ఓటర్ల జాబితా నుంచి 13 కోట్ల పేర్లు తొలగింపు.. మోదీ ప్రభుత్వంపై దేశవ్యాప్తంగా నిరసనలు.. ది న్యూయార్క్‌ టైమ్స్‌ సంచలన కథనం

130 Million Names Removed: ప్రపంచంలోనే అతిపెద్ద ప్రజాస్వామ్య దేశమైన ભારత్‌లో పౌరుల ప్రాథమిక హక్కు అయిన ఓటు హక్కు రక్షణపై తీవ్రమైన ఆందోళనలు వ్యక్తమవుతున్నాయి. అంతర్జాతీయ పత్రిక ‘ది న్యూయార్క్ టైమ్స్’ ప్రచురించిన ఒక ప్రత్యేక విశ్లేషణాత్మక కథనం ప్రకారం, దేశంలో ఓటరుగా కొనసాగాలంటే పౌరులే తమ వద్ద ఉన్న వివిధ పత్రాలను చూపించి అర్హతను రుజువు చేసుకోవాల్సిన విచిత్ర పరిస్థితి దాదాపు 100 కోట్ల మందికి ఏర్పడింది. నకిలీ ఓటర్లు, మరణించిన వారి పేర్లు, విదేశీయుల ఓట్లను తొలగించడం అనే నెపంతో ప్రారంభించిన ఈ ఓట్ల ప్రక్షాళన కార్యక్రమం, ఏకంగా సాధారణ పౌరుల హక్కులకే పెద్ద ముప్పుగా పరిణమించిందనే విమర్శలు వెల్లువెత్తుతున్నాయి. ఈ ప్రక్రియలో భాగంగా ఇప్పటివరకు దేశవ్యాప్తంగా 13 కోట్లకు పైగా ఓటర్లను జాబితాల నుంచి తీసివేశారని, ఇది కేవలం తొలగింపు మాత్రమే కాదని, ఓటర్ల హక్కులను అపహరించడమేనని సదరు కథనం పేర్కొంది.

గత ఏడు దశాబ్దాలుగా ఎంతో నమ్మకంతో సాగుతున్న భారత ఎన్నికల వ్యవస్థ సమగ్రత ఈ విధానాల వల్ల తీవ్రంగా దెబ్బతిన్నదని విశ్లేషకులు అభిప్రాయపడుతున్నారు. గతంలో ఓటర్ల జాబితా సవరణ ప్రక్రియ అనేది ఎన్నికల సిబ్బంది నేరుగా ఇళ్లకు వచ్చి క్షేత్రస్థాయిలో విచారణ జరిపి భౌతికంగా నిర్వహించేవారు. కానీ, ప్రస్తుత డిజిటల్ విధానంలో నిరూపణ బాధ్యతను పూర్తిగా ఓటరుపైనే మోపడంతో అనేక ప్రతికూలతలు ఎదురవుతున్నాయి. సాంకేతిక లోపాలు లేదా క్లరికల్ పొరపాట్ల వల్ల తమ వివరాలను సరిగ్గా సమర్పించలేకపోయిన పౌరుల ఓట్లను తక్షణమే తొలగిస్తున్నారని, దీనివల్ల ఒక పౌరుడికి ఓటు హక్కు ఉందో లేదో అనేది డిజిటల్ అల్గారిథమ్స్ తీసుకునే నిర్ణయాలపై ఆధారపడిపోతోందని ఆందోళన వ్యక్తం చేస్తున్నారు. రికార్డుల్లో చిన్నపాటి తప్పులు ఉన్నప్పటికీ, దానికి అంతిమంగా సాధారణ ఓటరే బలవుతున్నాడు.

ఈ అంశంపై మాజీ ఎన్నికల కమిషనర్ అశోక్ లవాసా సైతం స్పందిస్తూ, ఏ మాత్రమైనా చిన్న కారణం దొరికితే చాలు ఓటర్లను జాబితా నుంచి వదిలించుకోవడమే ప్రధాన ధ్యేయంగా ఈ ప్రస్తుత ప్రక్రియ సాగుతున్నట్లు కనిపిస్తోందని అభిప్రాయపడ్డారు. అదే సమయంలో, అధికారంలో ఉన్న మోదీ నేతృత్వంలోని హిందూ జాతీయవాద ప్రభుత్వానికి మద్దతు ఇవ్వరనే అనుమానం ఉన్న వర్గాలను లక్ష్యంగా చేసుకుని, వారి ఓటు హక్కును నిర్దాక్షిణ్యంగా లాక్కుంటున్నారనే ఆరోపణలు విపక్షాలు, స్వచ్ఛంద సంస్థల నుంచి గట్టిగా వినబడుతున్నాయి. రాజ్యాంగం కల్పించిన ఓటు హక్కును పరిరక్షించాల్సిన వ్యవస్థలే, క్లిష్టమైన సాంకేతిక నిబంధనలతో సామాన్యులను ఓటింగ్ ప్రక్రియకు దూరం చేస్తున్నాయనే అభిప్రాయం అంతర్జాతీయ స్థాయిలో పెద్ద చర్చకు దారితీసింది.