హైదరాబాద్‌లో మహిళా జర్నలిస్టుల జాతీయ సదస్సు..నిర్భయంగా ప్రశ్నించే గొంతుకలను అణచివేయలేరు: మంత్రి సీతక్క

సమాజ హితం కోసం ప్రశ్నించే మహిళా జర్నలిస్టుల గొంతుకలను అణచివేయలేరని రాష్ట్ర పంచాయతీరాజ్, మహిళా శిశు సంక్షేమ శాఖ మంత్రి ధనసరి అనసూయ (సీతక్క) స్పష్టం చేశారు. చేతిలో మైక్ పట్టుకున్న మహిళ శత్రువు కాదని, వ్యవస్థలోని లోపాలను ప్రశ్నించే పాత్రికేయులు ప్రజాస్వామ్యానికి ముప్పు కాదని పేర్కొన్నారు. మహిళా జర్నలిస్టులపై దాడులు, బెదిరింపులు, వ్యక్తిత్వ హననం వంటి చర్యలను తీవ్రంగా ఖండించారు. వృత్తిపరమైన హక్కుల పరిరక్షణ కోసం మహిళా జర్నలిస్టులంతా ఐక్యంగా పోరాడాలని పిలుపునిచ్చారు.

ఇండియన్ జర్నలిస్ట్స్ యూనియన్ (ఐజేయూ), మీడియా ఎడ్యుకేషన్ ఫౌండేషన్ ఇండియా (మెఫీ), తెలంగాణ రాష్ట్ర వర్కింగ్ జర్నలిస్టుల సంఘం (టీయూడబ్ల్యూజే) సంయుక్త ఆధ్వర్యంలో హైదరాబాద్‌లోని టూరిజం ప్లాజా హోటల్‌లో నిర్వహిస్తున్న రెండు రోజుల మహిళా జర్నలిస్టుల జాతీయ సదస్సు శనివారం ఘనంగా ప్రారంభమైంది. ఈ సందర్భంగా జరిగిన ప్రారంభోత్సవ సభలో మంత్రి సీతక్క మాట్లాడారు. దేశంలోని వివిధ రాష్ట్రాల నుంచి పెద్ద సంఖ్యలో మహిళా జర్నలిస్టులు ఈ సదస్సుకు హాజరయ్యారు.

మహిళల ప్రగతిపైనే సమాజ ప్రగతి ఆధారపడి ఉంటుందని డాక్టర్ బీఆర్ అంబేడ్కర్ ఏనాడో చెప్పారని సీతక్క గుర్తుచేశారు. రాజ్యాంగం కల్పించిన హక్కుల కోసం మహిళలు పోరాడుతున్నారే తప్ప, ఎవరి దయాదాక్షిణ్యాలపైనా ఆధారపడటం లేదని స్పష్టం చేశారు. జర్నలిజంలో మహిళలు ఎదుర్కొంటున్న సమస్యలను పరిష్కరించేందుకు, వారి వృత్తిపరమైన హక్కులను కాపాడేందుకు సమష్టి కృషి అవసరమని పేర్కొన్నారు.

ప్రజాస్వామ్య పరిరక్షణలో మహిళా జర్నలిస్టుల పాత్ర కీలకం

హైకోర్టు విశ్రాంత న్యాయమూర్తి, రాష్ట్ర వినియోగదారుల వివాదాల పరిష్కార కమిషన్ అధ్యక్షురాలు జస్టిస్ జి. రాధారాణి మాట్లాడుతూ.. ప్రజాస్వామ్య వ్యవస్థ మనుగడకు స్వతంత్ర పత్రికా రంగం ఎంతో అవసరమని అన్నారు. ప్రశ్నించే తత్వమే జర్నలిజానికి ప్రాణమని, నిష్పాక్షికమైన వాస్తవాలను ప్రజల ముందుంచడం పాత్రికేయుల ప్రధాన కర్తవ్యమని పేర్కొన్నారు.

రాజ్యాంగంలోని అధికరణ 19(1)(ఎ) భావ ప్రకటనా స్వేచ్ఛను కల్పిస్తుందని, అధికరణ 19(2) ఆ స్వేచ్ఛకు సంబంధించిన సహేతుకమైన పరిమితులను నిర్దేశిస్తుందని గుర్తుచేశారు. డిజిటల్ మాధ్యమాల విస్తరణతో పాటు తప్పుడు ప్రచారాలు, డీప్‌ఫేక్‌లు, కృత్రిమ మేధ (ఏఐ) సాంకేతికత కారణంగా వార్తల విశ్వసనీయతకు సవాళ్లు ఎదురవుతున్నాయని తెలిపారు. ఈ నేపథ్యంలో వార్తలను ప్రచురించే ముందు వాస్తవాలను క్షుణ్ణంగా పరిశీలించడం (ఫ్యాక్ట్ చెకింగ్) అత్యంత కీలకమని సూచించారు.

మీడియా సంస్థల్లో మహిళా జర్నలిస్టులకు సురక్షితమైన పని వాతావరణం కల్పించాలని, పని ప్రదేశాల్లో మహిళలపై లైంగిక వేధింపుల నిరోధక చట్టం (పోష్ చట్టం) నిబంధనలను పక్కాగా అమలు చేయాలని కోరారు. మహిళలకు వృత్తిపరమైన సమాన అవకాశాలు కల్పించడంతో పాటు వారి భద్రతకు తగిన చర్యలు తీసుకోవాలని సూచించారు.

ఫీల్డ్ రిపోర్టింగ్‌లో మహిళలు ముందుండాలి: ఐపీఎస్ సుమతి

మల్కాజ్‌గిరి పోలీస్ కమిషనర్ సుమతి మాట్లాడుతూ.. మహిళలు ప్రతి సమస్యను సమగ్రంగా విశ్లేషించే సామర్థ్యం కలిగి ఉంటారని పేర్కొన్నారు. మహిళా జర్నలిస్టులు కేవలం న్యూస్‌రూమ్‌లు, డెస్క్‌లకే పరిమితం కాకుండా క్షేత్రస్థాయి రిపోర్టింగ్‌లోనూ ముందుండాలని సూచించారు. నిర్భయంగా నాయకత్వం వహిస్తూ ప్రజాస్వామ్యానికి కొత్త దిశానిర్దేశం చేయాలని పిలుపునిచ్చారు.

వివిధ రంగాల్లో రాణించేందుకు మహిళలు అనేక సవాళ్లను, అవాంతరాలను అధిగమించాల్సి వస్తుందని వివరించారు. అడ్డంకులను అధిగమిస్తూ తమ ప్రతిభను నిరూపించుకున్నప్పుడే మరిన్ని అవకాశాలు అందిపుచ్చుకోగలరని పేర్కొన్నారు.

మానవీయ కోణంలో వార్తలు అందించాలి: ఆయేషా ఖానమ్

కర్ణాటక మీడియా అకాడమీ చైర్‌పర్సన్ ఆయేషా ఖానమ్ మాట్లాడుతూ.. న్యూస్‌రూమ్‌లలో మహిళా జర్నలిస్టులు తమ వృత్తిపరమైన ప్రతిభను నిరూపించుకోవాలని అన్నారు. సమాజంలోని ప్రజల సమస్యలను అర్థం చేసుకుంటూ, సానుభూతితో కూడిన మానవీయ కథనాలను ప్రజలకు అందించాలని సూచించారు.

అంతకుముందు ఐజేయూ అధ్యక్షుడు బల్వీందర్ సింగ్ జమ్మూ ప్రారంభోపన్యాసం చేస్తూ, క్షేత్రస్థాయిలో మహిళా జర్నలిస్టులు ఎదుర్కొంటున్న సవాళ్లు, సమస్యలను వివరించారు. ఎన్నికల సంఘం, ఎస్‌ఐఆర్‌ ప్రక్రియకు సంబంధించి నిర్భయంగా కథనాలు రాసిన జర్నలిస్టుల కృషిని ప్రస్తావిస్తూ, స్వతంత్రంగా పనిచేసే పాత్రికేయుల ప్రాధాన్యాన్ని వివరించారు.

పలువురు ప్రముఖుల హాజరు

ఈ కార్యక్రమానికి తెలంగాణ మీడియా అకాడమీ చైర్మన్ కె. శ్రీనివాసరెడ్డి, ఐజేయూ స్టీరింగ్ కమిటీ సభ్యుడు డి. అమర్, ఐజేయూ సెక్రటరీ జనరల్ డి. సోమసుందర్, ఐజేయూ నేత ఎస్.ఎన్. సిన్హా, టీయూడబ్ల్యూజే రాష్ట్ర అధ్యక్షుడు కె. విరాహత్ అలీ, ప్రధాన కార్యదర్శి కె. రామనారాయణ తదితరులు హాజరయ్యారు.

సీనియర్ జర్నలిస్టులు స్వప్న, టీయూడబ్ల్యూజే మహిళా విభాగం కన్వీనర్ రాజేశ్వరి కళ్యాణం, అత్తలూరి అరుణ ప్రారంభోత్సవ కార్యక్రమ నిర్వహణలో పాల్గొన్నారు.

మహిళా జర్నలిస్టుల వృత్తిపరమైన సమస్యలు, భద్రత, సమాన అవకాశాలు, ప్రజాస్వామ్య పరిరక్షణలో వారి పాత్ర వంటి అంశాలపై చర్చించేందుకు ఈ జాతీయ సదస్సు వేదికగా నిలిచింది. రెండు రోజుల పాటు జరిగే ఈ సమావేశాల్లో మహిళా పాత్రికేయులు ఎదుర్కొంటున్న సవాళ్లతో పాటు స్వతంత్ర జర్నలిజాన్ని మరింత బలోపేతం చేసే అంశాలపై చర్చించనున్నారు.