బీబీసీ బిగ్ లేఆప్స్.. రెండు వేల మందిని తీసేస్తున్న మీడియా దిగ్గజం.. పది శాతం బడ్జెట్‌ తగ్గింపునకు ప్లాన్‌

ప్రముఖ అంతర్జాతీయ వార్తా సంస్థ బ్రిటిష్ బ్రాడ్‌కాస్టింగ్ కార్పొరేషన్ (BBC) తన వ్యయాలను తగ్గించుకునే క్రమంలో సుమారు 2 వేల మంది ఉద్యోగులను తొలగించేందుకు భారీ ప్రణాళికను సిద్ధం చేస్తోంది. భవిష్యత్తు నిధుల కేటాయింపులపై ప్రభుత్వ మంత్రులతో కీలక చర్చలు జరగనున్న తరుణంలో ఈ ఉపాధి కోతల అంశం తెరపైకి వచ్చిందని ప్రఖ్యాత వార్తా పత్రిక ‘ఫైనాన్షియల్ టైమ్స్’ నివేదించింది. సంస్థ యొక్క ఆర్థిక భారాన్ని తగ్గించుకోవడంలో భాగంగా మొత్తం వ్యయంలో 10 శాతం మేర కోత విధించాలని యాజమాన్యం నిర్ణయించింది. ఈ నిర్ణయం వల్ల మెయిన్ న్యూస్ డివిజన్‌తో పాటు సంస్థలోని అన్ని ఇతర విభాగాలు ప్రభావితం కానున్నాయి. ముఖ్యంగా ఈ బడ్జెట్ కోతలు కొన్ని నిర్దిష్ట రేడియో షోల ప్రసారాలపై ప్రతికూల ప్రభావం చూపనున్నాయి.

సంస్థ యొక్క ఆర్థిక భవిష్యత్తును సురక్షితంగా ,స్థిరంగా ఉంచడం కోసం రాబోయే రోజుల్లో కొన్ని కఠినమైన, ప్రజలకు నచ్చని నిర్ణయాలు తీసుకోవాల్సి వస్తుందని బీబీసీ కొత్త డైరెక్టర్ జనరల్ మాట్ బ్రిటన్ గత నెలలో ఇచ్చిన ఒక ఇంటర్వ్యూలో ముందే హెచ్చరించారు. ప్రపంచవ్యాప్తంగా సాంప్రదాయ మీడియా ఆదాయాలు పడిపోతుండటంతో, బీబీసీ వంటి అంతర్జాతీయ సంస్థ కూడా ఇప్పుడు ఈ తరహా కఠినమైన ఆర్థిక సవాళ్లను ఎదుర్కొంటూ పునర్వ్యవస్థీకరణ వైపు అడుగులు వేస్తోంది.