భార్య షేవింగ్ చేసుకుంటుండగా చూసిన భర్త.. పెళ్లైన 25 రోజుల తర్వాత ట్రాన్స్జెండర్ అంటూ ఫిర్యాదు..
Transgender
మధ్యప్రదేశ్లోని షాజాపూర్లో ఒక విచిత్రమైన, సంచలన ఘటన వెలుగులోకి వచ్చింది. వివాహమైన 25 రోజుల తర్వాత తన భార్య ట్రాన్స్జెండర్ అని, ఈ విషయాన్ని దాచిపెట్టి మోసపూరితంగా పెళ్లి చేశారని 32 ఏళ్ల వ్యక్తి పోలీసులను ఆశ్రయించాడు. బాధితుడి ఫిర్యాదు మేరకు భార్య కుటుంబానికి చెందిన ఐదుగురిపై పోలీసులు కేసు నమోదు చేసి దర్యాప్తు ప్రారంభించారు.
షాజాపూర్కు చెందిన ఒక కూరగాయల వ్యాపారికి, రాజ్గఢ్ జిల్లా పచోరేకు చెందిన యువతికి పొరుగువారి మధ్యవర్తిత్వంతో సంబంధం కుదిరింది. వరుడి కుటుంబం వచ్చే ఏడాది పెళ్లి చేద్దామని భావించినప్పటికీ, వధువు వైపు వారు తొందరపడటంతో ఈ ఏడాది జూన్ 29న ఒక ఆలయంలో హిందూ సంప్రదాయాల ప్రకారం వివాహం జరిపించారు. పెళ్లి కోసం రూ. 5 లక్షలు ఖర్చు చేయడంతో పాటు వధువు కుటుంబానికి రూ. 1 లక్ష నగదు ఇచ్చినట్లు వరుడి కుటుంబం తెలిపింది.
ఫిర్యాదు ప్రకారం, పెళ్లి అయినప్పటి నుంచి శృంగారానికి దూరంగా ఉండటానికి భార్య పదేపదే సాకులు చెప్పేది. శోభనం రాత్రి రుతుస్రావం అని, మరుసటి రోజు కడుపునొప్పి అని చెప్పి తప్పించుకుంది. జూలై 2న పుట్టింటికి వెళ్లి, తిరిగి జూలై 23న వైవాహిక గృహానికి వచ్చింది. అయితే, ఆమె గడ్డం (షేవింగ్) చేసుకోవడాన్ని వరుడి సోదరి (ఆడపడుచు) గమనించడంతో కుటుంబంలో తీవ్ర అనుమానాలు తలెత్తాయి.
జూలై 24న వరుడి కుటుంబ సభ్యులు ఆమెను నిలదీసి, తిరిగి తీసుకెళ్లాలని వధువు బంధువులకు సమాచారం ఇచ్చారు. అయితే, షాజాపూర్ వచ్చిన వధువు బంధువులు తమపై దాడి చేసి, తీవ్ర పదజాలంతో దూషించారని వరుడు ఆరోపించాడు.
ఈ ఘటనపై కోత్వాలి పోలీస్ స్టేషన్ ఇన్చార్జ్ సంతోష్ బఘేలా స్పందిస్తూ.. ఆరోపణలు ఎదుర్కొంటున్న వ్యక్తికి వైద్య పరీక్షలు నిర్వహించిన తర్వాతే ఆమె ట్రాన్స్జెండర్ అవునో కాదో అధికారికంగా నిర్ధారించగలమని తెలిపారు. దర్యాప్తులో ఈ ఆరోపణలు నిజమని తేలితే, నిందితులపై మోసం (చీటింగ్) కేసు నమోదు చేసి చట్టపరమైన చర్యలు తీసుకుంటామని ఆయన స్పష్టం చేశారు.
సంబంధిత వార్తలు
