HYDRAA Driver Jobs: తెలంగాణలో ఇంతమంది నిరుద్యోగులా.. హైడ్రాలో 150 డ్రైవర్ పోస్టుల కోసం తరలివచ్చిన వేలాది మంది..

Prajapaksham 08 Aug 2026 1 నిమిషాల పఠనం తెలంగాణ

HYDRAA Driver Jobs

HYDRAA Driver Jobs: హైదరాబాద్ విపత్తు ప్రతిస్పందన, ఆస్తుల పరిరక్షణ ఏజెన్సీ (HYDRAA) చేపట్టిన డ్రైవర్ ఉద్యోగాల భర్తీ ప్రక్రియ తీవ్ర గందరగోళానికి దారితీసింది. సరూర్‌నగర్ స్టేడియం వేదికగా శనివారం, ఆదివారం రోజుల్లో డ్రైవింగ్ ఈవెంట్స్ నిర్వహిస్తామని అధికారులు ప్రకటించడంతో రాష్ట్రంలోని నలుమూలల నుంచి నిరుద్యోగ యువత వేలాదిగా పోటెత్తారు. తీవ్ర జనం రద్దీ, అధికారుల నిర్లక్ష్యం కారణంగా స్టేడియం ప్రాంగణంలో తోపులాట చోటుచేసుకుంది. ఈ ఘటన తెలంగాణలో ఏళ్ల తరబడిగా పేరుకుపోయిన నిరుద్యోగ సమస్య తీవ్రతకు ప్రత్యక్ష నిదర్శనంగా నిలిచింది.

హైడ్రా ఇటీవల కేవలం 150 డ్రైవర్ పోస్టుల భర్తీకి ప్రకటన విడుదల చేసింది. శనివారం తెల్లవారుజామున 4 గంటల నుంచే రాష్ట్రంలోని విభిన్న జిల్లాల నుంచి వేలాది మంది నిరుద్యోగులు సరూర్‌నగర్ స్టేడియానికి చేరుకున్నారు. కేవలం 150 ఖాళీలకే ఊహించని రీతిలో పది వేలకు పైగా అభ్యర్థులు తరలిరావడంతో స్టేడియం పరిసరాలు, ప్రధాన రహదారులు నిరుద్యోగులతో కిక్కిరిసిపోయాయి.

గంటల తరబడి క్యూ లైన్లలో నిలబడినప్పటికీ అధికారుల నుంచి ఎలాంటి స్పష్టమైన సమాచారం గానీ, సరైన నిర్వహణ గానీ లేకపోవడంతో నిరుద్యోగులు తీవ్ర అసహనానికి గురయ్యారు. వేసవి ఎండ, ఉక్కపోతకు తోడు కనీసం తాగడానికి మంచినీరు కూడా అందుబాటులో ఉంచకపోవడంతో ఆగ్రహించిన అభ్యర్థులు స్టేడియం వద్ద నిరసనకు దిగారు. క్యూలైన్లలో తోపులాట జరగడంతో కొందరు అభ్యర్థులు ఊపిరి ఆడక తీవ్ర ఇబ్బందులు పడ్డారు. సమాచారం అందుకున్న పోలీసులు వెంటనే ఘటనా స్థలానికి చేరుకుని పరిస్థితిని అదుపులోకి తెచ్చారు. రద్దీని తగ్గించేందుకు ప్రస్తుతం అభ్యర్థులకు టోకెన్లు జారీ చేసి, నిర్ణీత సమయాల్లో రావలసిందిగా కోరి వెనక్కి పంపుతున్నారు.

సరూర్‌నగర్ స్టేడియం వద్ద జరిగిన ఈ తోపులాట ఘటన తెలంగాణలో స్వల్పకాలిక, కాంట్రాక్టు ఉద్యోగాలకు కూడా ఏ స్థాయిలో పోటీ ఉందో కళ్లకు కట్టింది. ఐటీ, రియల్ ఎస్టేట్ రంగాలు అభివృద్ధి చెందుతున్నప్పటికీ.. సాధారణ డిగ్రీలు, సాంకేతిక విద్యను అభ్యసించిన యువతకు తగిన ఉపాధి అవకాశాలు లభించకపోవడమే ఈ పరిస్థితికి కారణమని సామాజిక విశ్లేషకులు అభిప్రాయపడుతున్నారు.

ప్రభుత్వ శాఖల్లో ఖాళీల భర్తీ ప్రక్రియలో జరుగుతున్న ఆలస్యం, న్యాయపరమైన చిక్కుల వల్ల లక్షలాది మంది నిరుద్యోగులు ఏళ్లుగా సరైన ఉద్యోగాలు లేక ఎదురుచూస్తున్నారు. డ్రైవర్, అటెండర్ వంటి స్వల్ప వేతన పోస్టులకు సైతం బి.టెక్, పీజీ చదివిన అర్హత కలిగిన యువత పోటీపడటం రాష్ట్రంలో నిరుద్యోగం ఏ స్థాయిలో ఉందో స్పష్టం చేస్తోంది. దూరప్రాంతాల నుంచి రవాణా చార్జీలు పెట్టుకుని, రాత్రింబవళ్లు ప్రయాణించి వస్తే అధికారులు కనీస వసతులు కల్పించకుండా అవమానించారని అభ్యర్థులు వాపోతున్నారు.

ప్రభుత్వ ఉద్యోగాల భర్తీ ప్రక్రియను వేగవంతం చేసి, ప్రైవేటు, నైపుణ్యాధారిత రంగాల్లో యువతకు శాశ్వత ఉపాధి అవకాశాలు కల్పించకపోతే భవిష్యత్తులో నిరుద్యోగ నిరసనలు మరింత తీవ్రరూపం దాల్చే ప్రమాదముందని నిపుణులు హెచ్చరిస్తున్నారు.