Stock Market Today: ఒకే ఒక్క వార్తతో కుప్పకూలిన స్టాక్ మార్కెట్.. సూచీల పతనానికి 3 కారణాలు ఇవే..

Prajapaksham 07 Aug 2026 1 నిమిషాల పఠనం బిజినెస్

Stock Market (Photo Shutter Stock)

మధ్యాహ్నం 2 గంటల తర్వాత భారత స్టాక్ మార్కెట్‌లో అమ్మకాల ఒత్తిడి ఒక్కసారిగా పెరగడంతో నిఫ్టీ సుమారు 125 పాయింట్లు కోల్పోయింది. మార్కెట్ పతనానికి ప్రధానంగా మూడు అంశాలు కారణమైనట్లు మార్కెట్ విశ్లేషకులు చెబుతున్నారు.

Stock Market Today: ఈ వారంలో ఎక్కువ రోజులు సానుకూల ధోరణితో పయనించిన భారత స్టాక్ మార్కెట్లు.. చివరి రోజైన శుక్రవారం తీవ్ర ఒత్తిడికి లోనయ్యాయి. వారం ఆరంభం నుంచి సూచీలు లాభాల బాటలోనే పయనించినప్పటికీ, ముగింపు సెషన్‌లో ఇన్వెస్టర్లు లాభాల స్వీకరణకు (ప్రాఫిట్ బుకింగ్) మొగ్గు చూపడం, అంతర్జాతీయంగా తలెత్తిన భౌగోళిక రాజకీయ అనిశ్చితులు మార్కెట్లపై తీవ్ర ప్రభావం చూపాయి. అయినప్పటికీ వారపు ప్రాతిపదికన నిఫ్టీ దాదాపు ఒక శాతం లాభపడగా.. సెన్సెక్స్ సుమారు 0.8 శాతం మేర సానుకూల రిటర్న్లను నమోదు చేసింది.

ముఖ్యంగా అంతర్జాతీయ మార్కెట్లో బ్రెంట్ ముడి చమురు ధర ఒక్కసారిగా 1.16 శాతం పెరిగి బ్యారెల్‌కు $83.45 వద్దకు చేరడం భారత మార్కెట్ల ఆందోళనకు ప్రధాన కారణమైంది. గ్లోబల్ ఆయిల్ సరఫరాలో అత్యంత కీలకమైన హార్ముజ్ జలసంధి మార్గంలో శత్రు దేశాల ఓడలపై ఆంక్షలు విధించేందుకు ఇరాన్, ఒమన్ దేశాలు ప్రతిపాదనలు సిద్ధం చేయడం వల్ల చమురు కొరత ఏర్పడుతుందనే భయాలు వ్యక్తమయ్యాయి. భారత్ తన చమురు అవసరాల కోసం ప్రధానంగా దిగుమతులపైనే ఆధారపడటం వల్ల, క్రూడ్ ఆయిల్ ధరలు పెరిగితే వాణిజ్య లోటు పెరగడమే కాకుండా రవాణా వ్యయాలు పెరిగి దేశంలో ద్రవ్యోల్బణం మళ్లీ తీవ్రమయ్యే ముప్పు ఉంది.

దీనికితోడు అంతర్జాతీయ మార్కెట్ల నుంచి ఎదురైన ప్రతికూల సంకేతాలు కూడా దలాల్ స్ట్రీట్‌పై ఒత్తిడిని పెంచాయి. అమెరికా వాల్ స్ట్రీట్‌లో ఇటీవలి రికార్డు స్థాయిల తర్వాత అమ్మకాలు వెల్లువెత్తడం, ఆసియా మార్కెట్లయిన జపాన్ నిక్కీ, దక్షిణ కొరియా కోస్పీ సూచీలు పతనం కావడం ఇన్వెస్టర్లలో భయాందోళనలను రేకెత్తించింది. ఇదే సమయంలో విదేశీ సంస్థాగత పెట్టుబడిదారులు (FIIలు) నెట్ సెల్లర్లుగా మారి రూ. 17.86 కోట్ల విలువైన ఈక్విటీలను విక్రయించారు. స్వదేశీ సంస్థాగత ఇన్వెస్టర్లు (DIIలు) కొంత మేర కొనుగోళ్లతో మద్దతు ఇచ్చినప్పటికీ.. FIIల విక్రయాల దాడి సెంటిమెంట్‌ను దెబ్బతీసింది.

మరొకవైపు ఈక్విటీ క్యాష్ సెగ్మెంట్‌లో పారదర్శకతను పెంచేందుకు సోమవారం నుంచి ప్రవేశపెట్టిన నూతన క్లోజింగ్ ఆక్షన్ సెషన్ (CAS) విధానంపై ఇన్వెస్టర్లు దృష్టి సారించారు. సాంప్రదాయ సగటు ధర పద్ధతికి స్వస్తి పలికి.. మార్కెట్ ముగిసే సమయంలో ఆర్డర్లను ఒకే చోట సమీకరించి ఒకే ధర వద్ద క్రయవిక్రయాలను పూర్తి చేసే ఈ కొత్త విధానం ద్వారా కృత్రిమ ధరల హెచ్చుతగ్గులకు అడ్డుకట్ట పడుతుందని భావిస్తున్నారు. అంతర్జాతీయంగా ఇంధన సరఫరా మార్గాల్లో అడ్డంకులు ఎక్కువ కాలం కొనసాగవచ్చన్న భయాల నేపధ్యంలో, రాబోయే రోజుల్లో మార్కెట్లలో హెచ్చుతగ్గులు కొనసాగవచ్చని ఆర్థిక విశ్లేషకులు భావిస్తున్నారు.