Rahul Gandhi: సీఈసీ త‌క్ష‌ణ‌మే రాజీనామా చేయాలి..అప్రూవర్‌గా మారాలి : రాహుల్‌గాంధీ

Rahul Gandhi: SIRపై ఎన్నికల సంఘంలో విభేదాల వార్తల నేపథ్యంలో రాహుల్ గాంధీ స్పందించారు. CEC జ్ఞానేశ్ కుమార్ రాజీనామా చేయాలని డిమాండ్ చేస్తూ కీలక వ్యాఖ్యలు చేశారు.

Rahul Gandhi: ఓటర్ల జాబితా ప్రత్యేక సమగ్ర సవరణ (SIR) ప్రక్రియపై ఎన్నికల సంఘంలోనే విభేదాలు తలెత్తినట్లు వచ్చిన వార్తల నేపథ్యంలో కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీ తీవ్రంగా స్పందించారు. ప్రధాన ఎన్నికల కమిషనర్ (CEC) జ్ఞానేశ్ కుమార్ తక్షణమే తన పదవికి రాజీనామా చేయాలని డిమాండ్ చేశారు.

ఢిల్లీలో నిర్వహించిన మీడియా సమావేశంలో రాహుల్ గాంధీ మాట్లాడుతూ.. ఎన్నికల సంఘం వ్యవహారశైలిపై తీవ్ర విమర్శలు చేశారు. ఎన్నికల ప్రక్రియపై ప్రజల్లో విశ్వాసం దెబ్బతినేలా పరిణామాలు చోటుచేసుకుంటున్నాయని ఆయన ఆరోపించారు.

‘ఓటు చోరీ’పై రాహుల్ కీలక వ్యాఖ్యలు

మహారాష్ట్ర, హర్యానా రాష్ట్రాల్లో ఓటర్ల జాబితాకు సంబంధించి కాంగ్రెస్ లేవనెత్తిన ‘ఓటు చోరీ’ ఆరోపణల తర్వాతే ఎన్నికల కమిషనర్లు ఎస్‌ఐఆర్ ప్రక్రియపై అభ్యంతరాలు వ్యక్తం చేసినట్లు రాహుల్ గాంధీ పేర్కొన్నారు. ఎన్నికల సంఘంలో అంతర్గతంగా భిన్నాభిప్రాయాలు బయటకు రావడం ఆందోళన కలిగించే పరిణామమని అన్నారు.

‘ఓటు చోరీ’ ద్వారా గెలిచిన ఎంపీలు తీసుకొచ్చే చట్టాలు చెల్లుబాటు కావని రాహుల్ గాంధీ వ్యాఖ్యానించారు. ప్రజల ఓటు హక్కును కాపాడాల్సిన బాధ్యత ఎన్నికల సంఘంపై ఉందని పేర్కొన్నారు.

‘జ్ఞానేశ్ కుమార్ అప్రూవర్‌గా మారాలి’

ప్రస్తుత పరిణామాల నేపథ్యంలో ప్రధాన ఎన్నికల కమిషనర్ జ్ఞానేశ్ కుమార్ తన వైఖరిని స్పష్టం చేయాలని రాహుల్ గాంధీ అన్నారు. ఆయన ‘అప్రూవర్‌గా మారి’ జరిగిన విషయాలను వెల్లడించడం దేశ ప్రయోజనాలకు మంచిదని వ్యాఖ్యానించారు.

ఎన్నికల సంఘంలో ప్రస్తుతం నెలకొన్న పరిస్థితులకు ప్రధాన ఎన్నికల కమిషనర్ బాధ్యత వహించాలని రాహుల్ గాంధీ ఆరోపించారు. అందువల్ల ఆయన తక్షణమే పదవికి రాజీనామా చేయాలని డిమాండ్ చేశారు.

మోదీ, అమిత్‌షాపై రాహుల్ ఆరోపణలు

జ్ఞానేశ్ కుమార్‌ను ప్రధాన ఎన్నికల కమిషనర్‌గా ఎంపిక చేసిన ప్రక్రియపైనా రాహుల్ గాంధీ ప్రశ్నలు లేవనెత్తారు. ప్రధానమంత్రి నరేంద్ర మోదీ, కేంద్ర హోంమంత్రి అమిత్‌షా ఆయన ఎంపికలో కీలక పాత్ర పోషించారని ఆరోపించారు.

ఎన్నికల సంఘంలోని ప్రస్తుత పరిణామాలకు జ్ఞానేశ్ కుమార్ కారణమని ఇద్దరు ఎన్నికల కమిషనర్లు అభ్యంతరాలు వ్యక్తం చేసినట్లు వార్తలు వస్తున్న నేపథ్యంలో, ఆయనను ఎంపిక చేసిన వారే ఈ వ్యవహారంపై బాధ్యత వహించాలని రాహుల్ గాంధీ డిమాండ్ చేశారు.

ఎన్నికల వ్యవస్థపై ప్రజలకు నమ్మకం ఉండాలంటే ఎన్నికల సంఘం స్వతంత్రంగా, నిష్పాక్షికంగా పనిచేయాల్సిన అవసరం ఉందని ఆయన పేర్కొన్నారు.