ఉంటుందా అనే సందేహం సహజం. అయితే యూట్యూబ్ స్పష్టత ప్రకారం.. ఈ మార్పు ప్రధానంగా పబ్లిక్ వ్యూ కౌంట్ కు సంబంధించినది. క్రియేటర్ల మానిటైజేషన్, ఆదాయ లెక్కలు లేదా YPP అర్హతలను కేవలం ఈ కొత్త పబ్లిక్ వ్యూ కౌంట్ ఆధారంగా నిర్ణయించరు.

మానిటైజేషన్‌కు సంబంధించిన లెక్కింపుల్లో Qualified Shorts Views, Qualified Watch Hours వంటి ప్రత్యేక ప్రమాణాలకు ప్రాధాన్యం ఉంటుంది. అందువల్ల పబ్లిక్ వ్యూస్ సంఖ్య ఒక్కసారిగా పెరిగినంత మాత్రాన క్రియేటర్ ఆదాయం కూడా అదే నిష్పత్తిలో పెరుగుతుందని భావించకూడదు.

క్రియేటర్లకు ఏం మారుతుంది?

కొత్త విధానం వల్ల ప్రధానంగా వీడియో పనితీరును ప్రజలకు కనిపించే విధంగా చూపించే సంఖ్య మారుతుంది. వీడియో ప్లే ప్రారంభమైన వెంటనే వ్యూ నమోదవుతుండటంతో పబ్లిక్ వ్యూ కౌంట్ వేగంగా పెరగవచ్చు. దీంతో వీడియోల మధ్య వ్యూస్ పోల్చేటప్పుడు క్రియేటర్లు కొత్త లెక్కింపు విధానాన్ని దృష్టిలో పెట్టుకోవాల్సి ఉంటుంది.

అదే సమయంలో యూట్యూబ్ అనలిటిక్స్‌లోని ఇతర మెట్రిక్స్ మరింత ముఖ్యంగా మారనున్నాయి. వ్యూస్‌తో పాటు ప్రేక్షకుల నిలుపుదల (Audience Retention), వీక్షణ సమయం, ఎంగేజ్డ్ వ్యూస్ వంటి గణాంకాలను పరిశీలిస్తేనే ఒక వీడియో నిజంగా ఎంతవరకు విజయవంతమైందో అర్థం చేసుకోవచ్చు.

మొత్తంగా చూస్తే.. యూట్యూబ్ తీసుకొస్తున్న ఈ మార్పు పబ్లిక్ వ్యూ కౌంట్‌ను సరళీకృతం చేయడమే లక్ష్యంగా పెట్టుకుంది. ఇకపై వీడియో ప్లే కావడం ప్రారంభమైన వెంటనే పబ్లిక్ వ్యూగా పరిగణించే విధానం అమల్లోకి రానుంది. అయితే క్రియేటర్ల ఆదాయం, మానిటైజేషన్, YPP అర్హతలను అంచనా వేయడంలో మాత్రం ప్రత్యేక అర్హత ప్రమాణాలే కీలకంగా కొనసాగనున్నాయి.