Supreme Court on Cyber Fraud: సైబర్ మోసాల్లో బాధితులకు బ్యాంకులే నష్ట పరిహారం చెల్లించాలి.. కఠిన నిబంధనలు తీసుకురావాలని తెలిపిన సుప్రీంకోర్టు

Supreme Court on Cyber Fraud: దేశంలో రోజురోజుకూ పెరుగుతున్న డిజిటల్ సైబర్ మోసాల బాధితులకు ఊరట కల్పించేలా సుప్రీంకోర్టు అత్యంత కీలక వ్యాఖ్యలు చేసింది. డిజిటల్ మోసాలలో అమాయక బాధితులు కోల్పోయిన సొమ్ముకు బ్యాంకులే పూర్తి బాధ్యత వహించేలా కఠిన నిబంధనలు తీసుకురావాలని అత్యున్నత న్యాయస్థానం స్పష్టం చేసింది. సైబర్ నేరాల్లో నష్టపోయిన బాధితులకు బ్యాంకుల ద్వారానే తగిన పరిహారం చెల్లించేలా చట్టబద్ధమైన చర్యలు చేపట్టాలని పేర్కొంది. డిజిటల్ లావాదేవీల పేరుతో సాగుతున్న భారీ ఆర్థిక నేరాలను అరికట్టడంలో బ్యాంకింగ్ వ్యవస్థ పాత్ర అత్యంత కీలకమైనదని విచారణ సందర్భంగా సుప్రీంకోర్టు ప్రధానంగా అభిప్రాయపడింది.

బ్యాంకు ఖాతాల్లో జరిగే అసాధారణ , అనుమానాస్పద లావాదేవీలను ప్రాథమిక దశలోనే గుర్తించి, వెంటనే సంబంధిత పోలీస్ స్టేషన్లను అప్రమత్తం చేయడం బ్యాంకుల కనీస బాధ్యత అని అత్యున్నత ధర్మాసనం వ్యాఖ్యానించింది. అనుమానాస్పద లావాదేవీల వల్ల ఖాతాదారులు తమ కష్టార్జితాన్ని కోల్పోకుండా గట్టి రక్షణ చర్యలు చేపట్టాలని సూచించింది. దేశంలో ఈ ఏడాది డిజిటల్ నేరాలు 50 శాతం మేర తగ్గినప్పటికీ, బాధితులు ఏకంగా రూ. 800 కోట్లకు పైగా సొమ్మును కోల్పోవడం పట్ల కోర్టు తీవ్ర ఆందోళన వ్యక్తం చేసింది. దేశవ్యాప్తంగా కలకలం రేపుతున్న ‘డిజిటల్ అరెస్ట్’ పేరిట జరుగుతున్న సైబర్ దోపిడీలపై సుప్రీంకోర్టు సుమోటోగా విచారణ స్వీకరించింది. ఈ కేసులో తమ వాదనలు వినిపించేందుకు వాట్సాప్ (WhatsApp) సంస్థకు కోర్టు అనుమతి ఇవ్వగా, ఇప్పటివరకు 9,400 అనుమానాస్పద ఖాతాలను నిషేధించినట్లు వాట్సాప్ ఉన్నత న్యాయస్థానానికి వివరించింది.

మరోవైపు, సైబర్ నేరాలకు అడ్డుకట్ట వేసేందుకు రిజర్వ్ బ్యాంక్ ఆఫ్ ఇండియా (RBI) డిసెంబర్ 31 నుంచి అమల్లోకి తీసుకురానున్న నూతన కేవైసీ (KYC) సవరణ మార్గదర్శకాలను కూడా పరిశీలించాలని సుప్రీంకోర్టు నిర్ణయించింది. ఈ నూతన నిబంధనలు వర్తించే బ్యాంకుల సమగ్ర జాబితాను తమ ముందు ఉంచాలని ఆర్‌బీఐని ఆదేశించింది. రాబోయే రోజుల్లో ఈ నూతన కేవైసీ మార్గదర్శకాలు అమలు కానుండటంతో, డిజిటల్ అరెస్ట్ మోసాలు , సైబర్ నేరాల నియంత్రణలో అవి ఏ మేరకు ప్రభావవంతంగా పనిచేస్తాయనే అంశంపై ఉన్నత న్యాయస్థానం ప్రత్యేక దృష్టి సారించింది.