Paytm Payments Bank Closed: పేటీఎం పేమెంట్స్ బ్యాంక్‌కు ఢిల్లీ హైకోర్టు షాక్.. బ్యాంక్ మూసివేతకు గ్రీన్ సిగ్నల్

Paytm Payments Bank: దేశంలో అత్యంత ప్రాచుర్యం పొందిన ఫైనాన్షియల్ టెక్నాలజీ దిగ్గజాల్లో ఒకటైన పేటీఎంకు అనుబంధ సంస్థగా ఉన్న పేటీఎం పేమెంట్స్ బ్యాంక్ లిమిటెడ్ (PPBL) చరిత్ర ముగింపు దశకు చేరుకుంది. నిబంధనల ఉల్లంఘనలు, పర్యవేక్షక లోపాల కారణంగా భారతీయ రిజర్వ్ బ్యాంక్ (RBI) ఇప్పటికే ఈ బ్యాంకింగ్ లైసెన్స్‌ను రద్దు చేయగా.. తాజాగా బ్యాంక్‌ను పూర్తిగా మూసివేస్తూ ఢిల్లీ హైకోర్టు తీర్పును వెలువరించింది. జులై 8, జులై 22న ఇచ్చిన ఉత్తర్వుల ప్రకారం.. బ్యాంకింగ్ రెగ్యులేషన్ చట్టం-1949, కంపెనీల చట్టం-2013 నిబంధనలకు లోబడి ఈ బ్యాంక్‌ను లిక్విడేషన్‌కు పంపాలని ఆదేశించింది. ఈ ఉత్తర్వులతో బ్యాంక్ మూసివేత ప్రక్రియ చట్టబద్ధంగా ప్రారంభమైంది.

లిక్విడేషన్ ప్రక్రియను నిష్పాక్షికంగా.. చట్టప్రకారం నిర్వహించడానికి ఢిల్లీ హైకోర్టు స్టేట్ బ్యాంక్ ఆఫ్ ఇండియా (SBI) మాజీ చీఫ్ జనరల్ మేనేజర్ గిరికుమార్ ఎం. నాయర్‌ను అధికారిక లిక్విడేటర్‌గా నియమించింది. కోర్టు ఆదేశాల ప్రకారం జులై 8వ తేదీ నుంచే పేటీఎం పేమెంట్స్ బ్యాంక్ డైరెక్టర్ల బోర్డుకు ఉన్న అధికారాలన్నీ అధికారిక లిక్విడేటర్‌కు బదిలీ అయ్యాయి. ఇకపై బ్యాంక్‌కు సంబంధించిన అన్ని ఆస్తులు, బాధ్యతలు, బకాయిల చెల్లింపులు, ఆర్థిక నిల్వల పంపిణీ, పెండింగ్‌లో ఉన్న చట్టపరమైన వ్యవహారాలన్నీ లిక్విడేటర్ పర్యవేక్షణలోనే కొనసాగుతాయి.

పేటీఎం పేమెంట్స్ బ్యాంక్‌పై ఆర్‌బీఐ గత నాలుగేళ్లుగా కఠినమైన చర్యలు తీసుకుంటూ వచ్చింది. 2015లో పేమెంట్స్ బ్యాంక్ లైసెన్స్ పొంది డిజిటల్ చెల్లింపుల విప్లవంలో కీలకంగా నిలిచిన ఈ సంస్థ.. ఆ తర్వాతి కాలంలో ప్రామాణిక నిబంధనలను పాటించడంలో విఫలమైంది. ఖాతాదారుల ధృవీకరణ (KYC) ప్రక్రియలో తీవ్ర నిర్లక్ష్యం వహించడం, ఒకే ఐడెంటిటీతో వేల సంఖ్యలో అకౌంట్లు తెరవడం, అసంపూర్తి సమాచారంతో మనీ లాండరింగ్ అవకాశాలకు తావివ్వడం వంటి అంశాలను ఆర్‌బీఐ తీవ్రంగా పరిగణించింది.

2022 మార్చిలో కొత్త కస్టమర్లను చేర్చుకోవడంపై నిషేధం విధించగా.. 2024 ప్రారంభంలో డిపాజిట్లు, కస్టమర్ వాలెట్ క్రెడిట్ లావాదేవీలపై తీవ్ర ఆంక్షలు విధించింది. చివరికి డిపాజిటర్ల ప్రయోజనాలకు విరుద్ధంగా బ్యాంక్ వ్యవహారాలు సాగుతున్నాయని స్పష్టం చేస్తూ ఏప్రిల్‌లో లైసెన్స్‌ను రద్దు చేసి, మూసివేత కోసం కోర్టును ఆశ్రయించింది.

ఈ లిక్విడేషన్ ప్రక్రియ ద్వారా బ్యాంక్ యొక్క మిగిలిన ఆస్తులను మదింపు చేసి, డిపాజిటర్లకు మరియు ఇతర రుణదాతలకు చట్టప్రకారం చెల్లింపులు పూర్తి చేస్తారు. అయితే, సాధారణ పేటీఎం (Paytm) యాప్ వినియోగదారులపై ఈ పరిణామం ప్రభావం చూపదని గతంలోనే స్పష్టత వచ్చింది. పేటీఎం యాప్ ఒక అగ్రిగేటర్‌గా ఇతర బ్యాంకింగ్ భాగస్వాముల (Axis Bank, YES Bank, HDFC మొదలైనవి) సహాయంతో యూపీఐ (UPI) సేవలను యథాతథంగా కొనసాగిస్తుంది. కేవలం పేటీఎం పేమెంట్స్ బ్యాంక్ ఖాతాలు, వాలెట్లు, ఫాస్టాగ్‌లు ఉన్నవారు మాత్రమే ప్రత్యామ్నాయాలకు మారాల్సి వచ్చింది.

భారతదేశంలో డిజిటల్ బ్యాంకింగ్ విస్తరించినప్పటికీ.. నియంత్రణ నిబంధనలు (Compliance) ఉల్లంఘిస్తే ఎంత పెద్ద సంస్థ అయినా మూసివేతను ఎదుర్కోవాల్సి వస్తుందని నిరూపిస్తూ పేటీఎం పేమెంట్స్ బ్యాంక్ అధ్యాయం అధికారికంగా ముగిసింది.