Bonda Uma: టీడీపీకి బొండా ఉమా షాక్ ఇవ్వనున్నారా? వైసీపీలో చేరే దిశగా అడుగులు పడుతున్నాయా.. జగన్ వ్యూహం అదేనా ?

విజయవాడ సెంట్రల్ ఎమ్మెల్యే బొండా ఉమామహేశ్వరరావు టీడీపీపై అసంతృప్తితో ఉన్నారా? పార్టీ అధిష్ఠాన వైఖరిపై ఆయన తీవ్ర అసహనంలో ఉన్నారా? ఇదే పరిస్థితి కొనసాగితే బొండా ఉమా పార్టీ మారే అవకాశాలు ఉన్నాయా? ప్రస్తుతం ఆంధ్రప్రదేశ్ రాజకీయాల్లో ఇవే ప్రశ్నలు చర్చనీయాంశంగా మారాయి.

టీడీపీలో సీనియర్ నేతగా.. కాపు సామాజిక వర్గంలో బలమైన గుర్తింపు ఉన్న బొండా ఉమాకు ప్రభుత్వం ఏర్పడిన తర్వాత ఆశించిన స్థాయిలో ప్రాధాన్యం దక్కలేదనే ప్రచారం జరుగుతోంది. ముఖ్యంగా ముఖ్యమంత్రి చంద్రబాబు నాయుడు, మంత్రి నారా లోకేశ్ తన అభిప్రాయాలను పట్టించుకోవడం లేదనే అసంతృప్తి ఆయనలో పెరుగుతోందని రాజకీయ వర్గాల్లో జోరుగా చర్చ సాగుతోంది.

ఇటీవల ముద్రగడ పద్మనాభం సంస్మరణ సభలో మాజీ మంత్రి అంబటి రాంబాబుతో కలిసి బొండా ఉమా పాల్గొనడం రాజకీయంగా ప్రాధాన్యత సంతరించుకుంది. ఈ పరిణామంపై టీడీపీలో కొందరు అసంతృప్తి వ్యక్తం చేసినట్లు తెలుస్తోంది. అంతేకాకుండా సోషల్ మీడియాలో కొంతమంది టీడీపీ కార్యకర్తలు భవిష్యత్ ఎన్నికల్లో ఆయనకు టికెట్ ఇవ్వొద్దని వ్యాఖ్యానించడం కూడా రాజకీయ చర్చకు దారితీసింది.

అయితే బొండా ఉమా అసంతృప్తికి గల కారణాలను తెలుసుకునేందుకు పార్టీ పెద్దలు ఇప్పటివరకు ఎలాంటి ప్రయత్నం చేయలేదనే ప్రచారం కూడా జరుగుతోంది. ఇదే ఆయన అసహనాన్ని మరింత పెంచుతోందని ఆయన సన్నిహిత వర్గాలు చెబుతున్నట్లు రాజకీయ వర్గాల్లో చర్చ నడుస్తోంది.

2019 నుంచి 2024 వరకు టీడీపీ ప్రతిపక్షంలో ఉన్న సమయంలో.. పార్టీ కోసం బొండా ఉమా ముందుండి పోరాడారని ఆయన అనుచరులు గుర్తు చేస్తున్నారు. మాచర్ల మున్సిపల్ ఎన్నికల సమయంలో బుద్ధా వెంకన్నతో కలిసి వెళ్తున్న కారుపై జరిగిన దాడి వంటి ఘటనలను కూడా ప్రస్తావిస్తూ.. కష్టకాలంలో పార్టీకి అండగా నిలిచిన నేతకు ఇప్పుడు తగిన గుర్తింపు ఇవ్వలేదని వారు వాదిస్తున్నారు.

ఇదే సమయంలో బొండా ఉమాపై.. వైసీపీ దృష్టి సారించినట్లు రాజకీయ ప్రచారం జోరందుకుంది. కాపు సామాజిక వర్గంలో ప్రభావం ఉన్న నేత కావడంతో ఆయనను పార్టీలోకి ఆహ్వానిస్తే రాజకీయంగా లాభం ఉంటుందా అనే అంశంపై వైసీపీ నాయకత్వం విజయవాడ నేతలతో చర్చలు జరుపుతోందని ప్రచారం ముమ్మరంగా సాగుతోంది.

2014లో విజయవాడ సెంట్రల్ నుంచి ఎమ్మెల్యేగా గెలిచిన బొండా ఉమా.. 2019లో అత్యల్ప ఓట్ల తేడాతో ఓడిపోయి, 2024లో మళ్లీ విజయం సాధించారు. వంగవీటి మోహన్‌రంగా అనుచరుడిగా రాజకీయ ప్రస్థానం ప్రారంభించిన ఆయన.. అనంతరం టీడీపీలో చేరి పార్టీలో కీలక నాయకుడిగా ఎదిగారు.

టీడీపీ అధికారంలోకి వచ్చిన తర్వాత డిప్యూటీ సీఎం పవన్ కళ్యాణ్‌కు ప్రాధాన్యం ఇస్తూ.. ఇతర కాపు నాయకులను పెద్దగా పట్టించుకోవడం లేదనే భావన కొందరు కాపు నేతల్లో ఉందని రాజకీయ విశ్లేషకులు చెబుతున్నారు. ఈ నేపథ్యంలో బొండా ఉమా, పవన్ కళ్యాణ్ మధ్య కూడా అభిప్రాయ భేదాలు ఉన్నాయనే ప్రచారం కొనసాగుతోంది.

మరోవైపు రాబోయే ఎన్నికల్లో కాపు ఓటు బ్యాంకును బలోపేతం చేయడంపై వైసీపీ అధినేత వైఎస్ జగన్ ప్రత్యేక దృష్టి పెట్టినట్లు రాజకీయ వర్గాల్లో చర్చ జరుగుతోంది. ఈ వ్యూహంలో భాగంగా బొండా ఉమా వంటి కీలక నేతను పార్టీలోకి తీసుకురావాలని ప్రయత్నాలు జరిగే అవకాశాలు ఉన్నాయని ప్రచారం వినిపిస్తోంది.

అయితే ఇప్పటి వరకు బొండా ఉమా టీడీపీని వీడుతున్నట్లు గానీ.. వైసీపీలో చేరుతున్నట్లు గానీ అధికారికంగా ఎలాంటి ప్రకటన చేయలేదు. అలాగే టీడీపీ లేదా వైసీపీ నుంచి కూడా ఈ అంశంపై ఎలాంటి అధికారిక ధృవీకరణ వెలువడలేదు.

ఇలాంటి పరిస్థితుల్లో… బొండా ఉమా నిజంగానే టీడీపీకి షాక్ ఇవ్వనున్నారా? వైసీపీ నుంచి వచ్చే రాజకీయ ఆహ్వానాన్ని స్వీకరిస్తారా? లేక టీడీపీలోనే తన అసంతృప్తికి పరిష్కారం లభిస్తుందా? అనే ప్రశ్నలకు సమాధానం రానున్న రోజుల్లోనే తేలనుంది.