కేంద్ర జలశక్తి మంత్రితో సీఎం రేవంత్ రెడ్డి భేటీ.. తుమ్మిడిహెట్టి ఎత్తు పెంపుపై మహారాష్ట్రతో చర్చలకు విజ్ఞప్తి

Prajapaksham 05 Aug 2026 0 నిమిషాల పఠనం తెలంగాణ

CM Revanth Reddy Meets Union Jal Shakti Minister, Seeks Nod for Tummidihetti Project

తెలంగాణ రాష్ట్రానికి చెందిన కీలకమైన సాగునీటి ప్రాజెక్టుల సాధన దిశగా ముఖ్యమంత్రి ఎ.రేవంత్ రెడ్డి న్యూఢిల్లీలో వేగంగా అడుగులు వేస్తున్నారు. బుధవారం కేంద్ర జలశక్తి శాఖ మంత్రి సీఆర్ పాటిల్‌తో సీఎం రేవంత్ రెడ్డి ఉన్నత స్థాయి భేటీ నిర్వహించారు. ఈ సమావేశంలో రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డితో పాటు పలువురు ఎంపీలు పాల్గొన్నారు. ఈ భేటీలో ప్రధానంగా తుమ్మిడిహెట్టి ప్రాజెక్టు నిర్మాణానికి సంబంధించి ఎదురవుతున్న అంతర్రాష్ట్ర ప్రతిబంధకాలను తొలగించేందుకు కేంద్ర ప్రభుత్వం వెంటనే జోక్యం చేసుకోవాలని ముఖ్యమంత్రి కోరారు.

తుమ్మిడిహెట్టి వద్ద గతంలోనే 148 మీటర్ల ఎత్తుతో ప్రాజెక్టును నిర్మించడానికి మహారాష్ట్ర ప్రభుత్వం అంగీకరించిందనే విషయాన్ని సీఎం రేవంత్ రెడ్డి కేంద్ర మంత్రి పాటిల్ దృష్టికి తీసుకెళ్లారు. అయితే, ప్రస్తుత అవసరాల దృష్ట్యా ఈ ప్రాజెక్టు ఎత్తును 150 మీటర్లకు పెంచి నిర్మించాల్సిన అవసరం ఉందన్నారు. ఈ విషయమై మహారాష్ట్ర ప్రభుత్వాన్ని ఒప్పించేలా కేంద్ర జలశక్తి శాఖ చొరవ చూపాలని విజ్ఞప్తి చేశారు.

ప్రాజెక్టు ఎత్తును 150 మీటర్లకు పెంచినప్పటికీ ముంపు సమస్య చాలా స్వల్పంగా ఉంటుందని సీఎం వివరించారు. ఎత్తు పెంచినా ముంపు ప్రాంతం 1,000 హెక్టార్ల లోపే ఉంటుందని స్పష్టం చేశారు. తుమ్మిడిహెట్టి వద్ద ఈ ఎత్తుతో ప్రాజెక్టు నిర్మిస్తే ఎత్తిపోతల (లిఫ్ట్) అవసరం లేకుండానే, రూపాయి విద్యుత్ ఖర్చు లేకుండా గ్రావిటీ ద్వారానై సహజ సిద్ధంగా నీటిని సరఫరా చేసుకునే వెసులుబాటు కలుగుతుందని తెలిపారు. తెలంగాణ రైతులకు ఎంతో లబ్ధి చేకూర్చే ఈ ప్రాజెక్టు విషయంలో కేంద్ర ప్రభుత్వం సానుకూలంగా స్పందించి, మహారాష్ట్రతో చర్చలు జరిపి సమస్యను త్వరగా పరిష్కరించాలని ముఖ్యమంత్రి రేవంత్ రెడ్డి కోరారు.

కేంద్ర జలశక్తి మంత్రితో సీఎం రేవంత్ రెడ్డి భేటీ.. తుమ్మిడిహెట్టి ఎత్తు పెంపుపై మహారాష్ట్రతో చర్చలకు విజ్ఞప్తి

సంబంధిత వార్తలు