YS Jaganకు భట్టి విక్రమార్క ఆహ్వానం.. కాంగ్రెస్‌లోకి రావాలని పిలుపు

Bhatti Vikramarka YS Jagan: వైఎస్ జగన్‌మోహన్‌రెడ్డి సహా కాంగ్రెస్‌ను వీడి వెళ్లిన నేతలు తిరిగి పార్టీలోకి రావాలని తెలంగాణ డిప్యూటీ సీఎం భట్టి విక్రమార్క పిలుపునిచ్చారు. SIR, CEC జ్ఞానేశ్ కుమార్‌పై కూడా కీలక వ్యాఖ్యలు చేశారు.

Bhatti Vikramarka YS Jagan: వైఎస్సార్ కాంగ్రెస్ పార్టీ అధినేత, ఆంధ్రప్రదేశ్ మాజీ ముఖ్యమంత్రి వైఎస్ జగన్‌మోహన్‌రెడ్డికి తెలంగాణ డిప్యూటీ సీఎం భట్టి విక్రమార్క కీలక ఆహ్వానం పలికారు. కాంగ్రెస్ పార్టీని వీడి సొంత పార్టీలు ఏర్పాటు చేసుకున్న లేదా ఇతర పార్టీల్లో చేరిన నేతలు తిరిగి హస్తం గూటికి రావాలని ఆయన పిలుపునిచ్చారు. ఈ క్రమంలో వైఎస్ జగన్‌తో పాటు శరద్ పవార్, మమతా బెనర్జీ వంటి నేతలను కూడా భట్టి ప్రస్తావించారు. కాంగ్రెస్ సిద్ధాంతాలను ముందుకు తీసుకెళ్లేందుకు పాత నేతలంతా తిరిగి కలిసి పనిచేయాలని ఆయన కోరారు. కేరళలోని కొచ్చిలో జరుగుతున్న India Today Conclave South 2026లో భట్టి విక్రమార్క పాల్గొని పలు రాజకీయ అంశాలపై మాట్లాడారు. ఈ సందర్భంగా వైఎస్ రాజశేఖరరెడ్డితో తనకు ఉన్న అనుబంధాన్ని గుర్తుచేసుకున్నారు. తాను వైఎస్సార్‌తో కలిసి పనిచేశానని, అయితే ఆయన కుమారుడు జగన్‌మోహన్‌రెడ్డితో మాత్రం కలిసి పనిచేయలేదని భట్టి స్పష్టం చేశారు. వైఎస్సార్ మరణం తర్వాత జగన్ కాంగ్రెస్‌ను వీడి 2011లో వైఎస్సార్ కాంగ్రెస్ పార్టీని ఏర్పాటు చేసిన విషయాన్ని ప్రస్తావిస్తూ.. కాంగ్రెస్ నుంచి బయటకు వెళ్లిన నేతలు తిరిగి పార్టీలోకి వస్తే కలిసి పనిచేసి పార్టీని మరింత బలోపేతం చేయవచ్చని భట్టి అభిప్రాయపడ్డారు.

మమత, శరద్ పవార్ పేర్లు కూడా ప్రస్తావన

కాంగ్రెస్‌ను వీడి సొంత రాజకీయ పార్టీలు ఏర్పాటు చేసుకున్న ఇతర నేతలకు కూడా భట్టి ఇదే పిలుపునిచ్చారు. పశ్చిమ బెంగాల్‌లో తృణమూల్ కాంగ్రెస్‌ను ఏర్పాటు చేసిన మమతా బెనర్జీ, నేషనలిస్ట్ కాంగ్రెస్ పార్టీని ఏర్పాటు చేసిన శరద్ పవార్ వంటి నేతలు తిరిగి కాంగ్రెస్‌లోకి రావాలని ఆయన కోరారు.

దేశవ్యాప్తంగా కాంగ్రెస్‌ను వీడి వెళ్లిన నాయకులు తిరిగి వస్తే పార్టీ సిద్ధాంతాలను ముందుకు తీసుకెళ్లేందుకు కలిసి పనిచేయవచ్చని భట్టి పేర్కొన్నారు. పాత నేతలు తిరిగి కాంగ్రెస్‌లో చేరడం తనకు సంతోషాన్ని కలిగిస్తుందని ఆయన అన్నారు.

కాంగ్రెస్ నుంచి బయటకు వెళ్లిన నేతలు ఎవరు?

దేశ రాజకీయాల్లో కాంగ్రెస్‌తో సుదీర్ఘ అనుబంధం ఉన్న పలువురు నేతలు ఆ తర్వాత సొంత రాజకీయ పార్టీలను ఏర్పాటు చేసుకున్నారు. మమతా బెనర్జీ 1998లో కాంగ్రెస్‌ను వీడి తృణమూల్ కాంగ్రెస్‌ను ఏర్పాటు చేశారు. 1999లో శరద్ పవార్, పీఏ సంగ్మా, తారిఖ్ అన్వర్ కాంగ్రెస్ నుంచి విడిపోయి నేషనలిస్ట్ కాంగ్రెస్ పార్టీని స్థాపించారు.

ఇక ఉమ్మడి ఆంధ్రప్రదేశ్‌లో వైఎస్ రాజశేఖరరెడ్డి ముఖ్యమంత్రిగా ఉన్న సమయంలో కాంగ్రెస్‌లో కీలక నేతగా ఉన్న జగన్‌మోహన్‌రెడ్డి.. వైఎస్సార్ మరణం తర్వాత కాంగ్రెస్‌ను వీడి అనంతరం వైఎస్సార్ కాంగ్రెస్ పార్టీని స్థాపించారు. దీంతో భట్టి తాజా వ్యాఖ్యలు ఏపీ రాజకీయాల్లోనూ చర్చకు దారితీశాయి.

SIRపై ఈసీపై భట్టి విమర్శలు

ఇదే కార్యక్రమంలో ఎన్నికల సంఘం చేపడుతున్న స్పెషల్ ఇంటెన్సివ్ రివిజన్ (SIR)పై కూడా భట్టి విక్రమార్క స్పందించారు. ఓటర్ల జాబితా సవరణ ప్రక్రియపై ప్రజల్లో అనుమానాలు ఏర్పడుతున్నాయని ఆయన పేర్కొన్నారు. ఎన్నికల ప్రక్రియపై ప్రజలకు నమ్మకం కల్పించడం ఎన్నికల సంఘం ప్రధాన బాధ్యత అని అన్నారు.

ఓటర్ల జాబితా నుంచి పెద్ద సంఖ్యలో పేర్లు తొలగిస్తున్నారంటూ ప్రతిపక్షాలు చేస్తున్న ఆరోపణలను భట్టి ప్రస్తావించారు. అయితే ఎన్నికల సంఘం మాత్రం SIR ప్రక్రియ చట్టపరమైన నిబంధనలకు అనుగుణంగానే కొనసాగుతోందని చెబుతోంది. SIRపై రాజకీయ పార్టీల విమర్శలు, ఎన్నికల సంఘం వివరణల మధ్య ప్రస్తుతం దేశవ్యాప్తంగా చర్చ కొనసాగుతోంది.

CEC జ్ఞానేశ్ కుమార్ రాజీనామాకు డిమాండ్

ఎన్నికల ప్రక్రియపై ప్రజలకు సందేహాలు ఉంటే వాటిని నివృత్తి చేయాల్సిన బాధ్యత ఎన్నికల సంఘంపైనే ఉందని భట్టి అన్నారు. ఓటింగ్ ప్రక్రియపై అనుమానాలు కొనసాగితే బ్యాలెట్ పేపర్ల వినియోగం వంటి ప్రత్యామ్నాయాలపై కూడా ఆలోచించాల్సిన అవసరం ఉందని ఆయన అభిప్రాయపడ్డారు.

SIR విషయంలో ఎన్నికల కమిషన్‌లోనే భిన్నాభిప్రాయాలు ఉన్నాయంటూ వచ్చిన వార్తలు ప్రజల్లో మరిన్ని అనుమానాలకు కారణమవుతున్నాయని భట్టి పేర్కొన్నారు. ఈ నేపథ్యంలో ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని ఆయన డిమాండ్ చేశారు.

తెలంగాణ ప్రభుత్వ పథకాలపై భట్టి వివరణ

రేవంత్‌రెడ్డి ప్రభుత్వం అమలు చేస్తున్న సంక్షేమ పథకాలను కేవలం ఉచిత పథకాలుగా చూడటం సరికాదని భట్టి విక్రమార్క అన్నారు. ఇందిరమ్మ ఇళ్లు, రాజీవ్ ఆరోగ్యశ్రీ, మహిళలకు ఉచిత బస్సు ప్రయాణం, 200 యూనిట్ల వరకు ఉచిత విద్యుత్ వంటి పథకాలను ఆయన ప్రస్తావించారు.

రైతు భరోసా ద్వారా రైతులకు ఆర్థిక సహాయం అందించడం వల్ల వారు వ్యవసాయంలో పెట్టుబడులు పెట్టి ఉత్పత్తిని పెంచే అవకాశం ఉంటుందని వివరించారు. ఈ పథకాలు సామాజిక సంక్షేమంతో పాటు ఆర్థిక వ్యవస్థపై కూడా ప్రభావం చూపుతాయని ఆయన పేర్కొన్నారు.

కేంద్ర పన్నుల వాటాపైనా వ్యాఖ్యలు

తెలంగాణకు కేంద్ర పన్నుల్లో లభిస్తున్న వాటాపైనా భట్టి విక్రమార్క తన అభిప్రాయాన్ని వెల్లడించారు. రాష్ట్రాలు కేంద్రానికి అందిస్తున్న పన్నుల ఆదాయానికి అనుగుణంగా న్యాయమైన వాటా తిరిగి రావాల్సిన అవసరం ఉందని అన్నారు.

తెలంగాణతో పాటు దక్షిణాది రాష్ట్రాలు కూడా ఈ విషయంలో ఆందోళన వ్యక్తం చేస్తున్నాయని పేర్కొన్నారు. దేశం సమాఖ్య వ్యవస్థలో కొనసాగుతున్నందున కేంద్రం, రాష్ట్రాల మధ్య ఆర్థిక వనరుల పంపిణీలో సమాఖ్య స్ఫూర్తిని పాటించాలని భట్టి కోరారు.

రేవంత్‌తో సంబంధాలపై భట్టి ఏమన్నారు?

ముఖ్యమంత్రి రేవంత్‌రెడ్డితో తన సంబంధాలపై కూడా భట్టి విక్రమార్క స్పందించారు. తెలంగాణలో కాంగ్రెస్ ప్రభుత్వం సమష్టిగా పనిచేస్తోందని చెప్పారు. ప్రభుత్వ నిర్ణయాలను నేతలంతా చర్చించుకుని, పార్టీ సిద్ధాంతాలకు అనుగుణంగా తీసుకుంటున్నామని తెలిపారు. తన రాజకీయ భవిష్యత్తును కుల సమీకరణాల ఆధారంగా చూడటం సరికాదని భట్టి అన్నారు. కాంగ్రెస్‌లో పనిచేస్తున్న ప్రతి నాయకుడు, కార్యకర్త పార్టీకి చెందినవారేనని, సమష్టి నాయకత్వంతో ప్రభుత్వం ముందుకు సాగుతోందని ఆయన పేర్కొన్నారు.