ఆ 1200 మంది వారసులకు వెంటనే ఉద్యోగాలు ఇవ్వండి..లేదంటే నిరాహార దీక్ష చేస్తా.. కాంగ్రెస్ ప్రభుత్వానికి కవిత వార్నింగ్
Kalvakuntla Kavitha Warns Congress Government of Hunger Strike
తెలంగాణ రక్షణ సేన (TRS) పార్టీ అధ్యక్షురాలు కల్వకుంట్ల కవిత చేపట్టిన ప్రతిష్టాత్మక ‘సింగరేణి బాయిబాట’ కార్యక్రమం జయశంకర్ భూపాలపల్లి జిల్లాలో తీవ్ర ఉత్కంఠ రేపింది. ఇందులో భాగంగా ఆమె కేటీకే-5 బొగ్గు గనిని సందర్శించి, క్షేత్రస్థాయిలో కార్మికులు ఎదుర్కొంటున్న తీవ్రమైన సమస్యలను అడిగి తెలుసుకున్నారు. ఈ సందర్భంగా ఏర్పాటు చేసిన సభలో కవిత మాట్లాడుతూ.. ప్రస్తుత కాంగ్రెస్ ప్రభుత్వంపై, సింగరేణి యాజమాన్యం తీరుపై తీవ్రస్థాయిలో ధ్వజమెత్తారు.
సింగరేణిలో మెడికల్ అన్ఫిట్ (Medical Unfit) కింద దరఖాస్తు చేసుకుని చాలా కాలంగా పెండింగ్లో ఉన్న దాదాపు 1200 మంది వారసులకు వెంటనే కాంపాజనేట్ నియామకాల ద్వారా ఉద్యోగాలు కల్పించాలని ఆమె గట్టిగా డిమాండ్ చేశారు. ఈ రిక్రూట్మెంట్ ప్రక్రియను పూర్తి చేయడానికి తాము ప్రభుత్వానికి ఒక నెల రోజుల సమయం ఇస్తున్నామని, ఆలోగా ఈ సమస్యను పరిష్కరించకపోతే జులై 20 నుంచి తానే స్వయంగా నిరాహార దీక్షకు కూర్చుంటానని ప్రభుత్వానికి కరాఖండిగా హెచ్చరించారు.
సింగరేణి సంస్థలో ప్రస్తుతం ఏ చిన్న పని జరగాలన్నా, బదిలీలు కావాలన్నా నేరుగా డిప్యూటీ సీఎం (భట్టి విక్రమార్క) కార్యాలయం నుంచే లంచాలు అడుగుతున్నారంటూ సంచలన ఆరోపణలు చేశారు. గత ప్రభుత్వాల హయాంలో లాభాల బాటలో నడిచిన సింగరేణిని, ప్రస్తుత కాంగ్రెస్ పాలకులు తమ అవినీతితో నష్టాల్లోకి నెట్టేస్తున్నారని మండిపడ్డారు. ఇటీవల గనిలో జరిగిన ప్రమాదంలో ఒక కార్మికుడికి తీవ్ర గాయాలు కావడానికి యాజమాన్యం వాడుతున్న అత్యంత నాసిరకం డిటోనేటర్లే కారణమని ఆమె ఆరోపించారు. లాభాలు గడిస్తున్న సంస్థలో ప్రాణాలను పణంగా పెట్టి గనుల లోపల రాత్రింబవళ్లు పనిచేసే కార్మికులకు కనీసం స్వచ్ఛమైన గాలి, తాగడానికి మంచి నీరు కూడా ఇవ్వకుండా అధికారులు తీవ్ర నిర్లక్ష్యం వహిస్తున్నారని ఆగ్రహం వ్యక్తం చేశారు.
రిటైర్ అయిన కార్మికుల సొంత ఇంటి కల నెరవేర్చడం కోసం సింగరేణి సంస్థకు ప్రత్యేకంగా ఒక ‘హౌసింగ్ బోర్డు’ ఏర్పాటు చేయాలని ఆమె డిమాండ్ చేశారు. ప్రతి కార్మికుడు ఇల్లు కట్టుకోవడానికి ప్రభుత్వం లేదా కార్మిక సంఘం తరఫున రూ. 10 లక్షల చొప్పున ఆర్థిక సహాయం అందించాలని కోరారు. అలాగే విజిలెన్స్ ఎంక్వయిరీల పేరుతో గని కార్మికులను అధికారులు భయభ్రాంతులకు గురిచేసే ధోరణిని వీడాలన్నారు. తెలంగాణ ప్రత్యేక రాష్ట్ర ఉద్యమ కాలం నుంచే తాను సింగరేణి బొగ్గుగని కార్మికులతో కలిసి నడిచానని గుర్తుచేసిన కవిత, తెలంగాణ హక్కుల సంరక్షణే ధ్యేయంగా తాను స్థాపించిన ‘తెలంగాణ రక్షణ సేన’ పార్టీని భూపాలపల్లి ప్రజలు, కార్మిక లోకం తమ గుండెల్లో పెట్టుకుని ఆదరించాలని విజ్ఞప్తి చేశారు.
సంబంధిత వార్తలు
