AP Home Guards: ఏపీ హోంగార్డులకు గుడ్‌న్యూస్.. డ్రైవర్ కానిస్టేబుల్ ఉద్యోగాల్లో 10% కోటా

AP Home Guards: ఏపీ పోలీస్ శాఖలో స్టైపెండరీ కానిస్టేబుల్ డ్రైవర్ పోస్టుల్లో హోంగార్డులకు 10 శాతం రిజర్వేషన్ కల్పించారు. 198 డ్రైవర్ పోస్టులతో పాటు 1,156 కానిస్టేబుల్ పోస్టులు, 378 ఎస్‌ఐ పోస్టుల వివరాలు తెలుసుకోండి.

AP Home Guards: ఆంధ్రప్రదేశ్‌లోని హోంగార్డులకు రాష్ట్ర ప్రభుత్వం కీలక ఊరట కల్పించింది. పోలీస్ శాఖలో స్టైపెండరీ కానిస్టేబుల్ (డ్రైవర్) పోస్టుల భర్తీలో హోంగార్డులకు ప్రత్యేకంగా 10 శాతం రిజర్వేషన్ కల్పిస్తూ ప్రభుత్వం నిర్ణయం తీసుకుంది. ఈ మేరకు గతంలో జారీ చేసిన ప్రభుత్వ ఉత్తర్వులను సవరిస్తూ తాజాగా ఆదేశాలు వెలువడ్డాయి.

పోలీస్ ట్రాన్స్‌పోర్ట్ ఆర్గనైజేషన్ పరిధిలో స్టైపెండరీ కానిస్టేబుల్ (డ్రైవర్) పోస్టులను భర్తీ చేయనున్న నేపథ్యంలో ఈ మార్పు చేశారు. మొత్తం 198 డ్రైవర్ కానిస్టేబుల్ పోస్టుల నియామకంలో హోంగార్డులకు ఈ ప్రత్యేక కోటా వర్తించనుంది.

198 డ్రైవర్ పోస్టుల్లో హోంగార్డులకు ప్రత్యేక కోటా

ఏపీ పోలీస్ శాఖలో స్టైపెండరీ కానిస్టేబుల్ (డ్రైవర్) పోస్టులను డైరెక్ట్ రిక్రూట్‌మెంట్ విధానంలో భర్తీ చేయనున్నారు. తాజాగా తీసుకున్న నిర్ణయం ప్రకారం ఈ పోస్టుల్లో 10 శాతం స్థానాలను హోంగార్డులకు కేటాయించనున్నారు.

ఇప్పటివరకు అమల్లో ఉన్న నిబంధనల్లో మార్పులు చేస్తూ హోంశాఖ ఉత్తర్వులు జారీ చేసింది. ఇతర ప్రత్యేక కేటగిరీలకు వర్తించే రిజర్వేషన్లలో ఎలాంటి మార్పు ఉండదని ప్రభుత్వం స్పష్టం చేసింది.

దీంతో 198 స్టైపెండరీ కానిస్టేబుల్ (డ్రైవర్) పోస్టుల నియామక ప్రక్రియలో అర్హత కలిగిన హోంగార్డులకు ప్రత్యేక అవకాశాలు లభించనున్నాయి.

1,156 కానిస్టేబుల్, ఫైర్‌మెన్, వార్డర్ పోస్టులు

మరోవైపు ఏపీ స్టేట్ లెవల్ పోలీస్ రిక్రూట్‌మెంట్ బోర్డు (SLPRB) పోలీస్, ఫైర్ సర్వీసెస్, జైళ్ల శాఖల్లో ఖాళీల భర్తీకి నోటిఫికేషన్ విడుదల చేసింది. మొత్తం 1,156 పోస్టులను ఈ నియామక ప్రక్రియ ద్వారా భర్తీ చేయనున్నారు.

ఈ పోస్టులకు ఇంటర్మీడియట్ లేదా దానికి సమానమైన విద్యార్హత ఉన్న అభ్యర్థులు దరఖాస్తు చేసుకునే అవకాశం ఉంటుంది. ఎంపిక ప్రక్రియలో ప్రిలిమినరీ పరీక్ష, శారీరక సామర్థ్య పరీక్షలు, మెయిన్స్ పరీక్ష వంటి దశలు ఉంటాయి.

కానిస్టేబుల్ పోస్టులకు ఎంపికైన అభ్యర్థులకు పే స్కేల్ ప్రకారం నెలకు రూ.25,220 నుంచి రూ.80,910 వరకు వేతనం లభించనుంది. దరఖాస్తు, పరీక్షలకు సంబంధించిన తేదీలను రిక్రూట్‌మెంట్ బోర్డు అధికారికంగా వెల్లడించాల్సి ఉంది.

378 ఎస్‌ఐ పోస్టుల భర్తీకి కూడా నోటిఫికేషన్

ఇదిలా ఉండగా ఏపీ పోలీస్ శాఖలో సబ్‌ఇన్‌స్పెక్టర్ పోస్టుల భర్తీకి కూడా SLPRB నోటిఫికేషన్ విడుదల చేసింది. ఏపీ పోలీస్ ఎస్‌పీఎఫ్ సబ్‌ఆర్డినేట్ సర్వీస్‌లో రెగ్యులర్ ప్రాతిపదికన మొత్తం 378 పోస్టులను భర్తీ చేయనున్నారు.

ఈ పోస్టులకు దరఖాస్తు చేసుకునే అభ్యర్థులు ఏదైనా గుర్తింపు పొందిన సంస్థ నుంచి డిగ్రీ పూర్తి చేసి ఉండాలి. ఎంపికైన వారికి నెలకు రూ.44,570 నుంచి రూ.1,27,480 వరకు వేతన శ్రేణి ఉంటుంది.

ఎస్‌ఐ నియామక ప్రక్రియలో ప్రిలిమినరీ రాత పరీక్ష, దేహదార్ఢ్య కొలతలు (PMT), దేహదార్ఢ్య పరీక్ష (PET), తుది రాత పరీక్ష వంటి దశలు ఉంటాయి.

అర్హత, వయోపరిమితి, దరఖాస్తు విధానం, పరీక్ష తేదీలు, ఇతర నిబంధనలకు సంబంధించిన పూర్తి వివరాలను అభ్యర్థులు SLPRB అధికారిక నోటిఫికేషన్‌లో పరిశీలించాలి.