One Last Kiss: ఎనిమిదేళ్ల బంధానికి భావోద్వేగ వీడ్కోలు.. చివరి ముద్దు ఇచ్చి కన్నీళ్లు పెట్టుకున్న బస్సు డ్రైవర్.. స్పందించిన కేరళ సీఎం..

One Last Kiss: కేరళ రాష్ట్ర రోడ్డు రవాణా సంస్థ (కేఎస్‌ఆర్టీసీ)లో సుదీర్ఘ కాలం సేవలందించి పదవీ విరమణ పొందిన ఒక డ్రైవర్, తన వాహనంతో ఉన్న ఎనిమిదేళ్ల అనుబంధానికి కంటతడి పెట్టించే రీతిలో వీడ్కోలు పలికారు. ఇడుక్కికి చెందిన పాల్ కురియన్ అనే డ్రైవర్, తాను ఏళ్ల తరబడి నడిపిన బస్సుకు ఆప్యాయంగా ముద్దుపెట్టి, గౌరవంగా నమస్కరించిన దృశ్యాలు సామాజిక మాధ్యమాల్లో తీవ్రంగా వైరల్ కాగా, స్వయంగా కేరళ ముఖ్యమంత్రి కూడా ఈ ఘటనపై స్పందించారు.

పాల్ కురియన్ కేఎస్ఆర్టీసీలో గత 18 ఏళ్లుగా డ్రైవర్‌గా పనిచేస్తున్నారు. అందులోనూ ముఖ్యంగా గత ఎనిమిదేళ్లుగా ఇడుక్కి-కుమిలి మార్గంలో ఒకే బస్సును క్రమం తప్పకుండా నడుపుతున్నారు. అధికారికంగా ఆయన ఈ ఏడాది అక్టోబర్ 31న ఉద్యోగ విరమణ చేయాల్సి ఉన్నప్పటికీ, మంగళవారం ఆయనకు చివరి పని రోజు కావడం, ఆపై రిటైర్మెంట్ వరకు సెలవుల్లో ఉండనుండటంతో ఆ రోజు విధులను ముగించారు. 18 ఏళ్ల డ్రైవింగ్ జీవితానికి, ముఖ్యంగా ఎనిమిదేళ్లుగా తనతో ఉన్న బస్సుకు ముద్దుపెట్టి, టైర్లను తాకి నమస్కరిస్తూ ఆయన భావోద్వేగంగా వీడ్కోలు తీసుకున్నారు.

ఈ హృదయాన్ని హత్తుకునే దృశ్యాల వీడియో కేరళ ముఖ్యమంత్రి దృష్టికి వెళ్లడంతో ఆయన సామాజిక మాధ్యమాల వేదికగా స్పందించారు. బస్సుకు అత్యంత గౌరవంగా వంగి వీడ్కోలు చెప్పిన పాల్ కురియన్ అభిమానం తనను తీవ్రంగా కదిలించిందని సీఎం పేర్కొన్నారు. పాల్ లాంటి వేలాది మంది ఉద్యోగుల అంకితభావం, వారి ప్రేమే రాష్ట్ర ప్రజా రవాణా వ్యవస్థకు అసలైన బలమని కొనియాడారు. కేఎస్ఆర్టీసీని సాంకేతికంగా ఆధునికీకరిస్తూనే, ప్రజల జీవనాడిగా దాని పాత్రను మరింత బలోపేతం చేస్తామని సీఎం హామీ ఇచ్చారు.

• Botsa Family: బొత్స కుటుంబానికి షాక్.. చైతన్య నామినేషన్ తిరస్కరణతో రాజకీయంగా చర్చ..
• Paddy Prices: తెలంగాణలో వడ్లకు రికార్డు ధర.. క్వింటాల్‌కు రూ.5,016.. బియ్యం ధరలు మరింత పెరిగే ఛాన్స్..?
• Cyclone Alert: బంగాళాఖాతంలో తుపాను ముప్పు.. అక్టోబర్ 27 నుంచి ఏపీలో భారీ వర్షాలు…
• హైదరాబాద్‌లో మహిళా జర్నలిస్టుల జాతీయ సదస్సు..నిర్భయంగా ప్రశ్నించే గొంతుకలను అణచివేయలేరు: మంత్రి సీతక్క
• Neha Bora: పీస్ బాండ్‌పై సంతకం చేయను.. నేహా బోరా