Skip to content
ఆంధ్రప్రదేశ్ › వార్తలు

Cyclone Akvan Impact: తీవ్ర తుపానుగా అక్వాన్.. నెల్లూరు తీరంలో అల్లకల్లోలంగా సముద్రం.. 200 మీటర్ల మేర ముందుకు దూసుకొచ్చిన అలలు..

jagan 17 Nov 2026 1 నిమిషాల పఠనం ఆంధ్రప్రదేశ్
Cyclone Akvan Impact: తీవ్ర తుపానుగా అక్వాన్.. నెల్లూరు తీరంలో అల్లకల్లోలంగా సముద్రం.. 200 మీటర్ల మేర ముందుకు దూసుకొచ్చిన అలలు..

bay of Bengal

Cyclone Akvan Impact: దక్షిణ, పశ్చిమ మధ్య బంగాళాఖాతంలో కేంద్రీకృతమై ఉన్న ‘అక్వాన్’ తుపాను మరింత బలపడుతోంది. గడిచిన ఆరు గంటల్లో గంటకు 3 కిలోమీటర్ల వేగంతో కదిలిన ఈ తుపాను, మంగళవారం సాయంత్రానికి తీవ్ర తుపానుగా (Severe Cyclonic Storm) రూపాంతరం చెందే అవకాశం ఉందని ఆంధ్రప్రదేశ్ విపత్తుల నిర్వహణ సంస్థ ఎండీ, ఆర్టీజీఎస్ సీఈవో ప్రఖర్ జైన్ వెల్లడించారు.

ప్రస్తుతానికి ఇది చెన్నైకి 610 కిలోమీటర్లు, మచిలీపట్నానికి 660 కిలోమీటర్లు, విశాఖపట్నానికి 670 కిలోమీటర్లు, ఒడిశాలోని గోపాల్‌పూర్‌కు 790 కిలోమీటర్ల దూరంలో కేంద్రీకృతమై ఉందని తెలిపారు. ముంచుకొస్తున్న తుపాను ముప్పును దృష్టిలో ఉంచుకుని రైతులు తమ వ్యవసాయ పనుల్లో తగిన ముందస్తు జాగ్రత్తలు పాటించాలని అధికారులు స్పష్టమైన హెచ్చరికలు జారీ చేశారు.

మరోవైపు, తుపాను ప్రభావంతో నెల్లూరు జిల్లా తీర ప్రాంతంలో సముద్రం తీవ్ర అల్లకల్లోలంగా మారింది. గంటగంటకూ అలల ఉద్ధృతి పెరుగుతుండటంతో తీర ప్రాంత ప్రజల్లో ఆందోళన నెలకొంది. జిల్లాలోని పలు చోట్ల సముద్రపు నీరు సాధారణ స్థితి కంటే 50 మీటర్ల నుంచి ఏకంగా 200 మీటర్ల వరకు ముందుకు చొచ్చుకువచ్చింది. పరిస్థితి తీవ్రతను గమనించి అప్రమత్తమైన అధికార యంత్రాంగం సముద్రంలోకి చేపలవేటను తక్షణమే నిలిపివేస్తూ ఆదేశాలు ఇచ్చింది. మత్స్యకారులు తమ బోట్లను ఒడ్డుకు చేర్చగా, జువ్వలదిన్నె హార్బర్‌లో 80కి పైగా మరబోట్లను సురక్షితంగా లంగరు వేశారు.

తీర ప్రాంతంలో ముందస్తు జాగ్రత్త చర్యల్లో భాగంగా కృష్ణపట్నం పోర్టులో 3వ నంబర్ ప్రమాద హెచ్చరికను జారీ చేశారు. తుపాను వల్ల ఎలాంటి ప్రాణ, ఆస్తి నష్టం జరగకుండా జిల్లా అధికార యంత్రాంగం తీర ప్రాంత గ్రామాల్లో పటిష్ఠ రక్షణ చర్యలు చేపట్టింది. ఇదిలా ఉండగా, ఈ తుపాను ప్రభావంతో కురిసే భారీ వర్షాల వల్లనైనా జిల్లాకు జీవనాధారమైన సోమశిల, కండలేరు జలాశయాలు నిండితే తమ తాగు, సాగునీటి కష్టాలు తీరుతాయని స్థానిక రైతులు, ప్రజలు ఆశాభావం వ్యక్తం చేస్తున్నారు.