Andhra Pradesh Rains: భారీ వర్షాలకు వణికిన ఉత్తరాంధ్ర.. తీరం దాటిన వాయుగుండం.. పలు విమానాలు దారి మళ్లింపు.. నేడు రేపు ఏపీ వ్యాప్తంగా కుండపోత వర్షాలు

jagan 24 Sep 2026 1 నిమిషాల పఠనం ఆంధ్రప్రదేశ్

Andhra Pradesh Rains

Andhra Pradesh Rains: ఆంధ్రప్రదేశ్‌లో భారీ వర్షాలు బీభత్సం సృష్టిస్తున్నాయి. బంగాళాఖాతంలో ఏర్పడిన తీవ్ర వాయుగుండం ప్రభావంతో ఉత్తరాంధ్ర జిల్లాల్లో ఎడతెరిపిలేని వర్షాలు కురుస్తున్నాయి. శ్రీకాకుళం, విజయనగరం, పార్వతీపురం మన్యం, విశాఖపట్నం, అల్లూరి సీతారామరాజు, అనకాపల్లి జిల్లాలతో పాటు ఉమ్మడి తూర్పుగోదావరి, ఏలూరు, కృష్ణా ప్రాంతాల్లోనూ భారీ వర్షాలు కురిసాయి. వాగులు, వంకలు, చెరువులు పొంగిపొర్లడంతో పలు ప్రాంతాల్లో రాకపోకలకు అంతరాయం ఏర్పడింది. లోతట్టు ప్రాంతాలు నీటమునిగాయి. ఈదురుగాలులకు చెట్లు, విద్యుత్ స్తంభాలు నేలకొరిగాయి. పంటలకు కూడా నష్టం వాటిల్లింది.

భారత వాతావరణ శాఖ ప్రకారం.. బంగాళాఖాతంలో ఏర్పడిన డీప్ డిప్రెషన్ సెప్టెంబర్ 23 రాత్రి కళింగపట్నం సమీపంలో తీరం దాటింది. IMD ప్రకారం, సెప్టెంబర్ 23 రాత్రి 11 గంటల నుంచి సెప్టెంబర్ 24 తెల్లవారుజాము 1 గంట మధ్య గంటకు 55–65 కిలోమీటర్ల వేగంతో వీచిన గాలులు, 75 కిలోమీటర్ల వరకు గరిష్ఠ వేగంతో గాలులతో ఇది తీరాన్ని దాటింది. అనంతరం ఉత్తర కోస్తా ఆంధ్రలోకి ప్రవేశించి పశ్చిమ-వాయవ్య దిశగా కదులుతోంది. రాబోయే 12 గంటలపాటు డీప్ డిప్రెషన్ తీవ్రత కొనసాగి, ఆ తర్వాత క్రమంగా బలహీనపడే అవకాశం ఉందని IMD తెలిపింది.

విశాఖలో రికార్డు స్థాయిలో వర్షం

డీప్ డిప్రెషన్ ప్రభావంతో విశాఖపట్నం జిల్లాలో అత్యంత భారీ వర్షపాతం నమోదైంది. APSDMA వెల్లడించిన వివరాల ప్రకారం.. సెప్టెంబర్ 24 ఉదయం 7 గంటల వరకు 24 గంటల వ్యవధిలో రాష్ట్రంలోని 80 ప్రాంతాల్లో 100 మిల్లీమీటర్లకు పైగా వర్షపాతం నమోదైంది. విశాఖపట్నం రూరల్ పరిధిలోని తులసినగర్‌లో అత్యధికంగా 236 మిల్లీమీటర్ల వర్షపాతం నమోదైంది. మధురవాడలో 218 మి.మీ., ఎండాడలో 210 మి.మీ., సీతమ్మధారలో 205 మి.మీ. వర్షం కురిసింది. దీంతో విశాఖ నగరంలోని పలు ప్రాంతాలు జలమయమయ్యాయి.

విశాఖలో ప్రధాన రహదారులపై భారీగా నీరు చేరడంతో ట్రాఫిక్‌కు తీవ్ర అంతరాయం ఏర్పడింది. డ్రైనేజీలు పొంగిపొర్లడంతో లోతట్టు ప్రాంతాలు నీటమునిగాయి. కస్తూరినగర్‌లో కొండచరియలు విరిగిపడటంతో స్థానికులు భయాందోళనకు గురయ్యారు. టి.నగరపాలెం సమీపంలో గోస్తనీ నదిపై ఉన్న మట్టికట్ట వరద నీటికి కొట్టుకుపోయింది. పలు ప్రాంతాల్లో చెట్లు నేలకొరిగాయి.

శ్రీకాకుళంలో వంశధార, నాగావళికి వరద

శ్రీకాకుళం జిల్లాలోనూ భారీ వర్షాల ప్రభావం తీవ్రంగా ఉంది. వంశధార, నాగావళి, బాహుదా నదుల్లో నీటిమట్టాలు పెరుగుతున్నాయి. జిల్లాలోని పలు మండలాల్లో వరి పొలాలు నీటమునిగాయి. విద్యుత్ స్తంభాలు, ట్రాన్స్‌ఫార్మర్లు దెబ్బతినడంతో కొన్ని ప్రాంతాల్లో విద్యుత్ సరఫరాకు అంతరాయం ఏర్పడింది.

పలు గ్రామాల్లో ఇళ్లకు నష్టం వాటిల్లింది. వరద ముప్పు ఉన్న ప్రాంతాల్లో ప్రజలను పునరావాస కేంద్రాలకు తరలించారు. నదులు, వాగులు ఉద్ధృతంగా ప్రవహిస్తున్న నేపథ్యంలో ప్రజలు అప్రమత్తంగా ఉండాలని అధికారులు సూచించారు.

అల్లూరి జిల్లాలో రాకపోకలకు అంతరాయం

అల్లూరి సీతారామరాజు జిల్లాలో భారీ వర్షాలకు కొండ ప్రాంతాల్లో వాగులు ఉద్ధృతంగా ప్రవహిస్తున్నాయి. హుకుంపేట మండలంలో వంతెనలపై నుంచి వరద నీరు ప్రవహిస్తోంది. పెదబయలు–పాడేరు సరిహద్దు ప్రాంతాల్లో వాగులు పొంగడంతో పలు గ్రామాలకు రాకపోకలు ప్రభావితమయ్యాయి.

అనంతగిరి ఘాట్ రోడ్డుపై చెట్లు విరిగిపడటంతో కొంతసేపు వాహనాల రాకపోకలు నిలిచిపోయాయి. గూడెంకొత్తవీధి మండలంలో తాత్కాలిక కల్వర్టులు దెబ్బతినడంతో కొన్ని గ్రామాలకు రాకపోకలకు ఇబ్బందులు ఏర్పడ్డాయి.

విజయనగరం, పార్వతీపురం మన్యంలోనూ భారీ వర్షాలు

విజయనగరం జిల్లాలోని తెర్లాం, బాడంగి, డెంకాడ తదితర ప్రాంతాల్లో భారీ వర్షాలతో పాటు ఈదురుగాలులు వీచాయి. భద్రతా చర్యల్లో భాగంగా కొన్ని ప్రాంతాల్లో విద్యుత్ సరఫరాను తాత్కాలికంగా నిలిపివేశారు. పార్వతీపురం మన్యం జిల్లాలోనూ వర్షాల ప్రభావం కనిపించింది. సీతంపేట ప్రాంతంలో రహదారులపై చెట్లు విరిగిపడటంతో రాకపోకలకు అంతరాయం ఏర్పడింది.

బుడమేరు, కృష్ణా నదిపై అధికారుల నిఘా

భారీ వర్షాల కారణంగా ఎన్టీఆర్ జిల్లాలో బుడమేరు వాగులోకి వరద నీరు చేరుతోంది. కొండపల్లి సమీపంలోని కవులూరు వంతెన వద్ద బుడమేరు ఉద్ధృతంగా ప్రవహిస్తోంది. ఎగువ ప్రాంతాల నుంచి వచ్చే వరద నీటిని చెరువులకు మళ్లిస్తున్నట్లు నీటిపారుదల అధికారులు తెలిపారు.

కృష్ణా నదిలోకి పట్టిసీమ నుంచి 5,000 క్యూసెక్కుల నీటిని విడుదల చేస్తున్నట్లు అధికారులు వెల్లడించారు. ప్రస్తుత పరిస్థితుల్లో ఎలాంటి ఇబ్బంది లేదని, పరిస్థితిని గంటగంటకూ పర్యవేక్షిస్తున్నామని తెలిపారు.

పలు విమానాలు దారి మళ్లింపు

తీవ్ర వాయుగుండం కారణంగా ఏపీలోని ప్రధాన విమానాశ్రయాలలో విమాన రాకపోకలకు తీవ్ర అంతరాయం ఏర్పడింది. రన్‌వేలపై భారీగా నీరు చేరడం, దట్టమైన మేఘాలు ఆవరించడంతో విమానాశ్రయ అధికారులు పలు సర్వీసులను దారి మళ్లించడంతో పాటు మరికొన్నింటిని రద్దు చేశారు. విశాఖపట్నం నుంచి విజయవాడ వెళ్లాల్సిన ఇండిగో విమానాన్ని హైదరాబాద్‌లోని శంషాబాద్ విమానాశ్రయానికి దారి మళ్లించారు. అలాగే హైదరాబాద్ నుంచి రాజమహేంద్రవరం వెళ్లాల్సిన స్టార్ ఎయిర్‌లైన్స్ విమానాన్ని బెంగళూరుకు మళ్లించారు. భారీ వర్షాల నేపథ్యంలో ప్రయాణికులు తమ విమాన సమయాలు, రాకపోకల తాజా సమాచారాన్ని ఆయా ఎయిర్‌లైన్స్ సంస్థల ద్వారా ముందస్తుగా సరిచూసుకోవాలని విమానాశ్రయ అధికారులు విజ్ఞప్తి చేశారు.

గురువారం కూడా భారీ వర్షాలకు అవకాశం

డీప్ డిప్రెషన్ తీరం దాటినప్పటికీ దాని ప్రభావంతో కోస్తాంధ్రలో వర్షాలు కొనసాగుతున్నాయి. IMD తాజా అంచనాల ప్రకారం ఉత్తర కోస్తా ఆంధ్రలోని పలు ప్రాంతాల్లో భారీ నుంచి అతిభారీ వర్షాలు కొనసాగే అవకాశం ఉంది.

శ్రీకాకుళం, విజయనగరం, పార్వతీపురం మన్యం, విశాఖపట్నం, అల్లూరి సీతారామరాజు, అనకాపల్లి, కాకినాడ తదితర జిల్లాల్లో వర్షాల ప్రభావం కొనసాగవచ్చని అధికారులు హెచ్చరిస్తున్నారు. కొన్ని ప్రాంతాల్లో ఆకస్మిక వరదలు సంభవించే అవకాశం ఉండటంతో లోతట్టు ప్రాంతాల ప్రజలు అప్రమత్తంగా ఉండాలని విపత్తుల నిర్వహణ అధికారులు సూచిస్తున్నారు.

ఇప్పటికే భారీ వర్షాల కారణంగా పలు జిల్లాల్లో విద్యాసంస్థలకు సెలవులు ప్రకటించారు. రోడ్లు, విద్యుత్ వ్యవస్థ, పంటలు, వంతెనలు, కాలువలకు జరిగిన నష్టాన్ని అధికారులు అంచనా వేస్తున్నారు.

మరో 48 గంటలు అప్రమత్తంగా ఉండాలి

తీవ్ర వాయుగుండం భూభాగంలోకి ప్రవేశించి క్రమంగా బలహీనపడుతున్నప్పటికీ, దాని ప్రభావంతో భారీ వర్షాలు కొనసాగుతున్న నేపథ్యంలో ప్రజలు అత్యవసరం అయితే తప్ప బయటకు రావద్దని అధికారులు సూచిస్తున్నారు. ముఖ్యంగా నదులు, వాగులు, కాలువలు, చెరువుల వద్దకు వెళ్లకూడదని హెచ్చరిస్తున్నారు.

ప్రస్తుత పరిస్థితుల్లో ఉత్తరాంధ్రలో వర్షాలు తగ్గుముఖం పట్టే వరకు ప్రజలు అప్రమత్తంగా ఉండటం అవసరం. అధికారుల నుంచి వచ్చే వరద, వాతావరణ హెచ్చరికలను పాటించాలని విపత్తుల నిర్వహణ సంస్థ సూచిస్తోంది.