భారత సైన్యానికి కొత్త సారథి.. ధీరజ్ సేథ్కు ఆర్మీ చీఫ్ బాధ్యతలు.. ఈ నెల 30న పదవీ స్వీకారం..
Lt General Dhiraj Seth Named New Army Chief, Set to Take Over from General Upendra Dwivedi
భారత సైన్యం (Indian Army) నూతన పగ్గాలను చేపట్టేందుకు లెఫ్టినెంట్ జనరల్ ధీరజ్ సేథ్ సిద్ధమయ్యారు. దేశ రక్షణ రంగంలోనే అత్యున్నత పదవి అయిన సైన్యాధిపతి (Army Chief) గా ఆయన నియమితులయ్యారు. ప్రస్తుతం ఆర్మీ చీఫ్గా సేవలందిస్తున్న జనరల్ ఉపేంద్ర ద్వివేది పదవీ విరమణ చేయనున్న నేపథ్యంలో.. కేంద్ర ప్రభుత్వం శనివారం ఈ అధికారిక ప్రకటన విడుదల చేసింది. రాష్ట్రపతి ద్రౌపది ముర్ము ఆమోదంతో ఈ నియామకం జరిగినట్లు రక్షణ మంత్రిత్వ శాఖ వెల్లడించింది. దీని ప్రకారం.. 2026 జూన్ 30 నుంచి ధీరజ్ సేథ్ నూతన సైన్యాధిపతిగా బాధ్యతలు స్వీకరించనున్నారు. ఆయన ఈ పదవిలో 2028 ఆగస్టు 31 వరకు కొనసాగుతారు.
ప్రస్తుతం ఆర్మీ వైస్ చీఫ్ ఆఫ్ స్టాఫ్గా బాధ్యతలు నిర్వర్తిస్తున్న ధీరజ్ సేథ్కు దాదాపు నాలుగు దశాబ్దాల (40 ఏళ్లు) సుదీర్ఘ, విశేష సైనిక అనుభవం ఉంది. ఖడక్వాస్లాలోని ప్రతిష్టాత్మక జాతీయ రక్షణ అకాడమీ (NDA) లో చదువుకున్న ఆయన, 1986లో ‘2వ లాన్సర్స్’ ఆర్మర్డ్ కార్ప్స్ అధికారిగా భారత సైన్యంలో తన ప్రస్థానాన్ని ప్రారంభించారు. అప్పటి నుంచి వ్యూహాత్మక ప్రాంతాల్లో కీలక కమాండ్, స్టాఫ్ బాధ్యతలను సమర్థవంతంగా నిర్వహించారు.
సైనిక విద్య విషయానికొస్తే ధీరజ్ సేథ్ అంతర్జాతీయంగా అత్యుత్తమ శిక్షణ పొందారు. ఫ్రాన్స్లోని పారిస్ మిలిటరీ కాలేజీలో ‘డిఫెన్స్ సర్వీసెస్ కమాండ్ అండ్ జనరల్ స్టాఫ్’ కోర్సును, అలాగే అమెరికా కాలిఫోర్నియాలోని నావల్ పోస్ట్ గ్రాడ్యుయేట్ స్కూల్లో ‘ఇంటర్నేషనల్ డిఫెన్స్ అక్విజిషన్ మేనేజ్మెంట్’ కోర్సును ఆయన విజయవంతంగా పూర్తి చేశారు.
ఆయన సుదీర్ఘ కెరీర్లో ఎడారి ప్రాంతాల్లో సాయుధ రెజిమెంట్కు, అభివృద్ధి చెందిన సరిహద్దు ప్రాంతాల్లో సాయుధ బ్రిగేడ్కు విజయవంతంగా నాయకత్వం వహించారు. జమ్మూ-కాశ్మీర్లోని సున్నితమైన వాతావరణంలో తిరుగుబాటు నిరోధక దళానికి కమాండర్గా వ్యవహరించి శాంతిభద్రతలను పర్యవేక్షించారు. ఆ తర్వాత ‘సుదర్శన్ చక్ర కార్ప్స్’కు నాయకత్వం వహించడమే కాకుండా, ఢిల్లీ ఏరియా జనరల్ ఆఫీసర్ కమాండింగ్గా జాతీయ, అంతర్జాతీయ ప్రాముఖ్యత కలిగిన పలు కీలక కార్యక్రమాలను ముందుండి నడిపించారు.
గతేడాది సైన్యం అత్యంత ప్రతిష్టాత్మకంగా చేపట్టిన ‘ఆపరేషన్ సింధూర్’ సమయంలో పూణే ప్రధాన కేంద్రంగా ఉన్న ‘సదరన్ కమాండ్’కు ధీరజ్ సేథ్ నేతృత్వం వహించారు. ఆ తర్వాత పశ్చిమ సరిహద్దు వెంబడి జరిగిన త్రివిధ దళాల (ఆర్మీ, నేవీ, ఎయిర్ఫోర్స్) సంయుక్త యుద్ధ విన్యాసాలను ఆయనే స్వయంగా సమన్వయం చేశారు. దేశీయంగానే కాకుండా, అంగోలాలో జరిగిన ఐక్యరాజ్యసమితి (UN) శాంతి భద్రతల మిషన్లోనూ భారత సైన్యం తరఫున పాల్గొని అంతర్జాతీయ స్థాయిలో గుర్తింపు తెచ్చుకున్నారు. ఎన్నో వ్యూహాత్మక విజయాలు సాధించిన ధీరజ్ సేథ్ సారథ్యంలో భారత సైన్యం మరిన్ని మైలురాళ్లను అధిగమిస్తుందని రక్షణ నిపుణులు భావిస్తున్నారు.
సంబంధిత వార్తలు
