Kolkata Stampede Video: కోల్‌కతా దుర్గా పూజ తొక్కిసలాట, 17 మంది మృతి, 25 మందికి గాయాలు.. మృతుల కుటుంబాలకు రూ. 2 లక్షల పరిహారం ప్రకటించిన కేంద్రం..

Kolkata Stampede Video: ఉత్తర కోల్‌కతాలోని చోర్‌బాగాన్ సార్వజనీన దుర్గా పూజ పండాల్ వద్ద శనివారం సాయంత్రం జరిగిన తొక్కిసలాటలో 17 మంది ప్రాణాలు కోల్పోగా, మరో 25 మంది గాయపడ్డారు. వర్షం కురుస్తున్నప్పటికీ పండాల్‌ను సందర్శించేందుకు భారీ సంఖ్యలో ప్రజలు తరలివచ్చారు. ఈ క్రమంలో గిరీష్ పార్క్ పోలీస్ స్టేషన్ పరిధిలో రాత్రి 7.40 గంటల సమయంలో ఈ ఘటన చోటుచేసుకుంది.

వర్షం ప్రారంభం కాగానే పండాల్ వెలుపల వేచి ఉన్న సందర్శకులు ఒక్కసారిగా ముందుకు దూసుకెళ్లారని ఓ సీనియర్ పోలీసు అధికారి తెలిపారు. ఈ క్రమంలో కొందరు రోడ్డుపై పడిపోవడంతో తొక్కిసలాట చోటుచేసుకున్నట్లు వెల్లడించారు. గాయపడిన వారిని రక్షించి, చికిత్స నిమిత్తం కలకత్తా మెడికల్ కాలేజీ ఆసుపత్రికి తరలించారు.

పశ్చిమ బెంగాల్ ముఖ్యమంత్రి సువేందు అధికారి, ప్రధాన కార్యదర్శి మనోజ్ అగర్వాల్, ఆరోగ్య శాఖ మంత్రి శరద్వత్ ముఖర్జీతో పాటు పలువురు ఉన్నతాధికారులు క్షతగాత్రులను పరామర్శించేందుకు ఆసుపత్రికి చేరుకున్నారు. సహాయక చర్యల కోసం పోలీసులు, అగ్నిమాపక సిబ్బంది, విపత్తు నిర్వహణ బృందాలు, అంబులెన్సులు, వైద్య బృందాలను రంగంలోకి దించారు. భద్రతా కారణాల దృష్ట్యా సందర్శకుల ప్రవేశాన్ని నిలిపివేశారు.

ఈ ఘటనకు సంబంధించి ఓ ప్రత్యక్ష సాక్షి మాట్లాడుతూ.. తొక్కిసలాటలో పలువురు స్పృహ కోల్పోయారని, కొందరిని మోటార్‌సైకిళ్లపై ఆసుపత్రికి తరలించారని తెలిపారు. ఈ ఘటన దురదృష్టకరమని టీఎంసీ నాయకుడు కునాల్ ఘోష్ పేర్కొన్నారు. బాధితులను రక్షించడం ప్రస్తుతం అత్యంత ప్రాధాన్యమని ఆయన అన్నారు. ఆసుపత్రుల్లో వైద్య సిబ్బందిని పెంచాలని అధికార యంత్రాంగాన్ని కోరారు. పండాల్ లోపల కూడా సహాయక చర్యలు చేపట్టాల్సిన అవసరం ఉందని తెలిపారు.

పశ్చిమ బెంగాల్ గవర్నర్ ఆర్.ఎన్. రవి మృతుల కుటుంబాలకు ప్రగాఢ సానుభూతి తెలిపారు. గాయపడిన వారు త్వరగా కోలుకోవాలని ఆకాంక్షించారు. మరోవైపు, ఈ ఘటన తనను తీవ్ర దిగ్భ్రాంతికి, దుఃఖానికి గురిచేసిందని మమతా బెనర్జీ పేర్కొన్నారు. క్షతగాత్రులు త్వరగా కోలుకోవాలని ఆమె ఆకాంక్షించారు.

ఈ ఘటనలో మృతుల కుటుంబాలకు రూ. 2 లక్షల చొప్పున పరిహారం అందించనున్నట్లు ప్రధాని నరేంద్ర మోదీ ప్రకటించారు. Kolkata Stampede