నాగార్జున సాయంతో తమ్మిడికుంటకు కొత్త రూపు.. సీఎం రేవంత్ రెడ్డి కీలక వ్యాఖ్యలు

హైదరాబాద్‌లో చెరువుల పరిరక్షణకు తమ ప్రభుత్వం అత్యంత ప్రాధాన్యత ఇస్తోందని తెలంగాణ ముఖ్యమంత్రి రేవంత్ రెడ్డి తెలిపారు. ఈ క్రమంలోనే మాదాపూర్‌లోని తమ్మిడికుంట చెరువును అభివృద్ధి చేసినట్లు వెల్లడించారు. గతంలో 14 ఎకరాలకు పరిమితమైన ఈ చెరువు విస్తీర్ణాన్ని ఇప్పుడు 30 ఎకరాలకు పెంచినట్లు చెప్పారు. కొంతమందికి ఇబ్బందులు ఎదురైనా.. భవిష్యత్తు తరాలకు మేలు జరగాలనే ఉద్దేశంతోనే చెరువు పునరుద్ధరణ చేపట్టామని స్పష్టం చేశారు.

బుధవారం హైదరాబాద్‌లోని మాదాపూర్‌లో పునరుద్ధరించిన తమ్మిడికుంట చెరువును సీఎం రేవంత్ రెడ్డి ప్రారంభించారు. ఈ సందర్భంగా నిర్వహించిన కార్యక్రమంలో ఆయన మాట్లాడుతూ.. తమ్మిడికుంట చెరువు అభివృద్ధికి సినీ నటుడు అక్కినేని నాగార్జున కూడా సహకరించారని వెల్లడించారు. ఆయన రెండు ఎకరాల భూమిని ప్రభుత్వానికి అందించినట్లు తెలిపారు.

హైదరాబాద్ నగరానికి చెరువులు ఎంతో కీలకమని సీఎం పేర్కొన్నారు. ఒకప్పుడు రాక్స్ అండ్ లేక్స్ సిటీగా పేరొందిన హైదరాబాద్‌లో మొత్తం 1,372 చెరువులు ఉండేవని గుర్తు చేశారు. అయితే వివిధ కారణాలతో వాటిలో సగానికి పైగా చెరువులు కనుమరుగయ్యాయని ఆవేదన వ్యక్తం చేశారు.

చెరువులు ఆక్రమణలకు గురికావడంతో వర్షాకాలంలో నగర ప్రజలు తీవ్ర ఇబ్బందులు ఎదుర్కొంటున్నారని సీఎం తెలిపారు. భారీ వర్షాలు కురిసినప్పుడు రహదారులపై నీరు నిలవడం, కాలనీలు ముంపునకు గురికావడం వంటి సమస్యలు తలెత్తుతున్నాయని చెప్పారు. ఈ పరిస్థితిని మార్చాలంటే చెరువులను ఆక్రమణల నుంచి కాపాడటంతో పాటు వాటి పూర్వ వైభవాన్ని తీసుకురావాల్సిన అవసరం ఉందన్నారు.

గతంలో మూసీ నది వరదల నుంచి హైదరాబాద్‌ను రక్షించేందుకు నిజాం పాలకులు ఉస్మాన్ సాగర్, హిమాయత్ సాగర్ జలాశయాలను నిర్మించారని రేవంత్ రెడ్డి గుర్తు చేశారు. వికారాబాద్ ప్రాంతంలో ప్రారంభమయ్యే ముచుకుందా నది.. మూసా, ఈసా నదులు కలిసే ప్రాంతంలో మూసీగా మారుతుందని వివరించారు. ప్రపంచవ్యాప్తంగా అనేక నాగరికతలు నదీ పరివాహక ప్రాంతాల్లోనే అభివృద్ధి చెందాయని పేర్కొన్నారు. ఈ విషయాన్ని అప్పట్లోనే గుర్తించిన పాలకులు మూసీ పరివాహక ప్రాంతాన్ని అభివృద్ధి చేశారని తెలిపారు.

ప్రస్తుతం మూసీ నది తీవ్ర కాలుష్యంతో నిండిపోయిందని సీఎం ఆందోళన వ్యక్తం చేశారు. మూసీ కాలుష్యం కారణంగా నల్లగొండ జిల్లా ప్రజలు అనేక సమస్యలు ఎదుర్కొంటున్నారని చెప్పారు. గత ప్రభుత్వాల నిర్లక్ష్యం వల్ల అక్కడి ప్రజలు ఇబ్బందులు పడాల్సి వస్తోందని వ్యాఖ్యానించారు. ఈ పరిస్థితిని మార్చేందుకు మూసీ నది పునరుజ్జీవన కార్యక్రమాన్ని చేపట్టాలని నిర్ణయించినట్లు వెల్లడించారు.

మూసీ ప్రక్షాళనతో పాటు నగరంలోని చెరువుల పునరుద్ధరణ కూడా ప్రభుత్వ ప్రాధాన్యతల్లో ఒకటని సీఎం స్పష్టం చేశారు. హైదరాబాద్‌ను అంతర్జాతీయ స్థాయి నగరంగా అభివృద్ధి చేయాలంటే ప్రకృతి వనరులను కాపాడుకోవాలని సూచించారు. మూసీ నదిని శుభ్రం చేయడంతో పాటు దాని పరివాహక ప్రాంతాన్ని అభివృద్ధి చేయాల్సిన అవసరం ఉందన్నారు. మూసీ ప్రక్షాళన వల్ల ఎవరికీ అన్యాయం జరగకుండా చూసే బాధ్యత ప్రభుత్వమే తీసుకుంటుందని హామీ ఇచ్చారు.

త్వరలోనే మూసీ పునరుజ్జీవన ప్రాజెక్టు తొలి దశ పనులను ప్రారంభించనున్నట్లు రేవంత్ రెడ్డి ప్రకటించారు. ఈ కార్యక్రమానికి రాజకీయాలకు అతీతంగా అందరూ సహకరించాలని ప్రతిపక్ష పార్టీలకు విజ్ఞప్తి చేశారు. ఎన్నికల సమయంలో మాత్రమే రాజకీయాలు చేయాలని, అభివృద్ధి విషయంలో అందరూ కలిసి పనిచేయాలని కోరారు. మూసీ నదితో హైదరాబాద్ నగర ప్రజల జీవన విధానం ముడిపడి ఉందని, అందుకే దాని పరిరక్షణకు సమిష్టి కృషి అవసరమని పేర్కొన్నారు.

మూసీ నదిని కేవలం సుందరీకరించడం మాత్రమే తమ లక్ష్యం కాదని, దానికి పూర్తిస్థాయిలో పునరుజ్జీవం కల్పించడమే ప్రభుత్వ ఉద్దేశమని సీఎం వివరించారు. చెరువులను ఆక్రమణల నుంచి విముక్తి చేసి, వాటిని ప్రజలకు ఉపయోగపడేలా అభివృద్ధి చేయాలని అధికారులకు సూచించారు.

తమ్మిడికుంట పరిసరాల్లో ప్రజలకు మెరుగైన సౌకర్యాలు కల్పించడంతో పాటు చెరువు ప్రాంతంలో భద్రతా ఏర్పాట్లు చేయాలని పోలీసు అధికారులను ఆదేశించారు. చెరువుల ఆధారంగా స్థానికంగా ఆర్థిక కార్యకలాపాలను ప్రోత్సహించేలా లేక్ ఎకానమీని అభివృద్ధి చేయాలని సూచించారు. అలాగే చెరువు ఆవరణలో జమ్మి చెట్టును నాటాలని హైడ్రా కమిషనర్ ఏవీ రంగనాథ్‌కు తెలిపారు.

చెరువుల ప్రాంగణాలను పండుగలు, సాంస్కృతిక కార్యక్రమాలకు వేదికలుగా తీర్చిదిద్దాలని సీఎం అభిప్రాయపడ్డారు. దసరా వంటి పండుగల వేడుకలను చెరువుల వద్ద నిర్వహించుకునేలా ఏర్పాట్లు చేయవచ్చని పేర్కొన్నారు. తద్వారా పర్యావరణ పరిరక్షణతో పాటు మన సంస్కృతి, సంప్రదాయాలను కూడా కాపాడుకోవచ్చని రేవంత్ రెడ్డి తెలిపారు.